কৰ ৰেহাই আৰু উদ্যোগিক বিকাশৰ ঘোষণাৰে ২.৬৩ লাখ কোটি টকাৰ বাজেট দাখিল বিত্তমন্ত্ৰী অজন্তা নেওগৰ
ৰাজ্যৰ বিত্তমন্ত্ৰী অজন্তা নেওগে সোমবাৰে ৰাজ্য বিধানসভাত ২০২৫-২৬ বিত্তীয় বর্ষৰ বাবে ২.৬৩ লাখ কোটি টকাৰ বাজেট দাখিল কৰে। বাজেটত ৬২০.২৭ কোটি টকাৰ ঘাটিৰ প্ৰস্তাৱ দিয়া হৈছে।
বাজেটত প্ৰতিমাহে ১৫,০০০ টকা পৰ্যন্ত উপাৰ্জন কৰা ব্যক্তিসকলৰ বাবে প্ৰফেছনেল কৰ ৰেহাইৰ প্ৰস্তাৱ দিয়া হৈছে। ইয়াৰ ফলত ১.৪৩ লাখৰো অধিক কৰদাতা আৰু পৰিয়াল উপকৃত হ’ব আৰু তেওঁলোকৰ ক্ৰয় ক্ষমতা বৃদ্ধি পাব।
অসমৰ চাহ উদ্যোগক সহায় কৰিবলৈ আৰু দুবছৰলৈ গ্ৰীণ টিৰ কৰ ৰেহাই বৃদ্ধি কৰা হৈছে ।
এডভান্টেজ আছাম ২.০ৰ অধীনত ৰাজ্যৰ ডিব্ৰুগড়, গোলাঘাট, শিলচৰ, পলাশবাৰী, জাগীৰোড, তেজপুৰ, আৰু নলবাৰীত নতুন ঔদ্যোগিক পাম স্থাপন কৰা হ’ব। ঔদ্যোগিক বিকাশৰ বাবে ৫০০ কোটি টকা আবণ্টন দিয়া হ’ব।
ইয়াৰ উপৰিও এছিয়ান ডেভেলপমেণ্ট বেংকৰ (এডিবি) আৰ্থিক সাহায্যত পলাশবাৰী আৰু জাগীৰোডত একোটাকৈ টাউনশ্বিপ প্ৰকল্প গঢ়ি তোলা হ’ব, য’ত নগৰীয়া আন্তঃগাঁথনি গঢ়ি তোলাৰ বাবে ৮,০০০ কোটি টকাৰ বৃহৎ বিনিয়োগ কৰা হ’ব।
বাজেটত বৰ্ধিত হাতী-মানুহৰ সংঘাতৰ ঘটনা মোকাবিলা কৰিবলৈ চৰকাৰে গোৱালপাৰা, তেজপুৰ, ওদালগুৰি, বাক্সা আৰু নগাঁও- এই ৫খন ক্ষতিগ্ৰস্ত জিলাত গজ মিত্ৰ প্ৰকল্প আৰম্ভ কৰিছে।
হাতীৰ গতিবিধি নিৰীক্ষণ কৰিবলৈ এআই চালিত কেমেৰা স্থাপন কৰা হ’ব। মানুহ আৰু বন্যপ্ৰাণীৰ সংঘাত হ্ৰাস কৰিবলৈ হাতীৰ বাসস্থান উন্নত কৰা হ’ব। সংঘাতপূৰ্ণ অঞ্চল পৰিচালনা তথা দ্ৰুত সঁহাৰি নিশ্চিত কৰাৰ বাবে গজ মিত্ৰ দল গঠন কৰা হ’ব।
২০২৬ চনৰ বিধানসভা নিৰ্বাচনৰ পূৰ্বে এইখনেই শেষ সম্পূৰ্ণ বাজেট হোৱাৰ পৰিপ্ৰেক্ষিতত মন্ত্ৰী নেওগে চৰকাৰৰ অৰ্থনৈতিক বিকাশ, কৰ সকাহ, পৰিৱেশ সংৰক্ষণ আৰু উদ্যোগ সম্প্ৰসাৰণৰ প্ৰতি দায়বদ্ধতাৰ ওপৰত গুৰুত্ব আৰোপ কৰি উন্নয়নৰ ধাৰা অব্যাহত ৰখাৰ প্ৰতিশ্ৰুতি দিছে।
