আলজেৰিয়াৰ ঘৰুৱা লীগৰ খেল চলি থকাৰ মাজতে খেলপথাৰতে প্ৰাণ হেৰুৱালে ফুটবলাৰ ছোফিয়েন লোকাৰে। খেল চলি থকাৰ সময়ত নিজ দলৰে গ’লকীপাৰৰ সৈতে হোৱা সংঘৰ্ষৰ অলপ সময়ৰ পাছতেই মৃত্যু হয় ফুটবলাৰগৰাকীৰ।
সম্প্ৰতি আলজেৰিয়াত লীগ-টু টুৰ্ণামেন্ট চলি আছে আৰু এই টুৰ্ণামেন্টত মৌলোদিয়া ছাইদা আৰু এএছএম অ’ৰান ক্লাৱ মুখামুখি হৈছিল। দুয়োটা ক্লাৱৰ মাজত অনুষ্ঠিত খেলৰ মাজতে এই অঘটনটো ঘটে।
মৌলোদিয়া ছাইদাৰ হৈ খেলা ছোফিয়েন লোকাৰৰ বয়স আছিল মাত্ৰ ৩০ বছৰ।
শনিবাৰে খেল চলি থকাৰ সময়ত ছাইদাৰ ক্লাৱৰ অধিনায়ক লোকাৰৰ সৈতে তেওঁৰ দলৰে গ’লকীপাৰৰ সংঘৰ্ষ হয়। লগে লগে খেলপথাৰত ঢলি পৰে লোকাৰ।
প্ৰথমিক চিকিৎসা প্ৰদানৰ পাছত পুনৰ খেলিবলৈ লয় লোকাৰে। কিন্তু কেইমিনিটমান পাছতে পুনৰ খেলপথাৰত ঢলি পৰে ফুটবলাৰগৰাকী।
এখন এম্বুলেন্সেৰে ততাতয়াকৈ নিকট হাস্পাতাললৈ লৈ যোৱা হয় ফুটবলাৰ লোকাৰক। কিন্তু হাস্পাতালতেই মৃত্যু ঘটে ছোফিয়েন লোকাৰৰ। চিকিৎসকে হাৰ্ট এটেকৰ বাবেই ফুটবলাৰগৰাকীৰ মৃত্যু হোৱা বুলি জানিবলৈ দিয়ে।
Also Read: হাজোৰ বিবাহস্থলীত কুৰুক্ষেত্ৰ! বিয়া চলি থাকোতে আহি ওলাল প্ৰথমা পত্নী; তাৰ পাছত…
এই দু:সংবাদ লাভ কৰাৰ লগে লগেই খেল বন্ধ কৰা হয় আৰু দুয়োটা দলৰ খেলুৱৈসকল শোকত ভাগি পৰে।