ল’কডাউনৰ ফলত বহি:ৰাজ্যত আবদ্ধ হৈ থকা যিসকল একেবাৰে দুৰ্দশাগ্ৰস্ত শ্ৰমিক বাচেৰে অসমলৈ ঘূৰি আহিব বিচাৰিছে সেইসকলৰ সহায় কৰিব বিচাৰি মহানুভৱতাৰ পৰিচয় দিছে প্ৰাক্তন মুখ্যমন্ত্রী তৰুণ গগৈয়ে৷
প্ৰাক্তন মুখ্যমন্ত্ৰীজনে পিতৃ-মাতৃৰ নামত থকা উষা-কমল গগৈ সোঁৱৰণী ট্ৰাষ্টৰ পৰা ৫ লাখ টকাৰ সাহায্য ঘোষণা কৰিছে৷
নৰ্থ ইষ্ট নাওলৈ প্ৰেৰণ কৰা এক ভিডিঅ’ গগৈয়ে কয়, “বিশ্বব্যাপ্তি ক’ৰ’না মহামাৰীৰ প্ৰভাৱ ভাৰতবৰ্ষতো ব্যাপক হাৰত পৰিছে। জীৱন নিৰ্বাহৰ কাৰণে অসমৰ পৰা হাজাৰ হাজাৰ লোকে ভাৰতৰ বিভিন্ন ঠাইত গৈ কাম কৰি আছিল।”
”কিন্তু বৰ্তমান ক’ৰ’নাৰ বিভীষিকাৰ আতংকময় পৰিৱেশত এই দুৰ্ভগীয়া লোকসকলে জীৱিকা হেৰুওৱাৰ পৰিপ্ৰেক্ষিতত তেওঁলোকক অসমলৈ ঘুৰাই অনাৰ বাবে অসম চৰকাৰে যথোপযুক্ত ব্যৱস্থা গ্ৰহণ কৰাৰ ক্ষেত্ৰত বিফল হৈছে।” প্ৰাক্তন মুখ্যমন্ত্ৰী তৰুণ গগৈৰ অভিযোগ।
দুদৰ্শাগ্ৰস্ত লোকৰ বিভিন্ন জনে মোক ব্যক্তিগতভাৱে তেওঁলোকক অসমলৈ ঘূৰাই আনিবলৈ সহায় কৰিবলৈ বিনম্ৰতাৰে অনুৰোধ কৰিছে বুলি কয় প্ৰাক্তন মুখ্যমন্ত্ৰী গগৈয়ে৷
আনহাতে গগৈয়ে কয়, “তেওঁলোকক অসমলৈ বাচেৰে ঘুৰি আহিবলৈ যি অৰ্থৰ প্ৰয়োজন হ’ব তাৰ বাবে মোৰ পিতৃ-মাতৃৰ নামত থকা উষা-কমল গগৈ সোঁৱৰণী ট্ৰাষ্টৰ পৰা পাঁচ লাখ টকা আগবঢ়াইছো।”
দূৰ্দশাগ্ৰস্ত শ্ৰমিকসকলক অসমলৈ আহিবৰ বাবে বাছৰ খৰচৰ বাবদ এই ধনৰাশি ব্যৱহাৰ কৰা হ’ব বুলি কয় গগৈয়ে৷
