২০১৯ চনৰ ৩১ আগষ্টত সমগ্ৰ দেশ কঁপোৱা যোৰহাট জিলাৰ টীয়ক চাহ বাগিচাৰ কৰ্মৰত চিকিৎসক দেবেন দত্ত হত্যাকাণ্ড ঘটনাৰ চূড়ান্ত ৰায় অহা ৫ অক্টোবৰত প্ৰদান কৰিব।
এবছৰ এমাহৰ মূৰত আজি এই লোমহৰ্ষক ঘটনাৰ চূড়ান্ত ৰায় প্ৰদান কৰাৰ কথা আছিল যদিও ৫ অক্টোবৰত ৰায় প্ৰদানৰ পৰৱৰ্তী দিন ধাৰ্য কৰিছে আদালতে।
যোৰহাট জিলাৰ সত্ৰ ন্যায়াধীশৰ আদালতত চলি থকা এই ঘটনাত মুঠ ৩২ জন লোকক অভিযুক্ত কৰা হৈছিল।
উল্লেখ্য যে যোৱা বৰ্ষৰ ৩১ আগষ্টত চাহ বাগিচাৰ চমৰা মাঝি নামৰ এজন যুৱকৰ মৃত্যুক লৈ বাগিচাৰ এদল শ্ৰমিকে কৰ্মৰত অৱস্থাতে অতি নৃশংসভাৱে আক্ৰমণ কৰিছিল জ্যেষ্ঠ চিকিৎসকগৰাকীক।
গুৰুতৰভাৱে আহত চিকিৎসকগৰাকীৰ পাছত চিকিৎসালয়ত মৃত্যু হৈছিল।
ইপিনে আজি ন্যায়ৰ অপেক্ষাত ৰৈ আছিল ডাঃ দেবেন দত্তৰ পৰিয়াল। দোষীৰ উপযুক্ত শাস্তি বিচাৰিছে দেৱেন দত্তৰ পত্নীয়ে।
ইফালে আইনী কাৰণত আজি ৰায়দান নহ’লেও অহা ৫ অক্টাবৰত এই নৃশংস হত্যাকাণ্ডৰ সৈতে জড়িত লোকসকলে শাস্তি পাব বুলি সকলোৱে আশা প্ৰকাশ কৰিছে।
