ভাৰতৰ প্ৰাক্তন মুখ্য ন্যায়াধীশ উদয় উমেশ ললিতে ছোহৰাবুদ্দিন শ্বেখ ভুৱা এনকাউণ্টাৰ গোচৰত অমিত শ্বাহৰ অধিবক্তা হিচাপে কাম কৰাৰ কথা স্বীকাৰ কৰিছে। একে সময়তে তেওঁ কয় যে সেই কামৰ বাবে ‘পুৰস্কাৰ’ হিচাপে উচ্চতম ন্যায়ালয়ৰ ন্যায়াধীশৰ পদ পোৱাৰ কোনো প্ৰশ্নই নাই। কাৰণ তেওঁক ন্যায়াধীশ হিচাপে নিযুক্তি দিয়াৰ প্ৰক্ৰিয়া ইতিমধ্যে আৰম্ভ হৈছিল। তেওঁ লগতে ন্যায়াধীশ নিযুক্তিৰ কলেজিয়াম প্ৰণালী সন্দৰ্ভত কেন্দ্ৰীয় আইন মন্ত্ৰী কিৰেন ৰিজিজুৰ বক্তব্যও খাৰিজ কৰিছে।
উচ্চতম ন্যায়ালয়ত ন্যায়াধীশ হিচাপে ললিতৰ নিযুক্তিৰ সময়ত কিছুমান শিবিৰে দাবী কৰিছিল যে চৰকাৰে তেওঁ ছোহৰাবুদ্দিন ভুৱা এনকাউণ্টাৰ গোচৰত অমিত শ্বাহৰ অধিবক্তা আছিল বাবেই নিযুক্তি দিবলৈ দ্ৰুত সন্মতি প্ৰদান কৰিছিল।
লগতে পঢ়ক: ভাৰতত পুনৰ ভূমিকম্প; এইবাৰ কঁপি উঠিল পঞ্জাৱ
ইউ ইউ ললিতে কয়, “মোডী চৰকাৰ শাসনলৈ অহাৰ আগতেই মোক ন্যায়াধীশ হিচাপে নিযুক্তি দিয়াৰ প্ৰক্ৰিয়া আৰম্ভ হৈছিল। মই অমিত শ্বাহৰ হৈ ওকালতি কৰিছিলো ঠিকেই। কিন্তু মুখ্য উকীল আছিল ৰাম জেঠমালানী। মোৰ যুক্তিৰ কোনো বেলেগ গুৰুত্ব নাই। পুৰস্কাৰ হিচাপে ন্যায়াধীশৰ পদ পোৱাৰ কোনো প্ৰশ্নই নাই।”
শনিবাৰে ললিতে “আৰবান নক্সাল” হিচাপে চিনাক্ত কৰা জি এন সাইবাবাৰ জামিন আবেদনৰ শুনানিৰ বাবে এখন বিশেষ বিচাৰপীঠ গঠনৰ বিষয়েও ব্যাখ্যা কৰে। উচ্চতম ন্যায়ালয় সাধাৰণতে শনিবাৰে বন্ধ থাকে। ১৪ অক্টোবৰ, শুকুৰবাৰে বোম্বাই উচ্চ ন্যায়ালয়ে সাইবাবাক জামিন প্ৰদান কৰে। একেদিনাই মহাৰাষ্ট্ৰ চৰকাৰে উচ্চতম ন্যায়ালয়ত আপীল কৰে। তদানীন্তন মুখ্য ন্যায়াধীশ ললিতৰ আদালতত শুনানি সমাপ্ত হৈছিল। সেয়েহে, বিষয়টো তদানীন্তন দ্বিতীয় সৰ্বোচ্চ ন্যায়াধীশ আৰু বৰ্তমানৰ মুখ্য ন্যায়াধীশ ডি ৱাই চন্দ্ৰচূড়ৰ আদালতত জৰুৰী শুনানিৰ বাবে উল্লেখ কৰা হৈছিল।
সেই আবেদন খাৰিজ কৰি ন্যায়াধীশ চন্দ্ৰচূড়ে কয়, “শনিবাৰে এই সন্দৰ্ভত নিৰ্দেশ দিয়াটো সম্ভৱ নহয়।” ললিতৰ মতে ‘’ন্যায়াধীশ চন্দ্ৰচূড়ৰ মন্তব্যৰ বিষয়ে মই অৱগত নাছিলো। তেওঁৰ বিচাৰপীঠৰ নিৰ্দেশত কিন্তু কোৱা হৈছিল যে ছলিচিটৰ জেনেৰেল তুষাৰ মেহতাই বিষয়টো তালিকাভুক্ত কৰিবলৈ পিছদিনা শনিবাৰে আবেদন দাখিল কৰিব।‘’ পিছত ন্যায়াধীশ ললিতৰ নেতৃত্বত এখন বিশেষ বিচাৰপীঠে সাইবাবাৰ জামিন স্থগিত ৰাখে। শনিবাৰে এনে শুনানিৰ বাবে এখন বিশেষ বিচাৰপীঠ গঠনৰ সিদ্ধান্ত সমালোচনাৰ সন্মুখীন হয়।
লগতে পঢ়ক: আমেৰিকাৰ মধ্যৱৰ্তী নিৰ্বাচনত বিপৰ্যয়ৰ বাবে ট্ৰাম্পৰ ওপৰত ক্ষুব্ধ ৰিপাব্লিকানসকল!
আনহাতে, ন্যায়াধীশ ললিতে ন্যায়াধীশ নিযুক্তিৰ কলেজিয়াম প্ৰণালী সন্দৰ্ভত কেন্দ্ৰৰ বক্তব্য খাৰিজ কৰিছে। উচ্চতম ন্যায়ালয়ৰ পাঁচজন শীৰ্ষ ন্যায়াধীশক লৈ গঠিত কলেজিয়ামৰ জৰিয়তে উচ্চতম ন্যায়ালয় আৰু উচ্চ ন্যায়ালয়ত ন্যায়াধীশ নিযুক্তিক লৈ মোডী চৰকাৰ আৰু ন্যায়পালিকাৰ মাজত দীৰ্ঘদিন ধৰি বিবাদ চলি আছে।
শেহতীয়াকৈ কেন্দ্ৰীয় আইন মন্ত্ৰী কিৰেন ৰিজিজুৱে ন্যায়পালিকাৰ ফালে আঙুলি তুলি কয়, “কলেজিয়াম ব্যৱস্থাত দেশবাসী সুখী নহয়। এই পদ্ধতিটো অস্বচ্ছ। সংবিধানৰ চৰিত্ৰ অনুসৰি চৰকাৰে ন্যায়াধীশ নিয়োগ কৰাৰ কথা।
কিন্তু ভাৰতৰ প্ৰাক্তন মুখ্য ন্যায়াধীশ ললিতে শনিবাৰে এক সাক্ষাৎকাৰত কয়, “এয়া আইন মন্ত্ৰীৰ ব্যক্তিগত মতামত। কলেজিয়াম হৈছে ন্যায়াধীশ নিয়োগৰ সঠিক আৰু সন্তুলিত পদ্ধতি। সেই পদ্ধতিটোত সকলোৰে মত বিবেচনা কৰা হয়।‘’
লগতে পঢ়ক: স্লোভেনিয়াৰ প্ৰথম মহিলা ৰাষ্ট্ৰপতি হিচাপে নিৰ্বাচিত নাটাছা; আছিল মেলানিয়া ট্ৰাম্পৰ অধিবক্তা
ন্যায়াধীশ ললিতে কয়, “উচ্চ ন্যায়ালয়ৰ কলেজিয়ামৰ পৰা উচ্চতম ন্যায়ালয়ৰ কলেজিয়ামলৈ নামবোৰৰ পৰামৰ্শ দিয়া হয়। যিসকল নামৰ পৰামৰ্শ দিয়া হয় ৰাজ্য চৰকাৰে তেওঁলোকৰ বিষয়ে নিজৰ মতামত দিয়ে। উচ্চতম ন্যায়ালয়ৰ কলেজিয়ামে তেতিয়া কেন্দ্ৰক নামবোৰ নিযুক্তিৰ বাবে পৰামৰ্শ দিয়ে।‘’
নিয়ম অনুসৰি, কেন্দ্ৰই কোনো নামকলৈ আপত্তি কৰিলেও উচ্চতম ন্যায়ালয়ৰ কলেজিয়ামে পুনৰ পৰামৰ্শ দিলে কেন্দ্ৰই ইয়াক গ্ৰহণ কৰিবলৈ বাধ্য।