ৰাজ্যৰ এজন স্বনামধন্য কবি, গীতিকাৰ, লেখক, অৱসৰপ্ৰাপ্ত অধ্যাপক ইদ্ৰিছ আলীলৈ আগ বঢ়োৱা হৈছে গীতিকবি পাৰ্বতিপ্ৰসাদ বৰুৱা বঁটা-২০১৮। এই কথা জানিবলৈ দিছে ৰাজ্যৰ সাংস্কৃতিক মন্ত্ৰ্যালয়ৰ সূত্ৰই। অসমৰ প্ৰখ্যাত গীতিকবিজনৰ নামত সাংস্কৃতিক বিভাগে এই বঁটা প্ৰথমবাৰৰ বাবে প্ৰচলন কৰিছে।
অধ্যাপক আলীক ৫ ফেব্ৰুৱাৰিৰ আবেলি শ্ৰীমন্ত শংকৰদেৱ কলাক্ষেত্ৰত হ’ব লগীয়া এটা গাম্ভীৰ্য্যপূৰ্ণ অনুষ্ঠানত এই বঁটাটো প্ৰদান কৰা হ’ব। বঁটাত এখন মানপত্ৰৰ লগতে আছে ২ লাখ টকাৰ মাননি।
অধ্যাপক ইদ্ৰিছ আলীয়ে অসমীয়া কথা-সাহিত্য, কাব্য-সাহিত্য আৰু গীতি-সাহিত্য জগতলৈ আগ বঢ়োৱা বৰঙনিৰ বাবে পূৰ্বেও ২০১৩ চনত কলংপাৰ বঁটা লাভ কৰিছিল। মঙলদৈ চহৰৰ সাহিত্য নগৰৰ নিৱাসী আলী গুৱাহাটী অনাতাঁৰ কেন্দ্ৰৰ দ্বাৰা স্বীকৃত গীতিকাৰো।
অসম সাহিত্য সভাৰ উপ-সভাপতি, অসম কবি সমাজৰ উপ-সভাপতি আৰু দৰং জিলা সাহিত্য সভাৰ সভাপতিৰ দৰে পদতো আলীয়ে কাৰ্য্য নিৰ্বাহ কৰিছিল। তেওঁ কেইবাখনো গ্ৰন্থও সংকলন তথা প্ৰণয়ন কৰিছে। গীতৰ সংকলন নিৰিবিলি, সুৰমিতা আৰু কবিতাপুথি ‘সুখৰ, দুখৰ আৰু প্ৰেমৰ’ উপৰি উপন্যাসো ৰচনা কৰিছে। তেওঁৰ ‘আগচোতালৰ মেল’ নামৰ উপন্যাসখনে মানৱ সম্পদ উন্নয়ন মন্ত্ৰ্যালয়ৰ বঁটা লাভ কৰিছে।
‘‘মই অত্যন্ত সুখী যে এই বঁটাৰ জৰিয়তে মোৰ নামটো পাৰ্বতিপ্ৰসাদ বৰুৱাৰ সৈতে সম্পৰ্কিত হ’ল। পাৰ্বতিপ্ৰসাদক মই জ্যোতি আৰু বিষ্ণুৰ লগতে অসমীয়া সংগীত জগতৰ তিনিজন পুৰোহিতৰ মাজৰ এজন বুলি জ্ঞান কৰি আহিছো।’’ মহান গীতিকাৰজনৰ নামত দিয়া বঁটা লাভ কৰি নিজৰ আনন্দ প্ৰকাশ কৰি নৰ্থ-ইষ্ট নাওক জনালে আলীয়ে।
