জৱাহৰলাল নেহৰু বিশ্ববিদ্যালয়ৰ প্ৰাক্তন ছাত্ৰ নেতা ওমৰ খালিদে যোৱা বছৰৰ দিল্লীৰ কা বিৰোধী আন্দোলনৰ সময়ত সংঘটিত হিংসাত্মক কাণ্ডত জড়িত থকাৰ অভিযোগৰ গোচৰত জামিন লাভ কৰিছে।
দিল্লী আদালতে বৃস্পতিবাৰে ওমৰ খালিদৰ জামিন মঞ্জুৰ কৰে।
জেএনইউৰ প্ৰাক্তন ছাত্ৰগৰাকীক খাজুৰি খাচৰ কা বিৰোধী আন্দোলনৰ সময়ত সংঘটিত হিংসাত্মক কাণ্ডত জড়িত থকাৰ অভিযোগত যোৱা অক্টোবৰৰ মাহত দিল্লী আৰক্ষীয়ে গ্ৰেপ্তাৰ কৰিছিল।
আদালতে ওমৰ খালিদৰ জামিন শুনানিৰ সময়ত কয় যে “দীৰ্ঘ দিনৰ বাবে খালিদক কাৰাগাৰত বন্দী কৰিব নোৱাৰি। কাৰণ তেওঁক কাৰাগাৰত বন্দী কৰি ৰাখিলে আন্দোলনত জড়িত জনতাৰ আনসকলকো এই বিষয়টোত জড়িত বুলি চিনাক্ত কৰি গ্ৰেপ্তাৰ কৰিব লাগিব।”
স্মৰ্তব্য যে দিল্লী আৰক্ষীৰ অপৰাধ অনুসন্ধান শাখাই ওমৰ খালিদক UAPAৰ অধীনত গ্ৰেপ্তাৰ কৰিছিল। আৰক্ষীয়ে অভিযোগ আনিছিল যে আন্দোলনত হিংসাত্মক কাণ্ড সংঘটিত কৰাৰ পৰিকল্পনাৰে যোৱা ৮ জানুৱাৰীত অনুষ্ঠিত বৈঠকত ওমৰ খালিদো উপস্থিত আছিল।
উল্লেখ্য যে বিগত বৰ্ষৰ ২৪ ফেব্ৰুৱাৰিত দিল্লীৰ কা বিৰোধী আন্দোলনত সংঘটিত হিংসাত্মক ঘটনাত অতি কমেও ৫০ গৰাকী লোক নিহত হৈছিল আৰু ২০০ৰো অধিক লোক আহত হৈছিল।
আনহাতে আজি আদালতে কৰোনা ভাইৰাছৰ সংক্ৰমণৰ প্ৰতি লক্ষ্য ৰাখি ওমৰ খালিদক জে’লৰ পৰা মুকলি হোৱাৰ লগে লগে আৰোগ্য সেতু নামৰ এণ্ড্ৰয়ড এপটো তেওঁৰ মোবাইলত ডাউনল’ড কৰি ব্যৱহাৰ কৰিবলৈ পৰামৰ্শ দিয়ে।
