অলপতে নিৰ্মাণ সম্পূৰ্ণ হৈ উঠা আৰু কেৱল আনুষ্ঠানিক উদ্বোধন বাকী থকা, গাড়ী আৰু ৰেইল যোৱাৰ দুয়োটা ব্যৱস্থা থকা দেশৰ দীৰ্ঘতম দলং বগীবিলৰ ওপৰেৰে ট্ৰেইনৰ পৰীক্ষামূলক চলাচল অব্যাহত আছে। এনে পৰীক্ষা-নিৰীক্ষাৰ অংশ হিচাপে ১ ডিচেম্বৰত ৪৫টা দবাৰ এখন মালগাড়ীয়ে ডিব্ৰুগড়ৰ পৰা ধেমাজি অভিমুখী যাত্ৰাৰে দলংখন সফলতাৰে পাৰ হয়।
এই সফলতাৰ পিছতে আজি প্ৰথমখন মালভৰ্তি ট্ৰেইনে সফলতাৰে অতিক্ৰম কৰিলে বগীবিল দলং। মন কৰিব লগীয়া যে ১ ডিচেম্বৰত যোৱাখন খালী দবাৰ ট্ৰেইন আছিল। সেইখনৰ সফলতাৰ পিছত আজি উত্তৰ-পূবৰ ৰেইলৱেই এখন মালভৰ্তি ট্ৰেইন দলংখনৰ ওপৰেৰে পৰীক্ষামূলকভাৱে চলায়। এই ট্ৰেইনখনো ৰঙাপৰা উত্তৰ জংচনৰ পৰা ৫০টা পেট্ৰল ভৰ্তি দবাসহ সফলতাৰে দলংখন পাৰ হৈ নিউ তিনচুকীয়া জংচন পায়। পুৱা ৭.৪৫ বজাত যাত্ৰা আৰম্ভ কৰা ট্ৰেইনখনে বগীবিল দলঙৰ ওপৰেৰে পাৰ হৈ আবেলি ৫.১৫ বজাত তিনিচুকীয়া পায়।
“আনুষ্ঠানিক উদ্বোধনৰ পূৰ্বে এয়া হ’ল পৰীক্ষামূলক যাত্ৰা” এইদৰে কয় ৰেইলৱেইৰ বিষয়াই। আনহাতে ল’ড থকা মালগাড়ীৰ সফলতাৰ পিছত অচিৰেই যাত্ৰীভৰ্তি ট্ৰেইনৰ পৰীক্ষামূলক চলাচল কৰোৱা হ’ব বুলি জানিবলৈ দিয়ে ৰেইলৱেইৰ বিষয়াই।
উল্লেখযোগ্য যে যোৱা ২২ অক্টোবৰতো নতুন দলংখনৰ ওপৰেৰে ১৫ দবাসহ এটা ইঞ্জিনৰ পৰীক্ষামূলক চলাচল কৰোৱা হৈছিল।
উদ্বোধনৰ পূৰ্বে এইদৰে কৰা পৰীক্ষামূলক চলাচলবোৰ অতিশয় গুৰুত্বপূৰ্ণ বুলি জানিবলৈ দিয়ে ৰেইলৱেইৰ বিষয়াই। ব্ৰহ্মপুত্ৰ নদীৰ ওপৰত থকা ৪.৯ কিলোমিটাৰ দীঘল দলংখন এই বছৰৰ শেষৰফালে আনুষ্ঠানিকভাৱে উদ্বোধন কৰাৰ সম্ভাৱনা আছে।