চৰকাৰৰ প্ৰতিশ্ৰুতি এতিয়া কেৱল শ্ল’গানতে আৱদ্ধ। হয়, বিজেপি চৰকাৰে ৰাজ্যত দ্বিতীয়বাৰৰ বাবে কাৰ্যভাৰ গ্ৰহণ কৰাৰ পিছতেই বানমুক্ত অসম গঢ়াৰ সংকল্প গ্ৰহণ কৰিছিল।
বান গৰাখহনীয়া ৰোধৰ বাবে বিভিন্ন অঞ্চল পৰিভ্ৰমণ কৰিছিল বিভাগীয় মন্ত্ৰী, বিধায়ক তথা সাংসদে। ভুক্তভোগী ৰাইজক দিছিল বান গৰাখহনীয়া সমস্যাৰ স্থায়ী সমাধানৰ প্ৰতিশ্ৰুতি।
কিন্তু বাৰিষাৰ বানত যেন উটি গ’ল চৰকাৰৰ এই প্ৰতিশ্ৰুতি। বাৰিষাৰ আগমনৰ লগে লগে এতিয়া ঠায়ে ঠায়ে সৃষ্টি হৈছে বান গৰাখহনীয়াৰ সন্ত্ৰাস। শিৱসাগৰৰ দিচাংমুখৰ অফলাৰ দৃশ্যও ব্যতিক্ৰম নহয়।
বান গৰাখহনীয়াৰ কবলত পৰি নিশ্চিন্ন হোৱাৰ দিশত অফলা গাঁও। বৰ্তমান ব্ৰহ্মপুত্ৰ নদীৰ পৰা মাত্ৰ ২০০ মিটাৰ নিলগত অফলাৰ মথাউৰি। প্ৰতি বছৰে ব্ৰহ্মপুত্ৰ নদীৰ বাঢ়নী পানীয়ে সৃষ্টি কৰা খহনীয়াই নিঃশেষ কৰি পেলাইছে অফলা গাঁওৰ বিস্তৃৰ্ণ অঞ্চল।
যাৰ বাবে চৰকাৰৰ ওপৰত ক্ষুন্ন হৈ পৰিছে অফলাবাসী। বিগত বৰ্ষত এই অফলা অঞ্চললৈ জল সম্পদ মন্ত্ৰী পিয়ুষ হাজৰিকা, শিৱসাগৰ জিলাৰ অভিভাৱক মন্ত্ৰী ৰণোজ পেগু, মন্ত্ৰী যোগেন মহন, সাংসদ তপন কুমাৰ গগৈকে ধৰি বহু বিজেপি নেতা কৰ্মী উপস্থিত হৈ অফলাৰ এই বান গৰাখহনীয়া ৰোধ তথা স্থায়ী সমাধানৰ বাবে অতিশীঘ্ৰে আঁচনি গ্ৰহণ কৰিব বুলি ৰাইজক প্ৰতিশ্ৰুতি প্ৰদান কৰিছিল যদিও আজি এবছৰে এই অঞ্চলত এচপৰাও মাটি নপৰিল।
ইপিনে খৰালি কালত শুই- বহি থকা শিৱসাগৰৰ জল সম্পদ বিভাগে অফলাৰ গৰাখহনীয়া ৰোধৰ বাবে প্ৰায় ডেৰ কোটিটকীয়া ‘ইৰ’শ্বন শ্বিল্ড’ নামৰ এক আঁচনি গ্ৰহণ কৰিছিল যদিও সেয়া যেন এতিয়া ফুটুকাৰ ফেন হৈ পৰিছে।দৈনিক নতুন নতুন অঞ্চললৈ বিয়পি পৰিছে অফলাৰ এই গৰাখহনীয়া। অফলাবাসীৰ প্ৰশ্ন, কেতিয়া স্থায়ী সমাধান হব অফলাৰ বান গৰাখহনীয়া সমস্যাৰ?
বিভাগীয় মন্ত্ৰীয়ে দিয়া প্ৰতিশ্ৰুতি পালন কৰিব পাৰিব নে? নে বান গৰাখহনীয়াই এইদৰে এদিন নিঃশেষ কৰি পেলাব শিৱসাগৰৰ দিচাংমুখৰ এই অফলা গাঁও।