গুৱাহাটীৰ বামুণীমৈদামৰ এখন ৰে’লৱে কলনীত সোমবাৰে চলোৱা উচ্ছেদ অভিযানক কেন্দ্ৰ কৰি উত্তেজনাৰ সৃষ্টি হয়। ৰে’লৱে আৰক্ষীৰ নেতৃত্বত অসম আৰক্ষী আৰু কেন্দ্ৰীয় নিৰাপত্তা বাহিনীৰ সহযোগত চলোৱা এই অভিযানত প্ৰায় ৬০টা ঘৰ ভাঙি পেলোৱা হয়। উচ্ছেদৰ সময়ত বহু স্থানীয় লোকে বুলড’জাৰৰ সন্মুখত থিয় হৈ ঘৰ ভঙাত বাধা দিয়াৰ চেষ্টা কৰে।
জানিব পৰা মতে, ৰে’লৱেৰ ভূমিত অবৈধভাৱে ঘৰ নিৰ্মাণ কৰাৰ অভিযোগত বাসিন্দাসকলক পূৰ্বেই উচ্ছেদৰ জাননী দিয়া হৈছিল। জাননীত ২১ আগষ্টৰ ভিতৰত ঘৰ খালী কৰিবলৈ নিৰ্দেশ দিয়া হৈছিল। পাছত বাসিন্দাসকলক আৰু তিনিদিন সময় দিয়া হয়। কিন্তু নিৰ্ধাৰিত সময়ৰ ভিতৰত ঘৰ খালী নকৰাত সোমবাৰে প্ৰশাসনে উচ্ছেদ অভিযান আৰম্ভ কৰে।
স্থানীয় বাসিন্দা সকলৰ মতে ইমান কম সময়ৰ ভিতৰত পৰিয়ালসহ ঘৰ এৰি যোৱা তেওঁলোকৰ বাবে অতি কঠিন। তেওঁ কয়, তেওঁলোকক মাত্ৰ এসপ্তাহ সময় দিয়া হৈছিল, যিটো কোনো পৰিয়ালৰ বাবে যথেষ্ট নহয়। তেওঁলোকক যদি এক-দুমাহ সময় দিয়া হ’লহেঁতেন, তেন্তে নতুন বাসস্থান বিচাৰি লোৱাটো সহজ হ’লহেঁতেন। ঘৰত থকা শিশুসকল স্কুলৰ পৰা উভতি আহিলে এতিয়া তেওঁলোকে ক’ত থাকিব বুলিও তেওঁ প্ৰশ্ন কৰে।
এগৰাকী বাসিন্দাই ঘৰ ভাঙি দিয়াৰ পিছত তীব্ৰ অসহায় অৱস্থাৰ কথা প্ৰকাশ কৰে। তেওঁ কয়, একেবাৰে কেইদিনমানৰ ভিতৰতে ঘৰ বিচাৰি লোৱাটো সম্ভৱ নহয়। তিনিদিনৰ ভিতৰত এটা পৰিয়ালে ক’ত ঘৰ বিচাৰি পাব বুলিও তেওঁ প্ৰশ্ন কৰে।
উচ্ছেদ কৰা ঠাইত এখন বাগিচা নিৰ্মাণৰ পৰিকল্পনা থকাৰ কথাও স্থানীয় বাসিন্দাসকলে উল্লেখ কৰে। কিন্তু এই ঠাইখন বাগিচাৰ বাবে উপযুক্ত নেকি, তাক লৈও তেওঁলোকে প্ৰশ্ন তোলে। ঠাইখনত বাথৰুমৰ টেংকী আদি থকা বুলি উল্লেখ কৰি বাসিন্দাসকলে কয় যে এনে অৱস্থাত বাগিচা নিৰ্মাণৰ পৰিকল্পনাতকৈ উচ্ছেদ হোৱা পৰিয়ালসমূহে ক’ত থাকিব, সেই বিষয়টোও গুৰুত্ব দিয়া উচিত।
বাসিন্দাসকলৰ মতে, বৰ্তমান গুৱাহাটীত ভাড়াঘৰৰ দাম যথেষ্ট বৃদ্ধি পাইছে। বহু ঠাইত এটা ঘৰ ভাড়াত ল’বলৈ ১৫ হাজাৰৰ পৰা ২০ হাজাৰ টকা পৰ্যন্ত খৰচ হয়। এনে পৰিস্থিতিত মাত্ৰ তিনিদিনৰ ভিতৰত নতুন ঘৰ বিচাৰি লোৱাটো বহু পৰিয়ালৰ বাবে প্ৰায় অসম্ভৱ বুলি তেওঁলোকে কয়।
কঠোৰ নিৰাপত্তাৰ মাজতে প্ৰশাসনে বাসিন্দাসকলৰ প্ৰতিবাদ আৰু অধিক সময় দিয়াৰ দাবীৰ মাজতো উচ্ছেদ অভিযান অব্যাহত ৰাখে। ঘৰসমূহ ভাঙি পেলোৱাৰ পিছত এতিয়া প্ৰায় ৬০টা পৰিয়াল বিকল্প বাসস্থানৰ সন্ধানত নামিবলগীয়া হৈছে। উচ্ছেদৰ পাছত এই পৰিয়ালসমূহৰ ভৱিষ্যৎ বাসস্থানক লৈ এতিয়া নতুনকৈ প্ৰশ্ন উত্থাপন হৈছে।
