ছচিয়েল মিডিয়াৰ ভিতৰত ফেচবুক হৈছে আটাইতকৈ জনপ্ৰিয় মাধ্যম। বৰ্তমান সময়ত ফেচবুক ব্যৱহাৰ নকৰা লোক নাই বুলিয়েই ক’ব পাৰি।
ব্যক্তিগতভাৱে ব্যৱহাৰ কৰাৰ উপৰি সংস্থাসমূহেও এতিয়া ব্যাপক হাৰত ফেচচবুক ব্যৱহাৰ কৰে।
ইয়াৰ মাজতে ফেচবুকে নতুন নীতি আনিছে যাৰ প্ৰভাৱ সাধাৰণ ব্যৱহাৰকাৰীৰ পৰা সংস্থাসমূহলৈকে সকলোৰে ওপৰত পৰিব।
বিগত দিনত কেইবাটাও সাল-সলনিৰ লগতে প’ষ্ট দিয়াৰ ক্ষেত্ৰতো কঠোৰ হৈ পৰিছে ফেচবুক।
বাতৰি অনুসৰি, অহা ১ অক্টোবৰৰ পৰা নিয়মৰ সাল-সলনি ঘটাবলৈ লৈছে ফেচবুকে।
ইতিমধ্যে, ফেচবুকৰ পৰা বহু ব্যৱহাৰকাৰীয়ে নটিফিকেশ্যন লাভ কৰি উদ্বিগ্ন হৈ পৰিছিল। কিন্তু বিষয়টোক লৈ উদ্বিগ্ন হোৱাৰ কোনো কাৰণ নাই বুলি সংস্থাটোৱে জানিবলৈ দিছে।
ফেচবুকৰ মুৰব্বী মাৰ্ক জুকাৰবাৰ্গে জানিবলৈ দিয়ে যে অহা ১ অক্টোবৰৰ পৰা কোনো ব্যৱহাৰকাৰীৰ প’ষ্ট যদি ফেচবুকৰ নীতিৰ বিৰুদ্ধে যায় তেনেহ’লে সেই প’ষ্টৰ বিৰুদ্ধে ফেচবুকে ব্যৱস্থা ল’ব পাৰে।
সেই প’ষ্ট ব্লক কৰাৰ উপৰি ডিলিট কৰি দিয়া হ’ব পাৰে।অৱশ্যে, ফেচবুকৰ আকৰ্ষণ অক্ষুন্ন ৰখাৰ বাবে ইয়াৰ ফালৰ পৰা কিছুমান পদক্ষেপো গ্ৰহণ কৰা হৈছে।
কেইবাটাও ফিচাৰ অনাৰ লগতে এইবাৰ ফেচবুকৰ নিয়মাৱলীও আপডেট কৰা হৈছে।
শেহতীয়াকৈ ফেচবুকৰ ব্যৱহাৰ অত্যন্ত বৃদ্ধি পোৱাৰ লগতে ইয়াত ভুৱা বাতৰি বিয়পোৱাৰ মাত্ৰাও বৃদ্ধি পাইছে। সেয়েহে, এইবোৰ ৰোধ কৰিবলৈ ফেচবুকে নতুন নীতি গ্ৰহণ কৰিছে।
জানিব পৰা মতে, ভুৱা বাতৰি বিয়পোৱা বা সাম্প্ৰদায়িক সম্প্ৰীতি বিনষ্ট কৰা প’ষ্ট পালে ফেচবুকে সেইবোৰ প’ষ্টৰ বিৰুদ্ধে ব্যৱস্থা গ্ৰহণ কৰিব।
আনহাতে, ফেচবুকৰ ফালৰ পৰা জনোৱা হৈছে যে কোনো ব্যৱহাৰকাৰীয়ে যদি আন প্ৰফাইলত গৈ বিৰক্ত কৰে সেই ক্ষেত্ৰতো ফেচবুকে নজৰ ৰাখিব।
মুঠতে এইবাৰ ব্যৱহাৰকাৰীৰ ওপৰত যথেষ্ট কঠোৰ হোৱাৰ ইংগিত দিছে ফেচবুকে।
