আজি ২২ অক্টোবৰত ১৭ বছৰে ৰাজ্যবাসীয়ে কৰি থকা অপেক্ষাৰ অন্ত পৰিল। আজিৰ দিনটোতে ভাৰতৰ ভিতৰতেই দীৰ্ঘতম ৰেলপথ-স্থলপথ দলঙৰ ওপৰেদি পৰীক্ষামূলকভাৱে চলিল প্ৰথমখন পূৰ্ণাংগ ৰেল।
ডিব্ৰুগড়ৰ ধমলগাঁৱৰ পৰা ধেমাজিৰ টঙানী ষ্টেশ্যনলৈকে ঘণ্টাত ১২০-১৪০ কিলোমিটাৰ বেগেৰে যাত্ৰা আৰম্ভ হ’ল। পূৰ্বতে পৰীক্ষামূলকভাৱে ৰে’ল ইঞ্জিন চলোৱাৰ পিছত আজি প্ৰথমবাৰৰ বাবে মুঠ ১২ টা ডবা থকা ৰে’লখনেৰে যাত্ৰা আৰম্ভ কৰা হৈছে।
এই ৰে’লখনৰ পাছে পাছে মটৰ ট্ৰলিৰ জৰিয়তে টঙানী ষ্টেশ্যনলৈকে আগবাঢ়িছে কমিছন অব ৰে’লৱে চেফ্টিৰ এটা দল। জেট ৰে’লৱেৰ মুখ্য সুৰক্ষা বিষয়া শৈলেস কুমাৰ পাঠকৰ অনুমতিৰ পিছথে ৰে’লৱে বিভাগৰ শীৰ্ষ বিষয়া সকলৰ উপস্থিতিত এই পৰীক্ষামূলক যাত্ৰা আৰম্ভ কৰা হয়।
উল্লেখযোগ্য যে ২০০২ চনৰ ২১ এপ্ৰিলত ভূতপূৰ্ব প্ৰয়াত প্ৰধান মন্ত্ৰী অটলবিহাৰী বাজপায়ীয়ে এই দলংখন অধাৰশিলা স্থাপন কৰিছিল। এই দলংখনৰ ব্ৰহ্মপুত্ৰৰ জলপৃষ্ঠৰ পৰা ৩২ মিটাৰ ওপৰত আছে। এই দলংখনৰ নক্সা ছুইডেন আৰু ডেনমাৰ্কক সংযোগ কৰা এখন দলঙৰ পৰা লোৱা হৈছে।
মন কৰিবলগীয়া যে অৰুণাচল প্ৰদেশৰ পৰা গুৱাহাটী হৈ ডিব্ৰুগড়লৈ ৰে’ল যাত্ৰা হ’ল ৫০০ কি. মি. কিন্তু বগীবিল দলঙেৰে এই দূৰত্ব ১০০ কি. মি.তকৈ কম হ’ব। যাৰ ফলত ভাৰতৰ ভিতৰতেই দীৰ্ঘতম দলংখনে যাত্ৰী বহু সময় ৰেহাই কৰিব বুলি আশা কৰা হৈছে।
