পশ্চিম এছিয়াৰ যুদ্ধত ‘বন্ধ’ হৈ থকা হৰমুজ প্ৰণালীৰ লগতে ‘অন্য’ দালাল ষ্ট্ৰীটৰ এটা অংশত অতিৰিক্ত মূল্য চাপৰ ফলত বিদেশী বিনিয়োগকাৰীৰ ‘ভাৰত ত্যাগ’ যাত্ৰা অব্যাহত আছে। যাৰ বাবে যুদ্ধ আৰম্ভ হোৱাৰ পৰাই দেশৰ ষ্টক সূচকাংকত ‘বিক্ৰীৰ চাপ’ ক্ৰমাগতভাৱে বৃদ্ধি পাই আহিছে।
শেহতীয়াকৈ এক প্ৰতিবেদনত বিশেষজ্ঞসকলে এই কথা দাবী কৰিছে। তেওঁলোকৰ মতে, বিদেশী বিনিয়োগৰ ধাৰাবাহিক বিক্ৰীয়ে পৰোক্ষভাৱে বৈদেশিক মুদ্ৰা (Forex) বজাৰত টকাৰ ওপৰতো বিক্ৰীৰ চাপৰ সৃষ্টি কৰিছে। যিয়ে সামগ্ৰিকভাৱে দালাল ষ্ট্ৰীটৰ প্ৰতি বিনিয়োগকাৰীৰ মাজত ‘নেতিবাচক আৱেগ’ বৃদ্ধি কৰিছে।
পৰিসংখ্যা অনুসৰি বিদেশী বিনিয়োগকাৰীয়ে এই বছৰ (২২ মে’লৈকে) ২.২২ লাখ কোটি টকাৰ শ্বেয়াৰ বিক্ৰী কৰিছে। মাৰ্চ আৰু এপ্ৰিল মাহত তেওঁলোকৰ শ্বেয়াৰ বিক্ৰী ক্ৰমে ১,১৭,৭৭৫ কোটি আৰু ৬০,৮৪৭ কোটি টকা। মে’ মাহতো এই ধাৰাটোৰ কোনো পৰিৱৰ্তন হোৱা নাই। মে’ মাহত (শুকুৰবাৰলৈকে) তেওঁলোকৰ ভাৰতীয় কোম্পানীসমূহে বিক্ৰী কৰা শ্বেয়াৰৰ পৰিমাণ আছিল ৩০,৩৭৪ কোটি টকা। যিয়ে বজাৰৰ প্ৰতি বিদেশী বিনিয়োগকাৰীৰ দৃষ্টিভংগী স্পষ্ট কৰি তুলিছে।
কিয় বিদেশী বিনিয়োগকাৰীয়ে শ্বেয়াৰ বিক্ৰীৰ পথত আগবাঢ়িছে? বিশেষজ্ঞৰ এটা অংশৰ মতে, পশ্চিম এছিয়াত যুদ্ধ আৰম্ভ হোৱাৰ লগে লগে হৰমুজ প্ৰণালীৰ মাজেৰে সামগ্ৰী পৰিবহণ ব্যৱস্থা ‘বন্ধ’ হৈ পৰে। যাৰ বাবে খাৰুৱা তেল আৰু গেছৰ যোগান শৃংখলত আঘাত হানিছে। ফলত যুদ্ধ আৰম্ভ হোৱাৰ পিছতেই বিশ্ব বজাৰত ইন্ধন তেল আৰু গেছৰ মূল্য বৃদ্ধি পাবলৈ ধৰে।
এনে পৰিস্থিতিত ভাৰতৰ দৰে ইন্ধন আমদানিৰ ওপৰত নিৰ্ভৰশীল দেশসমূহৰ আমদানি ব্যয় বিপুল হাৰত বৃদ্ধি পালে, যাৰ ফলত বিদেশী বিনিয়োগকাৰীৰ দালাল ষ্ট্ৰীটৰ প্ৰতি ‘আকৰ্ষণ’ হ্ৰাস পালে। ফলত তেওঁলোকে প্ৰফিট বুকিঙৰ পৰিমাণ বৃদ্ধি কৰিলে।
বিশেষজ্ঞসকলৰ মতে, যুদ্ধ আৰম্ভ হোৱাৰ পৰাই ডলাৰ সূচকাংক আৰু খাৰুৱা তেলৰ মূল্য ক্ৰমাগতভাৱে বৃদ্ধি পাইছে। ফলত বিনিয়োগকাৰীৰ এক বৃহৎ অংশই ডলাৰ আৰু খাৰুৱা তেলত বিনিয়োগ বৃদ্ধি কৰিছে। এনে পৰিস্থিতিত তেওঁলোকে নিজৰ বিনিয়োগ ষ্টক মাৰ্কেটৰ পৰা ডলাৰ, ব্ৰেণ্ট ক্ৰুড ফিউচাৰ, ডব্লিউ টি আই ক্ৰুড আদি একাধিক বিনিয়োগৰ ক্ষেত্ৰলৈ স্থানান্তৰিত কৰিছে। ফলত বিদেশী বিনিয়োগ হ্ৰাস পোৱাৰ ফলত দালাল ষ্ট্ৰীটৰ মূল সূচকাংকৰ ওপৰত হেঁচা পৰিছে।
আনহাতে, পশ্চিম এছিয়াৰ যুদ্ধ শীঘ্ৰে শেষ হ’ব পাৰে বুলি আমেৰিকা প্ৰশাসনে ‘ইংগিত’ দিছে। একাংশ বিশেষজ্ঞৰ মতে ইয়াৰ দ্বাৰা দালাল ষ্ট্ৰীট আৰু বিদেশী বিনিয়োগৰ ক্ষেত্ৰত ‘ধনাত্মক ধাৰা’ৰ সৃষ্টি হ’ব পাৰে।
কাকতলীয়াকৈ ক’বলৈ গ’লে ২০২৫ চনতো বিদেশী বিনিয়োগকাৰীয়ে বৃহৎ হাৰত প্ৰফিট বুকিং কৰিছিল। যোৱা বছৰ তেওঁলোকৰ মুঠ বিক্ৰী আছিল ১.৬ লাখ কোটি টকা। বিশেষজ্ঞসকলৰ দাবী যে এই বিক্ৰী মূলতঃ শ্বেয়াৰ বজাৰৰ এটা অংশত অতিৰিক্ত মূল্যৰ বাবেই হৈছিল।
