তিনিচুকীয়া জিলাৰ ডুমডুমাত প্ৰায় ১০গৰাকী ব্যৱসায়ীক আলফা(স্বা)ৰ নামত ধন দাবীৰ পত্ৰ প্ৰেৰণ কৰা ঘটনাই অঞ্চলটোত চাঞ্চল্যৰ সৃষ্টি কৰিছে। আলফা(স্বা)ৰ নাম ব্যৱহাৰ কৰি ধন দাবী কৰাৰ খবৰে স্থানীয় ব্যৱসায়ীসকলৰ মাজতো উদ্বেগ বৃদ্ধি কৰিছে।
জানিব পৰা মতে, ব্যৱসায়ীসকললৈ প্ৰেৰণ কৰা পত্ৰসমূহত আলফা(স্বা)ৰ বিত্ত সচিব লেফটেনেণ্ট জেনেৰেল মাইকেল অসম আৰু সহকাৰী বিত্ত সচিব মেজৰ অভিমন্যু অসমৰ নাম উল্লেখ কৰাৰ লগতে তেওঁলোকৰ নামত স্বাক্ষৰো থকা বুলি জানিব পৰা গৈছে। এই পত্ৰ লাভ কৰাৰ পিছতে আতংকিত ব্যৱসায়ীসকলে আৰক্ষীৰ কাষ চাপি সমগ্ৰ বিষয়টো অৱগত কৰে।
ঘটনাৰ পাছতে আৰক্ষীয়ে অভিযোগ গ্ৰহণ কৰি পত্ৰসমূহৰ উৎস আৰু ইয়াৰ আঁৰত কোন আছে, সেই সন্দৰ্ভত অনুসন্ধান আৰম্ভ কৰিছে। ধন দাবীৰ এই ঘটনাৰ সত্যতা নিৰূপণৰ লগতে জাল পত্ৰ প্ৰেৰণ কৰা ব্যক্তিসকলক চিনাক্ত কৰাৰ চেষ্টা চলাইছে আৰক্ষীয়ে।
ইফালে, এই ঘটনাৰ সৈতে আলফা(স্বা)ৰ কোনো সম্পৰ্ক নাই বুলি সংগঠনটোৱে স্পষ্ট কৰি দিছে। এক বিবৃতিত সংগঠনটোৱে ডুমডুমাৰ কোনো ব্যৱসায়ী বা আন কোনো ব্যক্তিলৈ এনে ধৰণৰ ধন দাবীৰ পত্ৰ প্ৰেৰণ কৰা নাই বুলি উল্লেখ কৰিছে।
আলফা(স্বা)ই অভিযোগ কৰে যে কোনো অজ্ঞাত গোটে সংগঠনটোৰ বিত্ত সচিব আৰু সহকাৰী বিত্ত সচিবৰ নাম অপব্যৱহাৰ কৰি তেওঁলোকৰ স্বাক্ষৰ জাল কৰি এই পত্ৰসমূহ প্ৰচাৰ কৰিছে। সংগঠনটোৱে ডুমডুমাৰ ব্যৱসায়ীসকলক সতৰ্ক হৈ থাকিবলৈ আৰু এনে কোনো গোটৰ সৈতে সহযোগ নকৰিবলৈ আহ্বান জনাইছে।
ডুমডুমাত আলফা(স্বা)ৰ নামত ধন দাবীৰ এই ঘটনাক লৈ এতিয়া আৰক্ষীৰ তদন্তৰ দিশলৈ সকলোৰে দৃষ্টি। তদন্ত আগবঢ়াৰ লগে লগে এই জাল পত্ৰৰ আঁৰৰ ৰহস্য পোহৰলৈ অহাৰ সম্ভাৱনা আছে।
