পুনৰ কোভিড ৰোগী ৰখা চিকিৎসালয়ত সংঘটিত হ’ল ভয়ংকৰ অগ্নিকাণ্ডৰ ঘটনা।
এই অগ্নিকাণ্ডত এতিয়ালৈকে ১০ জন ৰোগীৰ মৃত্যু ঘটিছে।
নিহতৰ সংখ্যা আৰু বৃদ্ধি পোৱাৰ আশংকা আছে বুলি চৰকাৰী সূত্ৰই প্ৰকাশ কৰিছে। এই শোকাবহ ঘটনাটো সংঘটিত হৈছে ৰোমানিয়াত।
ৰোমানিয়াৰ পিয়াত্ৰা নিমট কাউণ্টি হাস্পাতালৰ ইনটেনছিভ কেয়াৰ ইউনিটত যোৱা নিশা সংঘটিত হয় এই অগ্নিকাণ্ডৰ ঘটনা।
ৰোমানিয়াৰ স্বাস্থ্যমন্ত্ৰী নেলু তাতাৰাই সংবাদ মাধ্যমক জানিবলৈ দিয়া মতে নিশা সংঘটিত এই জুই হাস্পতাল খনৰ আন ইউনিটলৈও বিয়পি পৰে।
ঘটনাৰ খবৰ পোৱাৰ পিছতে অগ্নিনিৰ্বাপক বাহিনীৰ কেইবাখনো গাড়ীয়ে ঘটনাস্থলীত উপস্থিত হৈ জুই নিৰ্বাপন কৰিবলৈ চেষ্টা চলায়।
কেইবা ঘণ্টা ধৰি চলোৱা চেষ্টাৰ অন্তত জুই নিৰ্বাপিত হয় যদিও ইতিমধ্যে ১০ গৰাকী ৰোগীৰ মৃত্যু ঘটাৰ কথা নিশ্চিত কৰা হয়।
কি কাৰণত চিকিৎসালয় খনত জুইৰ সূত্ৰপাত ঘটিলি সেয়া এতিয়ালৈকে জানিব পৰা হোৱা নাই।
উল্লেখ্য ২০১৫ চনতো ৰোমানিয়াৰ ৰাজধানী বুখাৰেষ্টৰ এটা নাইট ক্লাবত সংঘটিত অগ্নিকাণ্ডৰ ঘটনাত ৬৫ জন লোকৰ মৃত্যু ঘটিছিল।
ইপিনে যোৱা নিশাৰ অগ্নিকাণ্ডৰ ঘটনাৰ পিছতে ক্ষোভত ফাটি পৰিছে ৰোগীৰ অভিভাৱক সকল।চিকিৎসালয় কৰ্তৃপক্ষৰ গাফিলতিৰ বাবেই এনেদৰে বহু ৰোগীয়ে প্ৰাণ হেৰুৱাবলগীয়া হ’ল বুলি বহুতে অভিযোগ কৰিছে।
