দেশৰ আকাশত উৰি থকা বিমানসমূহৰ যান্ত্ৰিক অৱস্থাক লৈ শেহতীয়াকৈ এক উদ্বেগজনক তথ্য পোহৰলৈ আহিছে। লোকসভাত কেন্দ্ৰীয় অসামৰিক বিমান পৰিবহণ মন্ত্ৰালয়ে দাখিল কৰা এক প্ৰতিবেদন অনুসৰি দেশৰ প্ৰায় ৭৫০খন বিমান পৰীক্ষা কৰাৰ পিছত তাৰে প্ৰায় ৪০০খন বিমানতে কিবা নহয় কিবা যান্ত্ৰিক বিসংগতি ধৰা পৰিছে। এই তালিকাত দেশৰ আগশাৰীৰ বিমান সংস্থা এয়াৰ ইণ্ডিয়া আৰু ইণ্ডিগ’ৰ নাম সকলোতকৈ ওপৰত থকাৰ কথাই এতিয়া যাত্ৰীসকলৰ মাজত তীব্ৰ চাঞ্চল্যৰ সৃষ্টি কৰিছে।
বিগত বৰ্ষৰ জানুৱাৰী মাহৰ পৰা আৰম্ভ হোৱা এই বিশেষ পৰিদৰ্শনত দেশৰ মুঠ ৬খন বিমান সংস্থাৰ ৭৫৪খন বিমান পৰীক্ষা কৰা হৈছিল। ইয়াৰে ৩৭৭খন বিমানত বাৰে বাৰে যান্ত্ৰিক ত্ৰুটি ধৰা পৰিছে বুলি কেন্দ্ৰীয় চৰকাৰে সদৰী কৰিছে। আচৰিত কথাটো হ’ল যে এই ত্ৰুটিসমূহ ধৰা পৰাৰ পিছতো বা মেৰামতি কৰাৰ পিছতো পুনৰ একেবোৰ সমস্যাই দেখা দিছে। ইয়াৰ ফলত বিমানসমূহৰ সঠিক চোৱাচিতা বা ৰক্ষণাবেক্ষণক লৈ এতিয়া ডাঙৰ প্ৰশ্ন উত্থাপন হৈছে।
প্ৰতিবেদনৰ তথ্য অনুসৰি দেশৰ সৰ্ববৃহৎ বিমান সংস্থা ইণ্ডিগ’ৰ ৪০৫খন বিমান পৰীক্ষা কৰা হৈছিল আৰু তাৰে ১৪৮খনত বিসংগতি পোৱা গৈছে। অৰ্থাৎ এই সংস্থাটোৰ প্ৰায় ৩৬ শতাংশ বিমানেই ত্ৰুটিপূৰ্ণ। আনহাতে সংখ্যাৰ হিচাপত ইণ্ডিগ’ আগত থাকিলেও শতাংশৰ হিচাপত এয়াৰ ইণ্ডিয়াৰ অৱস্থা অধিক শোচনীয়। এয়াৰ ইণ্ডিয়াৰ ২৬৭খন বিমানৰ ভিতৰত ১৯১খনতে দোষ পোৱা গৈছে যিটো মুঠ বিমানৰ প্ৰায় ৭২ শতাংশ। এই তালিকাত স্পাইচজেট আৰু আকাছা এয়াৰৰ দৰে কোম্পানীৰ বিমানো অন্তৰ্ভুক্ত হৈ আছে।
অৱশ্যে কেন্দ্ৰীয় চৰকাৰ আৰু বিমান কৰ্তৃপক্ষই জনোৱা মতে এই সকলোবোৰ বিসংগতিয়েই বিমান দুৰ্ঘটনা মাতি আনিব পৰাকৈ ভয়ংকৰ নহয়। চৰকাৰে এই বিসংগতিসমূহক চাৰিটা ভাগত ভাগ কৰিছে। বিমানৰ ভিতৰৰ আসন ভঙা বা টিভি স্ক্ৰীণ বেয়া হোৱাৰ দৰে সৰু সুৰা সমস্যাবোৰকো এই তালিকাৰ অন্তৰ্ভুক্ত কৰা হৈছে। এয়াৰ ইণ্ডিয়াই দাবী কৰিছে যে তেওঁলোকৰ বেছিভাগ বিমানতে থকা ত্ৰুটিবোৰ এই সৰু শ্ৰেণীৰ ভিতৰত পৰে আৰু ইয়াৰ দ্বাৰা যাত্ৰীৰ নিৰাপত্তাত কোনো প্ৰভাৱ নপৰে। তথাপিও বাৰে বাৰে বিমানত কিয় এনে বিসংগতি দেখা দিছে আৰু সংস্থাসমূহে কিয় ইয়াক স্থায়ীভাৱে সমাধান কৰিব পৰা নাই তাক লৈ সাধাৰণ ৰাইজৰ মাজত প্ৰশ্নৰ উদয় হৈছে।
