এইবাৰ ফিফা বিশ্বকাপ ২০২৬ত ক্ৰিকেটৰ খেলপথাৰত ব্যৱহৃত ‘স্নিক’মিটাৰ’ সদৃশ অত্যাধুনিক প্ৰযুক্তিৰ এক অভিনৱ প্ৰয়োগ দেখিবলৈ পোৱা গৈছে। দেওবাৰে অনুষ্ঠিত চুইডেন আৰু টিউনিছিয়াৰ মাজৰ এখন মেচত এই ‘বল-কণ্টেক্ট’ প্ৰযুক্তি ব্যৱহাৰ কৰি চুইডেনক এটা গ’ল প্ৰদান কৰা হয়, যিটো প্ৰথম অৱস্থাত লাইনছমেনে অফছাইডৰ বাবে বাতিল কৰিছিল। কৃত্ৰিম বুদ্ধিমত্তাসম্পন্ন এই প্ৰযুক্তিৰ সহায়ত ৰেফাৰীয়ে লোৱা এই ঐতিহাসিক সিদ্ধান্তই বৰ্তমান ফুটবল বিশ্বত ব্যাপক চৰ্চা লাভ কৰিছে।
দেওবাৰৰ মেচখনৰ ৮৪ মিনিটত এই আকৰ্ষণীয় ঘটনাটো সংঘটিত হয়। খেলপথাৰত প্ৰৱেশ কৰাৰ মাত্ৰ ১৮ ছেকেণ্ডৰ ভিতৰতে চুইডেনৰ মাটিয়াছ ভানবাৰ্গে দলৰ হৈ চতুৰ্থটো গ’ল কৰিবলৈ সক্ষম হয়। এই গ’লৰ পাছত চুইডেনৰ খেলুৱৈ আৰু প্ৰশিক্ষকসকলে উল্লাস প্ৰকাশ কৰিবলৈ লয় যদিও লগে লগে লাইনছমেনে ইয়াক অফছাইড বুলি ঘোষণা কৰি গ’লটো বাতিল কৰে।
এই সিদ্ধান্তৰ তীব্ৰ বিৰোধিতা কৰি চুইডেনে দাবী কৰে যে বলটো ভানবাৰ্গৰ ওচৰলৈ অহাৰ পূৰ্বে আলেকজেণ্ডাৰ ইছাকৰ ভৰিত স্পৰ্শ কৰিছিল, যাৰ ফলত ভানবাৰ্গ কোনো কাৰণতে অফছাইড অৱস্থানত নাছিল। ইয়াৰ পাছতে খেলপথাৰৰ মূল ৰেফাৰীয়ে ভিডিঅ’ এচিষ্টেণ্ট ৰেফাৰীৰ (ভি এ আৰ) সৈতে যোগাযোগ কৰে। উল্লেখযোগ্য যে, এইবাৰৰ বিশ্বকাপত ব্যৱহৃত ফুটবলসমূহত বিশেষ কৃত্ৰিম বুদ্ধিমত্তা সংলগ্ন চিপ লগোৱা হৈছে, যাৰ জৰিয়তে বলৰ সূক্ষ্মতম স্পৰ্শও ধৰা পেলোৱা সম্ভৱ। ক্ৰিকেটৰ স্নিক’মিটাৰৰ দৰে এই বল-কণ্টেক্ট প্ৰযুক্তিৰ জৰিয়তে পৰীক্ষা কৰি নিশ্চিত কৰা হয় যে বলটো সঁচাকৈয়ে ইছাকৰ ভৰিত স্পৰ্শ কৰিছিল। পৰৱৰ্তী সময়ত ৰেফাৰীয়ে নিজৰ সিদ্ধান্ত সলনি কৰি চুইডেনক গ’লটো প্ৰদান কৰে।
এই সিদ্ধান্তৰ পাছতে চুইডেনৰ শিবিৰত পুনৰ উল্লাসৰ সৃষ্টি হয় আৰু অৱশেষত চুইডেনে মেচখনত ৫-১ গ’লৰ ব্যৱধানত বৃহৎ জয়লাভ কৰে। এই জয় হৈছে চলিত বিশ্বকাপৰ এতিয়ালৈকে দ্বিতীয় সৰ্ববৃহৎ জয়। ইয়াৰ পূৰ্বে দেওবাৰে অনুষ্ঠিত আন এখন মেচত জাৰ্মানীয়ে কুৰাছাওক ৭-১ গ’লত পৰাস্ত কৰিছিল।
যোৱা ১১ জুনৰ পৰা মেক্সিকোৰ এজটেকা ষ্টেডিয়ামত মেক্সিকো আৰু দক্ষিণ আফ্ৰিকাৰ মাজৰ মেচখনেৰে আৰম্ভ হোৱা এই বিশ্বকাপত প্ৰথমবাৰৰ বাবে ৪৮ খন দেশে অংশগ্ৰহণ কৰিছে। আমেৰিকা যুক্তৰাষ্ট্ৰ, কানাডা আৰু মেক্সিকোত যুটীয়াভাৱে অনুষ্ঠিত হৈ থকা এই প্ৰতিযোগিতাখন অহা ১৯ জুলাইলৈকে চলিব। প্ৰথমবাৰৰ বাবে ফুটবলত এনে ধৰণৰ অত্যাধুনিক চেন্সৰ প্ৰযুক্তিৰ ব্যৱহাৰে আগন্তুক মেচসমূহত ৰেফাৰীসকলক সিদ্ধান্ত গ্ৰহণত অধিক সহায় কৰিব বুলি আশা প্ৰকাশ কৰা হৈছে।
