বিজেপিৰ ৫ গৰাকী সদস্যক প্ৰাথমিক সদস্যৰ পৰা বহিষ্কাৰ।
বিজেপিৰ সভাপতি ভৱেশ কলিতাৰ নিৰ্দেশ মতে বহিষ্কাৰ কৰা হৈছে তেওঁলোকক।
জানিব পৰা মতে গুৱাহাটী পৌৰ নিগমৰ নিৰ্বাচনত বিজেপিৰ পৰা টিকট প্ৰত্যাশী আছিল তেওঁলোক।
টিকট নোপোৱাত নিৰ্দলীয়ভাৱে তথা অন্য দলৰ হৈ প্ৰতিদ্বন্দ্বিতা কৰাৰ অভিযোগ তেওঁলোকৰ বিৰুদ্ধে।
তেওঁলোক ক্ৰমে পশ্চিম গুৱাহাটী সমষ্টিৰ বার্ড নং-৯ ৰ জুনু দাস, পশ্চিম গুৱাহাটী, বার্ড নং-১১ ৰ সৰস্বতী চক্রৱর্তী,পশ্চিম গুৱাহাটী, বার্ড নং-১১ ৰ ৰাজুমনি ডেকা দাস, পশ্চিম গুৱাহাটী, বার্ড নং- ১৩ৰ শান্তনা ঠাকুৰীয়া, মধ্য গুৱাহাটী, বার্ড নং- ৩০ ৰ ৰূপালী মুখার্জী।
তেওঁলোক আটাইৰে বিৰুদ্ধে বিজেপিৰ অভিযোগ “গুৱাহাটী পৌৰ নিগম নির্বাচন-২০২২ ত ভাৰতীয় জনতা পাৰ্টিৰ দলীয় সিদ্ধান্তক বিৰোধ কৰি দলৰ মনোনীত প্ৰাৰ্থীৰ বিৰুদ্ধে নির্দলীয়/অন্য দলৰ প্রার্থী হিচাপে প্রতিদ্বন্দ্বিতা আগবঢ়াই দলবিৰোধী কাৰ্য্যত লিপ্ত হৈছে।”
এই অপৰাধত দলীয় সংবিধানৰ ধাৰা ২৫ৰ উপধাৰা ৯ অনুসৰি ৰাজ্যিক সভাপতি ভবেশ কলিতাই তাৎক্ষণিকভাৱে বলবৎ হোৱাকৈ দলৰ প্ৰাথমিক সদস্য পদৰ পৰা বহিষ্কাৰ কৰিছে।
ইয়াৰ পৰা স্পষ্ট হৈছে যে বিজেপিতো নিৰ্বাচনৰ প্ৰাৰ্থিত্বকেন্দ্ৰিক সংঘাতৰ জুইয়ে দহিবলৈ আৰম্ভ কৰিছে।
