বঙাইগাঁও চহৰৰ চিলাৰায় দৈনিক বজাৰৰ সমীপৰ বেংক অৱ ইণ্ডিয়াৰ বিপৰীত দিশে থকা এটা গুদামত এক ভয়ংকৰ অগ্নিকাণ্ড সংঘটিত হয় ৷
এই অগ্নিকাণ্ডৰ ফলত গুদাম গৃহৰ কাষতে থকা আবাসীসকলৰ মাজত আতংকৰ সৃষ্টি হয় ৷ উল্লেখ্য যে মনোজ কুমাৰ নাহাতো নামৰ ব্যক্তি এজনৰ মালিকাধীন মাটিত থকা পৰিত্যক্ত হাৰ্ডৱেৰৰ গুদামটোত প্লাষ্টিকৰ জগ, মগ, ষ্টিলৰ কাঁহি, চৰিয়া, ষ্টোভ, কাচৰ গ্লাচ, লেম্প, লোৰ সামগ্ৰী আদিকে ধৰি বিভিন্ন সামগ্ৰী মজুত আছিল ৷
ইপিনে অগ্নিকাণ্ডৰ খবৰ পাইয়ে ঘটনাস্থলীত অগ্নিনিৰ্বাপক বাহিনীৰ দল উপস্থিত হয় আৰু অগ্নি নিৰ্বাপনৰ বাবে লাগি পৰে ৷ চাৰিখনকৈ অগ্নি নিৰ্বাপক বাহিনীৰ গাড়ীৰে তিনি-চাৰি ঘণ্টামান চেষ্টা কৰাৰ অন্তনতহে জুই নিৰ্বাপিত কৰিবলৈ সক্ষম হয় ৷
গুদামটো ঠেক ঠাইত হোৱাত তথা গুদামৰ ভিতৰত প্লাষ্টিকৰ সামগ্ৰী থকাত জুই নিৰ্বাপন কৰাৰ ক্ষেত্ৰত অগ্নিনিৰ্বাপক বাহিনীয়ে যথেষ্ট কষ্ট কৰিবলগীয়া হয় ৷ উল্লেখ্য যে উক্ত গুদামটো বিগত পাঁচ বছৰ ধৰি পৰিত্যক্ত অৱস্থাত আছিল বুলি জানিব পৰা গৈছে ৷
গুদামৰ গৰাকীক ভাড়া আদায় দিয়াৰ ক্ষেত্ৰতো কিছু খেলিমেলি থকা বুলি জানিব পৰা গৈছে ৷
গুদামত থকা সামগ্ৰীসমূহ কোনোবা ডি এন পালৰ যদিও গুদামৰ গৰাকীৰ সৈতে যোগাযোগ নথকা বুলি বিভিন্নজনে জানিবলৈ দিছে ৷
এনে অৱস্থাত গুদামটো বন্ধ হৈ আছিল আৰু বন্ধ গুদামৰ ভিতৰত কেনেকৈ জুই লাগিল তাৰ প্ৰকৃত কাৰণ জানিব পৰা হোৱা নাই ৷ লগতে গুদামৰ ভিতৰত থকা সামগ্ৰীসমূহৰ গৰাকী উপস্থিত নথকাৰ ফলত অগ্নিকাণ্ডৰ ফলত কিমান টকাৰ ক্ষয় ক্ষতি হ’ল তাকো জানিব পৰা হোৱা নাই ৷
তাৰোপৰি গুদামটোৰ ভিতৰত থকা সামগ্ৰীসমূহ ব্যৱহাৰযোগ্য অৱস্থাত নাই বুলি প্ৰচাৰ কৰিব বিচৰা দেখা গ’ল যদিও বহু সামগ্ৰী কিন্তু ব্যৱহাৰযোগ্য অৱস্থাত নতুনে থকা পৰিলক্ষিত হয় ৷
