দীৰ্ঘদিন ধৰি ভাৰতীয় ক্ৰিকেট দলৰ নেতৃত্ব দি আহিছে মহেন্দ্ৰ সিং ধোনীয়ে। এতিয়া তেওঁৰ কান্ধত নতুন দায়িত্ব। ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনীক আগন্তুক ঝাৰখণ্ড বিধানসভা নিৰ্বাচনৰ বেণ্ড এম্বেছাদৰ হিচাপে নিযুক্তি দিছে নিৰ্বাচন আয়োগে।
শুকুৰবাৰে এই কথা সদৰী কৰিছে ঝাৰখণ্ড ৰাজ্যৰ মুখ্য নিৰ্বাচনী বিষয়া কে ৰবিকুমাৰে।
শুকুৰবাৰে ৰান্সিত এখন সংবাদমেলযোগে কে ৰবিকুমাৰে কয়, “মহেন্দ্ৰ সিং ধোনীয়ে তেওঁৰ চেহেৰা নিৰ্বাচনৰ উদ্দেশ্যে ব্যৱহাৰ কৰিবলৈ নিৰ্বাচন আয়োগক অনুমতি দিছে। তেওঁ মানুহক ভোটদানৰ বাবে উৎসাহিত কৰিব। ভৱিষ্যতে এই প্ৰচাৰমূলক কাম কেনেকৈ আগুৱাই নিব পাৰি সেই সন্দৰ্ভত প্ৰাক্তন ভাৰতীয় ক্ৰিকেটাৰগৰাকীৰ সৈতে যোগাযোগ কৰা হৈছে”
অহা ১৩ আৰু ২০ নৱেম্বৰত ঝাৰখণ্ডত দুটা পৰ্যায়ত অনুষ্ঠিত হ’ব বিধানসভা নিৰ্বাচন। ২৩ নৱেম্বৰত ভোট গণনা কৰা হ’ব। ৪৩টা বিধানসভা সমষ্টিত অনুষ্ঠিত হ’ব প্ৰথম পৰ্যায়ৰ ভোটগ্ৰহণ। দ্বিতীয় পৰ্যায়ত ২০ নৱেম্বৰত ঝাৰখণ্ডৰ ৩৮টা বিধানসভা সমষ্টিত ভোটগ্ৰহণ হ’ব।
ইতিমধ্যে দুয়োটা শাসক বিৰোধী মিত্ৰজোঁটে নিৰ্বাচনৰ প্ৰথম ৰাউণ্ডৰ প্ৰাৰ্থী ঘোষণা কৰিছে। ২৩ অক্টোবৰত শাসকীয় ঝাৰখণ্ড মুক্তি মৰ্চাই ৩৫ জন প্ৰাৰ্থীৰ নাম ঘোষণা কৰিছিল। ইয়াৰ পূৰ্বে ১৯ অক্টোবৰত বিজেপিয়ে ৬৬টা সমষ্টিৰ প্ৰাৰ্থীৰ তালিকা ঘোষণা কৰিছিল।
