দেশৰ অন্যতম বৃহৎ কৰ্পৰেট আৰু পৰিয়ালৰ উত্তৰাধিকাৰ যুঁজ এইবাৰ আদালতৰ বাহিৰত সমাধান হ’ব। ৰাণী কাপুৰ আৰু তেওঁৰ পৰিয়ালৰ সদস্যৰ মাজত ৩০ হাজাৰ কোটি টকাৰ সম্পত্তিৰ অধিকাৰৰ গোচৰত উচ্চতম ন্যায়ালয়ে হস্তক্ষেপ কৰিছে। দেশৰ উচ্চতম ন্যায়ালয়ৰ প্ৰাক্তন মুখ্য ন্যায়াধীশ ধনঞ্জয় যশৱন্ত চন্দ্ৰচুড়ক এই হাইপ্ৰফাইল বিবাদ নিষ্পত্তিৰ দায়িত্ব দিয়া হৈছে।
কিছুদিন পূৰ্বে দিল্লী উচ্চ ন্যায়ালয়ে ৰাণীৰ পুত্ৰ প্ৰয়াত উদ্যোগপতি সঞ্জয় কাপুৰৰ সকলো বিদেশী বেংক একাউণ্ট ফ্ৰীজ কৰাৰ নিৰ্দেশ দিছিল। সঞ্জয়ৰ তৃতীয় পক্ষৰ পত্নী প্ৰিয়া সচদেৱ কাপুৰৰ বিৰুদ্ধে কেইবাটাও অভিযোগ উত্থাপন কৰি আদালতৰ কাষ চাপিছিল দ্বিতীয় পক্ষৰ (পত্নী কৰিশ্মা কাপুৰ) উদ্যোগপতিগৰাকীৰ দুই সন্তান সামাইৰা আৰু কিয়ান ৰাজ কাপুৰে।
ৰাণী কাপুৰ আৰু তেওঁৰ পুত্ৰ সঞ্জয়ৰ প্ৰাক্তন আৰু বৰ্তমানৰ পত্নী আৰু সন্তানৰ মাজত বিশাল অটোমোবাইল যন্ত্ৰাংশ নিৰ্মাণ কোম্পানী ‘ছ’না কমষ্টাৰ’ৰ উত্তৰাধিকাৰক লৈ দীৰ্ঘদিনীয়া বিবাদ চলি আহিছে।
যিহেতু এই বিবাদৰ পৰিমাণ কম-বেছি পৰিমাণে ৩০ হাজাৰ কোটি টকা, সেয়েহে ই দেশৰ ব্যৱসায়িক মহলত চৰ্চাৰ কেন্দ্ৰবিন্দু হৈ আহিছে। উচ্চতম ন্যায়ালয়ত গোচৰটো অহাৰ পিছত ন্যায়াধীশসকলে অনুভৱ কৰিছে যে দীৰ্ঘদিনীয়া আইনী যুদ্ধতকৈ মধ্যস্থতাৰ জৰিয়তে এই গোচৰটো সমাধান কৰাটো অধিক ফলপ্ৰসূ হ’ব।
প্ৰাক্তন মুখ্য ন্যায়াধীশ ডি ৱাই চন্দ্ৰচুড় নিৰপেক্ষ বিচাৰ আৰু জটিল আইনী জটিলতাসমূহ উন্মোচন কৰাৰ বাবে পৰিচিত। তেওঁৰ দীৰ্ঘদিনীয়া অভিজ্ঞতাৰ ওপৰত নিৰ্ভৰ কৰি উচ্চতম ন্যায়ালয়ে তেওঁক এই স্পৰ্শকাতৰ পাৰিবাৰিক আৰু ব্যৱসায়িক বিবাদৰ মধ্যস্থতাকাৰী হিচাপে বাছি লৈছে। তেওঁৰ মূল লক্ষ্য হ’ব দুয়োপক্ষৰ দাবী শুনি সৰ্বসন্মতিক্ৰমে সমাধানত উপনীত হোৱা।
বজাৰ বিশেষজ্ঞসকলৰ মতে, ইমান ডাঙৰ কৰ্পৰেট পৰিয়ালত উত্তৰাধিকাৰ সম্পৰ্কে অনিশ্চয়তাই সংশ্লিষ্ট কোম্পানীসমূহৰ বিনিয়োগকাৰীসকলৰ মাজত উদ্বিগ্নতাৰ সৃষ্টি কৰে। ইয়াৰ প্ৰভাৱ ‘ছ’না কমষ্টাৰ’ৰ দৰে কোম্পানীৰ শ্বেয়াৰৰ মূল্যতো দেখা গৈছে। আদালতে নিৰ্দেশ দিয়া এই মধ্যস্থতাৰ ক্ষিপ্ৰ সমাধানে ব্যৱসায়িক স্থিতিশীলতা পুনৰুদ্ধাৰ কৰাত সহায় কৰিব।
