ইটোৰ পাছত সিটো গোচৰৰ সমুখীন হ’ব লগা হৈছে ঘৃণনীয় বক্তব্যৰে চৰ্চাত থকা হিন্দুত্ববাদী নেতা তথা ধৰ্মগুৰু য়াতি নৰসিংহানান্দ। এইবাৰ মহাৰাষ্ট্ৰৰ আহমেদনগৰ আৰক্ষীয়ে ধৰ্মগৰুজনৰ এখন এজাহাৰ দাখিল কৰিছে।
দেশৰ আগশাৰীৰ সংবাদপত্ৰ নেচনেল হেৰাল্ডে প্ৰকাশ কৰামতে, ২০২১ চনৰ মাৰ্চত তেওঁ আগবঢ়োৱা এটা ঘৃণনীয় মন্তব্যৰ ভিত্তিত এই এজাহাৰ দাখিল কৰা হৈছে। এই অনুসৰি ভাৰতীয় দণ্ডবিধিৰ কেইবাটাও ধাৰাত ধৰ্মগুৰুজনক অভিযুক্ত কৰা হৈছে।
উল্লেখযোগ্য যে ধৰ্মগুৰুজনে উক্ত মন্তব্যটোৰে ভাৰতৰ প্ৰাক্তন ৰাষ্ট্ৰপতি তথা মিছাইল মেন এপিজে আব্দুল কালামক অপমান কৰিছিল। তেওঁ কৈছিল যে কালামে পাকিস্তানক ভাৰতৰ পৰমাণু বোমাৰ ফৰ্মুলাসমূহ বিক্ৰী কৰিছিল।
প্ৰাক্তন ৰাষ্ট্ৰপতিজনক জিহাদী নাম্বাৰ ৱান বুলি আখ্যা দিও তেওঁ চৰম নিকৃষ্ট ভাষ্য আগবঢ়াইছিল। তদুপৰি দেশৰ আগশাৰীৰ শিক্ষানুষ্ঠান আলিগড় মুছলিম ইউনিভাৰ্চিটি আৰু জামিয়া মিলিয়া ইছলামিয়াক লৈও তেওঁ বিতৰ্কিত মন্তব্য কৰিছিল।
তেওঁ কৈছিল যে এইসমূহ প্ৰতিষ্ঠানে ভাৰতক আফগানিস্তানৰ দৰে মুছলিম দেশ কৰি তুলিব। তদুপৰি ২০২৯ চনত দেশে এজন মুছলিম প্ৰধানমন্ত্ৰী লাভ কৰিব বুলিও তেওঁ একপ্ৰকাৰ সকীয়নি দি মুছলমান সকলৰ বিৰুদ্ধে হিন্দুত্ববাদী লোক সকলক উচতনি দিছিল।
ধৰ্মগুৰুজনৰ এই বিতৰ্কিত মন্তব্যমসমূহ সামাজিক মাধ্যমত ভাইৰেল হৈ পৰে। তাৰপাছতে উক্ত বৰ্ষৰ জুলাই মাহত কেইবাজনো সমাজ সচেতন লোকে আদালতৰ কাষ চাপে আৰু ধৰ্মগুৰুজনৰ ওপৰত ব্যৱস্থা ল’বলৈ আহ্বান জনায়। তেওঁলোকে কয় যে ধৰ্মগুৰুজনে ভাৰতৰ ঐকতাৰ ওপৰত ভাবুকি আনিছে।
উল্লেখযোগ্য যে ইয়াৰ পূৰ্বেও নিজৰ সাম্প্ৰদায়িক মন্তব্যৰ বাবে আইনী ব্যৱস্থাৰ সমুখীন হৈছিল য়াতী নৰসিংহানান্দ। শেহতীয়াকৈ হৰিদ্বাৰত অনুষ্ঠিত ধৰ্মসংসদত তেওঁ মুছলিমসকলৰ ওপৰত নৰমেধযজ্ঞ চলোৱাৰ হুংকাৰ দিছিল।
ইয়াৰ বাবে তেওঁক কাৰাগাৰলৈ পঠোৱা হৈছিল। কিন্তু ১৮ ফেব্ৰুৱাৰীত তেওঁ জামিনত মুক্তি লাভ কৰে।