ফিফা বিশ্বকাপ আৰম্ভ হ’বলৈ মাজত মাত্ৰ কেইটামান দিন বাকী থকা অৱস্থাত টিকট বিক্ৰীৰ ক্ষেত্ৰত এক গুৰুতৰ কাৰিকৰী বিজুতি পোহৰলৈ আহিছে। অনলাইন টিকট বুকিং ৱেবছাইটৰ এক প্ৰযুক্তিগত সমস্যাৰ ফলত ৬০ গৰাকী ফুটবল অনুৰাগীয়ে বিনামূলীয়াকৈ বিশ্বকাপৰ টিকট লাভ কৰাৰ পিছত এতিয়া ফিফাই তেওঁলোকক সাত দিনৰ ভিতৰত টিকটৰ মূল্য পৰিশোধ কৰিবলৈ নিৰ্দেশ দিছে। অহা ১১ জুনৰ পৰা আৰম্ভ হ’বলগীয়া এই প্ৰতিযোগিতাখনৰ পূৰ্বে ফিফাৰ এই জাননীয়ে ক্ৰীড়ামহলত নতুন বিতৰ্কৰ সূত্ৰপাত ঘটাইছে।
প্ৰাপ্ত তথ্য অনুসৰি, অনলাইনযোগে টিকট ক্ৰয় কৰিবলৈ যোৱা এই ৬০ গৰাকী অনুৰাগীয়ে ৱেবছাইটৰ বিজুতিৰ বাবে কোনো মূল্য পৰিশোধ নকৰাকৈয়ে টিকট লাভ কৰিবলৈ সক্ষম হৈছিল। পৰৱৰ্তী সময়ত যিসকল দৰ্শকে বৃহৎ পৰিমাণৰ ধন ব্যয় কৰি টিকট ক্ৰয় কৰিছিল, তেওঁলোকে এই বৈষম্যৰ বিৰুদ্ধে প্ৰতিবাদ সাব্যস্ত কৰাৰ পিছতহে সমগ্ৰ বিষয়টো ফিফা কৰ্তৃপক্ষৰ দৃষ্টিগোচৰ হয়। ইয়াৰ লগে লগে ফিফাই স্পষ্ট কৰি দিয়ে যে বিশ্বকাপৰ বাবে কোনো বিনামূলীয়া টিকটৰ ব্যৱস্থা নাই আৰু কেৱল প্ৰযুক্তিগত সমস্যাৰ বাবেহে এনে ঘটনা সংঘটিত হৈছে। যোৱা ৩ জুনত সংশ্লিষ্ট অনুৰাগীসকলক এই বিষয়ে আনুষ্ঠানিকভাৱে অৱগত কৰা হৈছে আৰু তেওঁলোকৰ টিকটসমূহ সাত দিনৰ বাবে সংৰক্ষিত কৰি ৰখা হৈছে। নিৰ্ধাৰিত সময়ৰ ভিতৰত টিকটৰ মূল্য আদায় নিদিলে এই বুকিংসমূহ বাতিল কৰা হ’ব বুলি কৰ্তৃপক্ষই জাননী জাৰি কৰিছে।
উল্লেখ্য যে, এইবাৰৰ বিশ্বকাপৰ টিকটৰ অত্যধিক মূল্যক লৈ পূৰ্বৰে পৰা তীব্ৰ সমালোচনা চলি আহিছে। টিকটৰ চৰা দামৰ বাবে ইতিমধ্যে আইনী সমস্যাৰ সন্মুখীন হোৱা ফিফাক আমেৰিকা যুক্তৰাষ্ট্ৰৰ আদালতে তদন্তৰ নিৰ্দেশ দিছে। কেৱল সাধাৰণ অনুৰাগীয়েই নহয়, পেপ গুৱাৰ্ডিঅ’লাৰ দৰে বিশ্ববিশ্ৰুত ফুটবল ব্যক্তিয়েও টিকটৰ অত্যধিক মূল্য নিৰ্ধাৰণক লৈ মুকলি সমালোচনা কৰিছে। এনে প্ৰেক্ষাপটত প্ৰযুক্তিগত বিজুতিৰ দৰে ঘটনাই ফিফাৰ দৰে আন্তঃৰাষ্ট্ৰীয় পৰ্যায়ৰ সংস্থা এটাৰ পৰিচালনাৰ ওপৰত প্ৰশ্নবোধক চিহ্ন আঁকি দিছে।
অহা ১১ জুনৰ পৰা আমেৰিকা যুক্তৰাষ্ট্ৰ, কানাডা আৰু মেক্সিকোৰ যৌথ আতিথ্যত এইবাৰৰ ফিফা ফুটবল বিশ্বকাপ অনুষ্ঠিত হ’ব। প্ৰথমবাৰৰ বাবে ৪৮ খন দেশে অংশগ্ৰহণ কৰিবলগীয়া এই প্ৰতিযোগিতাখনৰ বাবে আয়োজক দেশকেইখনে সুকীয়াকৈ উদ্বোধনী অনুষ্ঠান আয়োজন কৰাৰ পৰিকল্পনা কৰিছে। মেক্সিকোৰ ঐতিহাসিক এজটেকা ষ্টেডিয়ামত অনুষ্ঠিত হ’বলগীয়া উদ্বোধনী মেচখনত ঘৰুৱা দল মেক্সিকোৱে দক্ষিণ আফ্ৰিকাৰ বিৰুদ্ধে অৱতীৰ্ণ হ’ব। বৰ্তমান সকলোৰে দৃষ্টি নিবদ্ধ হৈ আছে বিনামূলীয়া টিকট লাভ কৰা অনুৰাগীসকলে নিৰ্ধাৰিত সময়ৰ ভিতৰত মূল্য পৰিশোধ কৰে নে তেওঁলোকৰ টিকট বাতিল কৰা হয়, তাৰ ওপৰত।
