কৃষি আইন তিনিখনক কেন্দ্ৰ কৰি দিল্লীৰ সীমান্তত চলি থকা কৃষক আন্দোলনৰ বাবে আজি এক অতি গুৰুত্বপূৰ্ণ দিন।
কিয়নো আজি কেন্দ্ৰীয় চৰকাৰ আৰু কৃষক সংগঠনৰ মাজত দশম পৰ্যায়ৰ আলোচনা।
আনহাতে আজিৰ দিনটোতে উচ্চতম ন্যায়ালয়ত এক গুৰুত্বপূৰ্ণ শুনানিও আছে য’ত আদালতে ২৬ জানুৱাৰিত কৃষকৰ ট্ৰেক্টৰ ৰেলীৰ বিষয়ত শুনানি গ্ৰহণ কৰিব।
উল্লেখ্য যে কৃষক সংগঠনসমূহে ২৬ জানুৱাৰিত ট্ৰেক্টৰ ৰেলি উলিওৱাৰ ঘোষণা কৰিছে আৰু ইয়াৰ বাবে দিল্লী আৰক্ষীৰ পৰা অনুমতিও বিচাৰিছে।
কিন্তু দিল্লী আৰক্ষীয়ে ইয়াৰ অনুমতি প্ৰদান নকৰি উচ্চতম ন্যায়ালয়ৰ কাষ চাপিছিল। অৱশ্যে অন্তিম শুনানিত আদালতে কৈছিল যে সিদ্ধান্ত লোৱাটো আৰক্ষীৰ কাম। কিন্তু চৰকাৰৰ আবেদন সন্দৰ্ভত আজি পুনৰ শুনানি হ’ব।
চৰকাৰৰ ফালৰ পৰা কোৱা হৈছিল যে গণৰাজ্য দিৱসৰ দিনা এনে সহস্ৰাধিক লোক যদি দিল্লীলৈ আহে, তেন্তে নিৰাপত্তা প্ৰণালীত অসুবিধাৰ সৃষ্টি হ’ব।
গণৰাজ্য দিৱসৰ পেৰেড কাৰ্যসূচী সম্পূৰ্ণ হোৱাৰ পিছতহে কৃষকসকলে তেওঁলোকৰ ট্ৰেক্টৰ ৰেলী উলিয়াব আৰু ইয়াৰ ফলত কোনোৱে অসুবিধাৰ সন্মুখীন নহয় বুলি মন্তব্য কৰিছে কৃষক সংগঠনে।
ইফালে কৃষি আইনৰ বিৰুদ্ধে আন্দোলনকাৰী কৃষক সংগঠন আৰু চৰকাৰৰ মাজত আজি দশম পৰ্যায়ৰ আলোচনা অনুষ্ঠিত হ’ব।
কেন্দ্ৰই কৈছে যে দুয়ো পক্ষই এই বিষয়টো নিষ্পত্তি কৰাৰ পোষকতা কৰিছে কিন্তু বেলেগ বেলেগ চিন্তাধাৰাৰ লোক ইয়াৰ সৈতে জৰিত হোৱা বাবে বিলম্ব হৈছে।
নতুন কৃষি আইন কেইখন কৃষকৰ হিতৰ বাবে বুলি দাবী কৰি চৰকাৰে কয় যে বিষয়টো সমাধান কৰাত পলম হৈছে কিয়নো কৃষক নেতাসকলে নিজৰ মতে সমাধান বিচাৰে।
কেন্দ্ৰীয় কৃষি ৰাজ্যিক মন্ত্ৰী পুৰষোত্তম ৰুপালাই সংবাদ মাধ্যমৰ আগত কয় যে কৃষক নেতাৰ বিপৰীতে যদি কৃষকসকলৰ সৈতে আলোচনা হ’লহেতেন তেন্তে শীঘ্ৰে এই বিষয়টোৰ সমাধান ওলালহেতেন।
তেওঁ লগতে কয়, ‘সমাধান দুয়োপক্ষই বিচাৰে কিন্তু দুয়োপক্ষৰ মতামতৰ ভিন্নতা আছে। গতিকে, পলম হৈছে। নিশ্চিতভাৱে কিবা নহয় কিবা সমাধান ওলাব’।