ৰাষ্ট্ৰসংঘৰ মঞ্চত এইবাৰ এক অভূতপূৰ্ব পৰিস্থিতিৰ সৃষ্টি হৈছে য’ত ইজৰাইলৰ প্ৰতিনিধিয়ে ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছৰ মহিলা প্ৰতিনিধিক তীব্ৰভাৱে অপমান কৰে। সমগ্ৰ সন্মিলনৰ সন্মুখতে ইজৰাইলৰ প্ৰতিনিধিয়ে মহিলাগৰাকীক ব্যক্তিগতভাৱে আক্ৰমণ কৰি মনে মনে থাকিবলৈ অথবা সভা কক্ষৰ পৰা ওলাই যাবলৈ কঢ়া সকীয়নি দিয়ে। ৰাষ্ট্ৰসংঘৰ দৰে এক সন্মানীয় মঞ্চত ইজৰাইলৰ প্ৰতিনিধিৰ এনে আচৰণক লৈ এতিয়া বিশ্বজুৰি তীব্ৰ সমালোচনাৰ সৃষ্টি হৈছে যদিও এই সন্দৰ্ভত ইজৰাইল চৰকাৰে বৰ্তমানলৈকে কোনো স্পষ্টীকৰণ দিয়া নাই।
এই উত্তপ্ত তৰ্কৰ সূত্ৰপাত হৈছিল ৰাষ্ট্ৰসংঘৰ এটা বিশেষ প্ৰতিবেদনক কেন্দ্ৰ কৰি। ৰাষ্ট্ৰসংঘত ইজৰাইলৰ প্ৰতিনিধি ডেনী ডেননে সচিব প্ৰধানৰ বিশেষ প্ৰতিনিধি প্ৰমীলা পাটানক পদৰ পৰা বৰ্খাস্ত কৰাৰ দাবী উত্থাপন কৰে। কাৰণ প্ৰমীলা পাটানৰ প্ৰতিবেদনত উল্লেখ কৰা হৈছিল যে যুদ্ধের সময়ত ইজৰাইলে ধাৰাবাহিকভাৱে যৌন নিৰ্যাতন চলাইছে আৰু এই অপৰাধৰ বাবে ইজৰাইলক ক’লা তালিকাভুক্ত কৰিব লাগে। এই প্ৰতিবেদনক লৈ ক্ষোভিত হৈ ইজৰাইলৰ প্ৰতিনিধি ডেনী ডেননে অভিযোগ কৰে যে ৰাষ্ট্ৰসংঘৰ সচিব প্ৰধানে ইচ্ছাকৃতভাৱে ইজৰাইলক লক্ষ্য কৰি লৈছে আৰু তেওঁৰ চাপতে এই প্ৰতিবেদন প্ৰস্তুত কৰা হৈছে।
এই মন্তব্যৰ তীব্ৰ প্ৰতিবাদ কৰে সচিব প্ৰধানৰ আন এগৰাকী প্ৰতিনিধি ভেনেছা ফ্ৰেচিয়াৰে। তেওঁ স্পষ্টকৈ কয় যে ইজৰাইলৰ প্ৰতিনিধিয়ে ব্যক্তিগত আক্ৰমণ চলাইছে আৰু বিভিন্ন উৎসৰ পৰা পোৱা তথ্যৰ আধাৰতহে এই প্ৰতিবেদন প্ৰস্তুত কৰা হৈছে। এই কথা শুনিয়েই ইজৰাইলৰ প্ৰতিনিধিগৰাকী খঙত অগ্নিশৰ্মা হৈ পৰে আৰু কয় যে তেওঁলোক ৰাষ্ট্ৰসংঘৰ সদস্য অৰ্থাৎ মালিক আৰু ভেনেছা ফ্ৰেচিয়াৰ তাৰে এগৰাকী কৰ্মচাৰীহে। গতিকে তেওঁক মুখ বন্ধ কৰি ৰাখিবলৈ নিৰ্দেশ দি কয় যে তেওঁলোকৰ বিৰুদ্ধে কোনো অপপ্ৰচাৰ সহ্য কৰা নহ’ব আৰু যদি তেওঁ মনে মনে কথা শুনিব নোৱাৰে তেন্তে সভা এৰি ওলাই যাব পাৰে। এই সমগ্ৰ ঘটনাৰ এটা দৃশ্য বৰ্তমান ইণ্টাৰনেটত বহুলভাৱে বিয়পি পৰিছে।
উল্লেখ্য যে ইজৰাইলৰ কাৰাগাৰৰ পৰা মুক্ত হোৱা কেইবাগৰাকীও বন্দীৰ অভিজ্ঞতাৰ আধাৰত অলপতে এটা তথ্যচিত্ৰ প্ৰকাশ পাইছিল। তাত বন্দীসকলে অভিযোগ কৰিছিল যে কাৰাগাৰত থকাৰ সময়ত ইজৰাইলৰ সেনা বিষয়া আৰু মহিলা নিৰাপত্তাৰক্ষীসকলে তেওঁলোকৰ ওপৰত অকথ্য নিৰ্যাতন চলোৱাৰ উপৰিও যৌন নিৰ্যাতন আৰু ধৰ্ষণৰ দৰে জঘন্য অপৰাধ কৰিছিল। দুই হাজাৰ তেইশ চনৰ অক্টোবৰ মাহৰ পৰা এই নিৰ্যাতন বহুগুণে বৃদ্ধি পাইছিল বুলি জানিব পৰা গৈছে। ৰাষ্ট্ৰসংঘই এই সকলোবোৰ তথ্যৰ আধাৰতে ইজৰাইলৰ বিৰুদ্ধে প্ৰতিবেদনখন প্ৰকাশ কৰিছিল যদিও ইজৰাইলে ইয়াক ৰাজনৈতিক উদ্দেশ্যপ্ৰণোদিত বুলি অভিহিত কৰি নাকচ কৰিছে।
