খাদ্য সুৰক্ষা বিভাগৰ পৰিদৰ্শক তৰুণ দাস আৰু বিষয়া চম্পক পাঠকৰ নেতৃত্বত যোৱা এটা পাঁচজনীয়া দলে আজি গুৱাহাটী চিকিৎসা মহাবিদ্যালয় চৌহদত থকা হোটেল আৰু ৰেষ্টুৰেণ্টসমূহত অভিযান চলায়।
বিভাগটোৱে এই অভিযানকালত কেইবাখনো ৰেষ্টুৰেণ্টক অস্বাস্থ্যকৰ পৰিবেশত খাদ্য বিক্ৰী আৰু প্ৰস্তুত কৰাৰ বাবে জাননী জাৰি কৰাৰ লগতে তিনিখন হোটেল এসপ্তাহৰ বাবে কাইলৈৰ পৰা সম্পুৰ্ণৰূপে ছীল কৰাৰ সিদ্ধান্ত গ্ৰহণ কৰিছে।
তৰুণ দাসৰ নেতৃত্বত যোৱা দলটোৱে ২৯ জুনৰ পৰা সাত দিনৰ বাবে হোটেল কেইখন বন্ধ ৰখাৰ বাবে নিৰ্দেশ দিয়ে হোটেল কেইখনৰ মালিকসকলক।
পৰিদৰ্শক তৰুণ দাসে সংবাদ মাধ্যমৰ আগত জনোৱা অনুসৰি অস্বাস্থ্যকৰ পৰিবেশত খাদ্য সামগ্ৰী বিক্ৰী আৰু মজুদ ৰখাৰ বাবে কাইলৈৰ পৰা সাত দিনৰ বাবে বন্ধ কৰিবলগীয়া হোটেল কেইখন হৈছে ৰেখা হোটেল, জয়া হোটেল আৰু অসমী হোটেল।
উক্ত হোটেল কেইখনত গ্ৰাহকৰ বাবে বিশুদ্ধ খোৱা পানীৰ কোনোধৰণৰ ফিল্টাৰৰো ব্যৱস্থা নাই বুলি দাসে সংবাদ মাধ্যমৰ আগত জনায়।
আনহাতে, খাদ্য সুৰক্ষা বিভাগে অভিযান চলোৱা মুঠ সাতখন হোটেলৰ এখনৰো খাদ্য সুৰক্ষা বিভাগৰ অনুজ্ঞা পত্ৰ নাই বুলি পৰিদৰ্শক দাসে জানিবলৈ দিয়ে। অনুজ্ঞা পত্ৰ নোহোৱা হোটেল সমূহক শীঘ্ৰে অনুজ্ঞা পত্ৰ বনোৱাৰ বাবে জাননী জাৰি কৰিছে খাদ্য সুৰক্ষা বিভাগে। অন্যথা হোটেল সমূহৰ ওপৰত আইনী ব্যৱস্থা গ্ৰহণ কৰিব বুলিও অভিযান কালত সকীয়নি দিয়ে বিভাগটোৰ পৰিদৰ্শকগৰাকীয়ে।
