সমগ্ৰ বিশ্বৰ লগতে ৰাজ্যখনত চলি থকা লকডাউনৰ সময়ছোৱাত আজি বাক্সা জিলাৰ নাগ্ৰীজুলিত নাহৰফুটুকী বাঘ এটাই জনাঞ্চলত প্ৰৱেশ কৰাত সমগ্ৰ অঞ্চলটোত তীব্ৰ আতংকময় পৰিৱেশৰ সৃষ্টি হয়।
বৃহত্তৰ নাগ্ৰীজুলি অঞ্চলৰ ইক্ৰাবিল গাঁৱৰ লোকে জানিবলৈ দিয়া মতে আজি পুৱা প্ৰায় ৯-৩০ বজাত গাঁওখনৰ দুজন লোকে গৰু এৰাল দিবলৈ যাওঁতে নাহৰফুটুকী বাঘটো প্ৰত্যক্ষ কৰে। বাঘটো প্ৰত্যক্ষ কৰাৰ লগেলগে গাঁওখনত হুৱাদুৱা লাগে।
খবৰটো বনজুইৰ দৰে বিয়পি পৰাত গাঁৱখনৰ লোকৰ লগতে নাগ্ৰীজুলি অঞ্চলৰ বহু লোকে হাই-হাল্লা কৰি ওলাই অহাত বাঘটো স্থানীয় লোক এজনৰ বাৰীৰ পিছপিনে থকা বাহৰ চুপাৰ ওচৰত থকা ঝাৰনিৰ মাজত প্ৰৱেশ কৰে। বাঘটো জংঘলত সোমোৱাৰ পিছত স্থানীয় লোকে নাগ্ৰীজুলি আৰক্ষী চকীত খবৰ দিয়ে।
খবৰ পোৱাৰ লগে লগে নাগ্ৰীজুলিৰ আৰক্ষী চকীৰ ভাৰপ্ৰাপ্ত বিষয়া কৈলাশ মালাকাৰৰ নেতৃত্বত অহা আৰক্ষীৰ দল এটা ঘটনাস্থলীত উপস্থিত হয় আৰু কুমাৰীকাটা বনাঞ্চলিক বিষয়াৰ কাৰ্যালয়ত খবৰ দিয়ে। প্ৰায় ১১-৩০ বজাত বন বিভাগৰ লোক ঘটনাস্থলীত উপস্থিত হয় আৰু আৰক্ষীৰ সৈতে আলোচনা কৰি সমীপতে থকা বাল্টি নদীৰ পিনে বাঘটোক খেদি লৈ গৈ বাল্টি নদীৰে ভূটান পাহাৰৰ অভিমুখে বাঘটোক খেদি পঠিওৱাৰ পৰিকল্পনা কৰে নতুবা সম্ভৱ হ’লে বাঘটোক জীৱন্তে আটক কৰাৰ পৰিকল্পনা কৰে।
ইপিনে বাঘ ওলোৱাৰ খবৰ বিয়পি পৰাৰ লগে লগে অঞ্চলটোৰ অগণন লোক হাতে হাতে-হাতে লাঠী-জোং লৈ বাঘ চাবলৈ আহি তীব্ৰ হাই-উৰুমীৰ সৃষ্টি কৰে আৰু বাঘৰ আতংকত সকলোৱেই পাহৰি যায় সামাজিক দূৰত্ব বজাই ৰখাৰ কথা।
আৰক্ষীয়ে প্ৰথমে লোকসকলক দূৰলৈ খেদি পঠায় আৰু স্থানীয় যুৱকসকলৰ সহায়ত বন বিভাগৰ লোকে বাঘটোক লুকাই থকা জংঘলৰ ভিতৰৰ পৰা খেদি পঠিওৱাৰ চেষ্টা কৰে।
বাঘটোৱে দৌৰি গৈ কিছু দূৰৰ এটা পৰিয়ালৰ ঘৰৰ চৌহদত ৰৈ থকা ইছমাইল চৰেন নামৰ লোক এজনৰ ওপৰত জপিয়াই পৰে। লোকজনে সাহসিকতাৰে হাতত থকা লাঠিৰে বাঘটোক জোৰেৰে কোব মাৰে আৰু বাঘটো মাটিত পৰি যায়। পিছত ইছমাইল চৰেন নামৰ যুৱকজনে বুদ্ধিমত্তাৰে বাঘটোৰ ওপৰত জপিঁয়াই পাৰি বাঘটোৰ গলত হেঁচি ধৰে। ওচৰত থকা অন্য লোক সকলো দৌৰি আহি ইছমাইল চৰেনক সহায় কৰাত বাঘটোক ধৰিবলৈ সক্ষম হয়।
বাঘটোৰ আক্ৰমণৰ ফলত বাঘৰ নখ লাগি ইছমাইল চৰেন নামৰ যুৱক জনৰ হাতখনৰ এটা অংশ ফালি যায় আৰু ভৰিত দাঁত লাগি আঘাতপ্ৰাপ্ত হয়।
বন বিভাগৰ লোকে জানিব দিয়া মতে বাঘটোৰ বয়স আনুমানিক দুই বছৰ হ’ব।
ইপিনে বাঘটো ৰাইজৰ হাতত বন্দী হোৱাৰ পিছত বাঘটো গুৰুতৰভাবে আঘাত প্ৰাপ্ত হয় আৰু কিছু সময়ৰ পিছতে বাঘটোৰ কৰুণ মৃত্যু ঘটে।
বাঘটোৰ মৃত্যু হোৱাত লৈ অঞ্চলটোত বিৰূপ প্ৰতিক্ৰিয়াৰ সৃষ্টি হয় আৰু বন বিভাগৰ লোকে বাঘটো জীৱন্তে কৰায়ত্ত্ব কৰাৰ ক্ষেত্ৰত উপযুক্ত সঁজুলিসহ ব্যৱস্থা নোলোৱাৰ গুৰুতৰ অভিযোগ উত্থাপন কৰি কয় যে বন বিভাগৰ হেমাহিৰ বাবে বাঘাটোৱে কৰোঁ মৃত্যুক সাৱটি ল’ব লগাত পৰিছে।
মৃত বাঘটো পিছত কুমাৰীকাটা বনাঞ্চলিক কাৰ্য্যালয়লৈ লৈ অনা হয় আৰু পিছত মাৰণোত্তৰ পৰীক্ষা সম্পন্ন কৰি সমাধিস্থ কৰা হয়।
