নাগৰিকত্ব সংশোধনী বিধেয়কৰ বিৰোধিতা কৰি অসমীয়া জাতিক বচাবলৈ গৈ দলৰ পৰা বহিস্কৃত হ’বলগীয়া হৈছিল মীৰা বৰঠাকুৰ। কিন্তু তেতিয়াই বৰঠাকুৰে তেওঁৰ বহিস্কাৰ সহজভাৱে ল’ব পৰা নাছিল। লগতে বিজেপিৰ বেনাৰে তেওঁক মীৰা বৰঠাকুৰ হিচাপে সমাজৰ আগত পৰিচয় দিছিল বুলি বিজেপিৰ পৰা বহিস্কাৰ হোৱাৰ পাছদিনা অৰ্থ্যাৎ ৬ চেপ্তেম্বৰৰ দিনা ঘোষণা কৰিছিল।
ইপিনে, এক হোৱেটছএপ মেছেজযোগে তেওঁক বহিস্কাৰ কৰাটো কোনোপধ্যেই গ্ৰহণযোগ্য নহয় বুলিও তেওঁ সদৰী কৰিছিল।
নাগৰিকত্ব সংশোধনী বিধেয়কৰ প্ৰসংগত বিজেপিৰ বিৰুদ্ধে সোচ্চাৰ হৈ পৰিলেও বৰ্তমান ৰাজনৈতিক প্ৰেক্ষাপটত বিজেপিৰ বিকল্প ৰাজনৈতিক শক্তি বিচাৰি নাপালে বিজেপিৰ পৰা বহিস্কৃত নেত্ৰী মীৰা বৰঠাকুৰে। যেন ‘বিজেপিয়ে এৰি দিলেও মীৰা বৰঠাকুৰে কেতিয়াও নেৰে দলটোক। নৰ্থ ইষ্ট নাওৰ সৈতে হোৱা টেলিফোনিক বাৰ্তালাপত স্পষ্ট হৈ পৰিছে বৰ্তমানো দলটোৰ প্ৰতি অগাধ ভালপোৱা আছে বৰঠাকুৰৰ।
তদুপৰি, আগন্তুক লোকসভা নিৰ্বাচনত বিজেপি দলে অসমৰ পৰা বেছিকৈ আসন লাভ কৰিব বুলি দাবী কৰে মীৰা বৰঠাকুৰে। কিয়নো বৰঠাকুৰৰ মতে বিজেপিক পৰাভূত কৰিব পৰাকৈ বৰ্তমান ‘ৰাজনৈতিক বিকল্পৰ’ অভাৱ অসমত।
‘’বিজেপিয়ে অসমৰ পৰা আসন পোৱাৰ ধাৰণাটো এইবাবেই কৰিব পাৰি যে অগপই মিত্ৰতা কৰাৰ বাবে অগপক জনসাধাৰণে ভোট নিদিয়ে,’‘-এইদৰে কয় বৰঠাকুৰে।
ইপিনে, কংগ্ৰেছে বহু বছৰ ধৰি ভাল ফলাফল দিব নোৱাৰা বাবে বিজেপিক অসমৰ ৰাইজে শাসনলৈ আনিছিল বুলি সদৰী কৰি লগতে তেওঁৰ ‘ৰাজনৈতিক বিশ্বাস’ ব্যক্ত কৰে আমাৰ সাংবাদিকৰ আগত।
তেওঁ কয়, ‘’মোৰ ৰাজনৈতিক ধাৰণা বা বিশ্বাস মতে বিকল্পৰ অভাৱত বিজেপিকে জনসাধাৰণে ভোট দিব। বিজেপিয়ে বৃত্তিগতভাৱে আজিৰ তাৰিখত যিখিনি ফলাফল দেখুৱাই আছে, সেই হিচাপত কোনো দলেই বিজেপিৰ লগত নিৰ্বাচনী যুঁজত দৌৰিব পৰা নাই।‘’
ইপিনে, কংগ্ৰেছৰ সভাপতি ৰাহুল গান্ধীৰ তুলনাত ভাৰতৰ প্ৰধান মন্ত্ৰী নৰেন্দ্ৰ মোদী ভাৰতবাসীৰ বাবে যোগ্য প্ৰধান মন্ত্ৰী বুলি আওপকীয়াকৈ হ’লেও বৰঠাকুৰে স্বীকাৰ কৰে।
‘’নিশ্চিতভাৱে প্ৰধান মন্ত্ৰী নৰেন্দ্ৰ মোদীয়ে অধ্যয়ন লৈ কামবোৰ কৰিছে। তেওঁ এগৰাকী সু-বক্তা। তেওঁৰ মটিভেশ্যনটো ৰাহুল গান্ধীতকৈ হাজাৰগুণে ভাল। প্ৰধান মন্ত্ৰীয়ে কিমান কাম কৰিছে বা কৰা নাই সেইটো বেলেগ অধ্যায়। প্ৰধান মন্ত্ৰী নৰেন্দ্ৰ মোদীক পৰাভুত কৰিব পৰাকৈ তেওঁৰ স্থানত আহিবলৈ ৰাহুল গান্ধীক সময়ৰ প্ৰয়োজন হ’ব,’‘-আমাৰ সাংবাদিকৰ আগত বৰঠাকুৰে এইদৰে কয়।
অৱশ্যে ৰাজনীতি বুলি ক’লে মানুহৰ মাজত বিশ্বাসযোগ্যতা ভংগ হৈছে বুলি আমাৰ সাংবাদিকৰ আগত মন্তব্য কৰি বৰঠাকুৰে কয়, ‘‘বিকল্প কাক ল’ব? থকা দলকেইটাৰ মাজতেটো কাৰোবাক বিকল্প হিচাপে ল’ব লাগিব।‘’
বৰঠাকুৰৰ মতে বিকল্পত থকা নেতাসকলে মানুহৰ বিশ্বাসটো ভংগ কৰিছে।
তেওঁ আৰু কয়, ‘’এইটো কথা কোৱাৰ অধিকাৰ নাই যে কাক ভোট দিব বা কাক ভোট নিদিব। ৰাইজৰ ভোট লৈ জিকি সংসদলৈ গৈ পাৰদৰ্শিতা দিব নোৱাৰা নেতাসকলক যাতে সাংসদ হোৱাৰ সুযোগ নিদিয়ে তাৰ বাবে আহ্বান জনাইছো।‘’
আনহাতে, লোকসভা নিৰ্বাচনত প্ৰতিদ্বন্দ্বিতা কৰা বিজেপিৰ প্ৰাৰ্থীও যদি ‘জাতীয় চেতনাবোধ’ সম্পন্ন ব্যক্তি হয়, তেন্তে তেওঁকো ভোট দিবৰ বাবে বৰঠাকুৰে আহ্বান জনায়।
‘’জাতীয় চেতনা থকা বিজেপিৰ নেতাও যদি ভাল প্ৰাৰ্থী হিচাপে বিবেচিত হয়, তেন্তে বিজেপিকো ভোট দিয়ক। আমি বিজেপিক ভোট দিব নালাগে বুলি নকওঁ,‘’- বৰঠাকুৰে এইদৰে কয়।
প্ৰশ্ন হয়, বিজেপি দলৰ প্ৰতি অশেষ শ্ৰদ্ধা থকা তথা অটল বিহাৰী বাজপেয়ী আৰু লালকৃষ্ণ আদোৱানীক আদৰ্শ হিচাপে লৈ বিজেপিত যোগদান কৰা বলিষ্ঠ নেত্ৰী বৰঠাকুৰক পুনৰবাৰ বৰ্তমানৰ বিজেপি নেতৃত্বই আঁকোৱালি ল’ব নেকি? নে ৰাজনৈতিক বিকল্পৰ অভাৱত বৰঠাকুৰ নিজেই পুনৰবাৰ উভটি আহিব বিজেপিলৈ?
