ধলপুৰ, শিলোসাঁকো, বৰবাৰী আদিৰ পিছত এইবাৰ উচ্ছেদ অভিযান আৰম্ভ হৈছে লোহাৰঘাটত।
সোমবাৰে বন বিভাগে কামৰূপ জিলাৰ মিৰ্জাৰ সমীপৰ লোহাৰঘাটত উচ্ছেদ অভিযান চলাই অঞ্চলটোত ঘৰ সাজি থকা কমেও ৭টা পৰিয়ালক উচ্ছেদ কৰে।
বন বিভাগৰ বিষয়াসকলে দাবী কৰে যে গাঁওবাসীয়ে বনভূমি বেদখল কৰিছে। ইয়াৰ বিপৰীতে গাঁওবাসীয়ে কয় যে তেওঁলোকে বহু বছৰ ধৰি তাত বসবাস আহিছে আৰু ইমান দিনে বন বিভাগে একো আপত্তি কৰা নাছিল।
জানিব পৰা মতে, উচ্ছেদ অভিযানৰ সময়ত বন বিভাগে গাঁওবাসীৰ বাসগৃহ ভাঙি পেলোৱাৰ উপৰিও তেওঁলোকে তাত ৰুই থোৱা নাৰিকল আৰু কলগছ সমূহো কাটি পেলায়।
এই উচ্ছেদৰ পিছতে বন বিভাগে হাৰাশাস্তি কৰা বুলি অভিযোগ কৰিছে গাঁওবাসীয়ে। লগতে গাঁওবাসীয়ে জনাইছে যে এই উচ্ছেদৰ পিছত বসবাস কৰিবৰ বাবে তেওঁলোকৰ আন কোনো ঠাই নাই।
এই অভিযোগ অস্বীকাৰ কৰি বন বিভাগে কেৱল বনাঞ্চল সুৰক্ষাৰ উচ্ছেদ চলাইছে বুলি দাবী কৰিছে।
বন বিভাগৰ এই মন্তব্যৰ বিপৰীতে গাঁৱৰ ৰাইজে কয় যে বন বিভাগে বন সুৰক্ষাৰ বাবে কাম কৰাৰ বাবে নহয়, নিৰীহ লোকক হাৰাশাস্তি কৰাৰ বাবেহে এই উচ্ছেদ অভিযান চলাইছে।
ইপিনে লোহাৰঘাটৰ এই উচ্ছেদ অভিযানৰ বিৰোধিতা কৰি গাঁওবাসীৰ লগতে স্থানীয় ৰাইজে প্ৰতিবাদ আৰম্ভ কৰিছে। চৰকাৰে হস্তক্ষেপ কৰি বন বিভাগৰ এই উচ্ছেদৰ পৰা গাঁওবাসীক ৰক্ষা কৰিবৰ বাবে তেওঁলোকে দাবী জনাইছে।
