পাৰ ভঙা উচাহ আৰু আনন্দময় পৰিবেশৰ মাজেৰে আজি বৰপেটা সত্ৰত পালন কৰা হয় ফাকুৱা বা সুৱেৰী৷
বৰপেটা সত্ৰত এইবাৰ তিনিদিনীয়াকৈ দৌল মহোৎসৱ পালন কৰা হৈছে৷
যোৱা ২৭ মাৰ্চত গন্ধ যাত্ৰা বা বহ্নুৎসৱ পালন কৰা হয়৷ বহ্নুৎসৱ উপলক্ষ্যে দৌল গোবিন্দ মহাপ্ৰভুক গায়ন বায়ন, ঢুলীয়া সমন্বিতে কীৰ্ত্তন ঘৰৰ ভাঁজঘৰৰ পৰা উলিয়াই আনি মঠৰ চোতালত এখন বৰ শৰাইত ৰাখে৷
আনফালে কলীয়া ঠাকুৰ গোঁসাইক ঘাই দুৱাৰেদি উলিয়াই আনি মঠৰ চোতালত বৰ শৰাইত ৰখা হয়৷ ইয়াৰ পিচতে সত্ৰীয়া নীতি নিয়ম অনুসৰি অধিবাস সম্পন্ন কৰা হয়৷
কালি পালন কৰা হয় ভৰদৌল৷ আৰু আজি বৰপেটাত অনুষ্ঠিত হয় ফাকুৱা অৰ্থাৎ সুৱেৰী উৎসৱ৷
আজি পুৱাৰ পৰাই সত্ৰনগৰ বৰপেটাবাসী ৰঙত বিলীন হৈ যায়৷ দুপৰীয়া গোসাইক কলবাৰী সত্ৰলৈ হেকেটা খুৱাবলৈ লৈ যায়৷ গোসাইক হেকেটা খুৱাই অনাৰ পিছতে সত্ৰত অনুষ্ঠিত হয় বাঁহভঙা পৰ্ব৷
বাঁহভঙা পৰ্ব সম্পন্ন হোৱাৰ পিছত গোসাইক সত্ৰৰ চাৰিওফালে সাতপাক ঘুৰোৱা হয়৷ ইয়াৰ পিছত সত্ৰীয়া ৰীতি নীতিৰে সম্পন্ন কৰা হয় এই মহোৱসৱৰ৷
