পঞ্চায়ত নিৰ্বাচন ওচৰ চাপি অহাৰ লগে লগে গা-মূৰ জোকাৰি উঠিছে ৰাজ্যৰ প্ৰতিটো ৰাজনৈতিক দল। পৰস্পৰক কটাক্ষ, সমালোচনা কৰাত লাগিছে প্ৰতিদ্বন্দ্বী দলবোৰৰ নেতাসৱ।
আজি হাজোতো তাৰেই দৃষ্টান্ত দেখা গ’ল। পৃথক পৃথক সভাত বাকযুদ্ধত লিপ্ত হৈছে দুই নেতা-নেত্ৰী ক্ৰমে কংগ্ৰেছৰ দুলু আহমেদ আৰু বিজেপিৰ বিধায়িকা সুমন হৰিপ্ৰিয়া। হাজোৰ বিধায়িকাগৰাকীয়ে কংগ্ৰেছক কটাক্ষ কৰি কয় যে এইবাৰ পঞ্চায়ত নিৰ্বাচনৰ পাছতে হাজোৰ ৰাজীৱ ভৱনত তলা লাগিব। এই কথা বিজেপিয়ে আগতীয়াকৈ জানে আৰু ইতিমধ্যে হাজোৰ বিজেপিৰ কাৰ্য্যালয়ত মিঠাই খোৱা পৰ্ব আৰম্ভ হৈছেই।
ইয়াৰ প্ৰত্যুত্তৰ দি কংগ্ৰেছৰ নেতা দুলু আহমেদে কয় যে পঞ্চায়ত নিৰ্বাচনৰ ফলাফলৰ পিছত সুমন হৰিপ্ৰিয়া আৰু মাক বিজয়া চক্ৰৱৰ্তীক ৰাইজে বিদায় দিব। “মিঠাই আগতেই খাই লওক বিজেপিয়ে। ফলাফলৰ দিনা হাজোৰ ৰাজীৱ ভৱনত মিঠাই খাবলৈ আহিব লাগিব।” দুলু আহমেদে কটাক্ষ কৰি কয়।
আনহাতে এখন সংবাদমেলত দুলু আহমেদে কয় যে কংগ্ৰেছে সমষ্টিটোৰ ২০ খন পঞ্চায়তৰ ১২-পৰা ১৪খন পঞ্চায়ত দখল কৰিব। যদি ১২-ৰ পৰা ১৪খন আসন দখল কৰিব নোৱাৰে অহা বাৰ তেওঁ নিৰ্বাচনত অৱতীৰ্ণ নহয়।
উল্লেখযোগ্য যে এইবাৰ পঞ্চতীৰ্থ পঞ্চায়তৰ প্ৰাৰ্থী তথা গুৱাহাটী বিশ্ববিদ্যালয়ৰ প্ৰথম ছেমৰ ছাত্ৰী হাজোৰ নন্দিতা তালুকদাৰো আজিৰ সভাখনত উপস্থিত আছিল।