ৰাজস্থানৰ মৰুভূমিৰ বুকুত নিৰ্মাণ কৰা সপোনৰ প্ৰকল্পটো যেন হঠাতে জুইৰ গ্ৰাসত পৰি ছাই হৈ গ’ল। প্ৰধানমন্ত্ৰী নৰেন্দ্ৰ মোডীৰ উদ্বোধনৰ মাত্ৰ এদিন পূৰ্বে সোমবাৰে (২০ এপ্ৰিল) বিয়লি বালোতৰাৰ পচপদৰায়ৰ এইচপিচিএলৰ ৮০ হাজাৰ কোটি টকাৰ বিশাল শোধনাগাৰত ভয়ংকৰ অগ্নিকাণ্ড সংঘটিত হয়। এই ঘটনাত স্থানীয় ৰাইজ আতংকিত হৈ পৰে।
‘মৰুভূমিৰ ৰত্ন’ হিচাপে পৰিচিত এই বছৰি ৯০ লাখ মেট্ৰিক টন (এমএমটিপিএ) ক্ষমতাসম্পন্ন গ্ৰীণফিল্ড শোধনাগাৰ-ও-পেট্ৰ’কেমিকেল কমপ্লেক্সটো উদ্বোধনৰ বাবে অপেক্ষা কৰি আছিল।
প্ৰাৰম্ভিক তথ্য অনুসৰি শোধনাগাৰৰ মূল অংশ চিডিইউ-ভিডিইউ (Crude Distillation Unit-Vacuum Distillation Unit) এলেকাত এই অগ্নিকাণ্ড সংঘটিত হয়। কোৱা হৈছে যে এক্সচেঞ্জাৰ বিস্ফোৰণৰ ফলত জুই বিয়পি পৰে। এশৰো অধিক অগ্নিনিৰ্বাপক বাহিনীৰ গাড়ীয়ে সেই স্থানত উপস্থিত হৈ জুই নিয়ন্ত্ৰণলৈ আনে।
এই পৰ্যন্ত কোনো লোক হতাহতৰ খবৰ পোৱা হোৱা নাই। প্ৰথমে শ্ৰমিকসকলে নিজাকৈ অগ্নিনিৰ্বাপক ব্যৱস্থা সক্ৰিয় কৰি জুই নিয়ন্ত্ৰণৰ চেষ্টা চলাইছিল। স্থানীয় প্ৰশাসন আৰু এইচ পি চি এল কৰ্তৃপক্ষই কয় যে এতিয়া পৰিস্থিতি নিয়ন্ত্ৰণত আছে। এই প্ৰকল্পটো এইচ পি চি এল আৰু ৰাজস্থান চৰকাৰৰ যৌথ উদ্যোগত নিৰ্মাণ কৰা হৈছিল। ৰাজস্থানৰ পশ্চিম অংশত উদ্যোগীকৰণ আৰু কৰ্মসংস্থাপনৰ বাবে ইয়াক ‘গেম চেঞ্জাৰ’ প্ৰকল্প হিচাপে গণ্য কৰা হৈছিল।
জুলাই মাহৰ পৰা বাণিজ্যিক উৎপাদন আৰম্ভ হোৱাৰ কথা আছিল। ২১ এপ্ৰিল মঙলবাৰে প্ৰধানমন্ত্ৰী মোদীয়ে শোধনাগাৰটো উদ্বোধন কৰাৰ কথা আছিল। উদ্বোধনৰ বাবে বিতং প্ৰস্তুতি চলি আছিল। কিন্তু দুৰ্ঘটনাটোৱে এদিন আগতে সকলো সলনি কৰি পেলালে।
এইচ পি চি এলে জনোৱা মতে, অগ্নিকাণ্ডৰ কাৰণ জানিবলৈ তদন্ত আৰম্ভ কৰা হৈছে। ৰাষ্ট্ৰীয় দুৰ্যোগ সঁহাৰি বাহিনী (এন ডি আৰ এফ), স্থানীয় আৰক্ষী, অগ্নিনিৰ্বাপক সেৱা আৰু সম্ভৱতঃ কেন্দ্ৰীয় তদন্ত সংস্থাৰ দৰে একাধিক সংস্থা তদন্তৰ সৈতে জড়িত হ’ব পাৰে।
প্ৰথম অৱস্থাত কাৰিকৰী দোষ বা ৰক্ষণাবেক্ষণৰ অভাৱৰ কাৰণ বুলি সন্দেহ কৰা হৈছে। অৱশ্যে চূড়ান্ত প্ৰতিবেদন অহালৈকে একো ক’ব পৰা নাযায়। ৰাজস্থানৰ এই প্ৰকল্পটো কেৱল শোধনাগাৰ নহয়, ই আছিল দেশৰ প্ৰথমটো সম্পূৰ্ণ গ্ৰীণফিল্ড সংহত শোধনাগাৰ-পেট্ৰ’কেমিকেল কমপ্লেক্স। ইয়াত পেট্ৰ’ল, ডিজেল, বিমান ইন্ধনকে ধৰি বিভিন্ন পেট্ৰ’কেমিকেল সামগ্ৰী উৎপাদন হোৱাৰ কথা আছিল।
আশা কৰা হৈছিল যে এই প্ৰকল্প সম্পূৰ্ণ হ’লে ৰাজস্থানৰ অৰ্থনীতিয়ে এক নতুন গতি লাভ কৰিব। হাজাৰ হাজাৰ নিয়োগৰ সুযোগ সৃষ্টি হ’লহেঁতেন৷ স্থানীয় বাসিন্দাসকলে দীৰ্ঘদিন ধৰি এই প্ৰকল্পৰ সুফলৰ বাবে অপেক্ষা কৰি আছিল।
