ভাৰতীয় খাদ্য নিগমৰ প্ৰাক্তন জেনেৰেল মেনেজাৰ ৰাজা শেখৰক বুধবাৰে গ্ৰেপ্তাৰ কৰা হৈছে। ভাৰতীয় খাদ্য নিগমৰ প্ৰায় ৫ কোটি টকা মূল্যৰ চাউল চুৰি কাণ্ডত জড়িত থকাৰ অভিযোগত এফচিআইৰ প্ৰাক্তন বিষয়াগৰাকীক গ্ৰেপ্তাৰ কৰা হৈছে।
উল্লেখ্য যে ২০১৩-১৪ বৰ্ষত ৰাজা শেখৰে ভাৰতীয় খাদ্য নিগমৰ গুৱাহাটীৰ জেনেৰেল মেনেজাৰৰ হিচাপে কাৰ্যনিৰ্বাহ কৰি থকা সময়ত নিগমৰ ১১১ খন ট্ৰাকৰ পৰা প্ৰায় ৫ কোটি টকাৰ মূল্যৰ চাউল চুৰি হৈছিল।
এই চাউল চুৰি কাণ্ডৰ তদন্তৰ দায়িত্ব থকা ব্যু অৱ ইন্টেষ্টিগেশ্যন(অৰ্থৈনিক অপৰাধ)এ চুৰি কাণ্ডৰ মূল অভিযুক্ত ৰাজা শেখৰক বুধবাৰে কামৰূপ সত্ৰ আদালতত হাজিৰ কৰোৱায়।
আদালতে শুনানি গ্ৰহণ কৰি ভাৰতীয় খাদ্য নিগমৰ ২০২০ বৰ্ষত অৱসৰ গ্ৰহণ কৰা এফচিআইৰ প্ৰাক্তন বিষয়াগৰাকীক ন্যায়িক জিম্মালৈ প্ৰেৰণ কৰে।
স্মৰ্তব্য যে ইয়াৰ পূৰ্বে ভাৰতীয় খাদ্য নিগমৰ প্ৰাক্তন জেনেৰেল মেনেজাৰ আৰু ভাৰতীয় ৰে’ল সেৱাৰ বিষয়া লখেশ্বৰ শইকীয়াক উক্ত চুৰি কাণ্ডৰ সৈতে জড়িত থকাৰ অভিযোগত গ্ৰেপ্তাৰ কৰা হৈছিল।
ইফালে ভাৰতীয় খাদ্য নিগমৰ শ্বিলঙৰ অন্য এগৰাকী প্ৰাক্তন জেনেৰেল মেনেজাৰ তথা ভাৰতীয় ৰে’ল সেৱাৰ বিষয়া ভাস্কৰ শইকীয়া আৰু গুৱাহাটীৰ এফচিআইৰ প্ৰাক্তন জেনেৰল মেনেজাৰ দেবানন্দৰ বিৰুদ্ধেও ধান ক্ৰয়ত অনিয়ম সংঘটিত কৰাৰ অভিযোগ উত্থাপন হৈছিল। ইয়াৰ পিছতে দেবানন্দক এফচিআই কৰ্তৃপক্ষই জেনেৰেল মেনেজাৰৰ পৰা ডিজিএমলৈ শাস্তিমূলকভাৱে পদাৱনতি কৰিছিল।
আনহাতে চাউল চুৰি এই ঘটনাৰ সন্দৰ্ভত আৰকেকে এন্টাৰপ্ৰাইজৰ ১০১ খন ট্ৰাক আৰু 4A এন্টাৰপ্ৰাইজৰ ১০ খন এফচিআইৰ চাউল ভৰ্তি নিৰুদ্দেশ হোৱাৰ বাবে অসম আৰক্ষীত ক্ৰমে বিআইঅ’ কেচ নং ১১/২০১৮ আৰু বিআইঅ’ কেচ নং ৮/২০১৮ দুটা গোচৰ ৰুজু কৰা হৈছিল। উক্ত দুই গোচৰৰ ভিত্তিতে এই সমগ্ৰ চাউল চুৰি কাণ্ডটোৰ তদন্ত প্ৰক্ৰিয়া অব্যাহত আছে।
বিশেষ সূত্ৰৰ পৰা নৰ্থ নাওৰ হাতত পৰা তথ্য অনুসৰি উক্ত বৰ্ষটোত নগাঁৱৰ গোদামৰ পৰা অৰুণাচল প্ৰদেশৰ চেপালৈ প্ৰেৰণ কৰা চাউল ভৰ্তি ট্ৰাক অন্তৰ্ধান হোৱাৰ ফলত এফচিআই-এ ২.৩৬ কোটি টকা লোকচানৰ সন্মুখীন হৈছিল।
সূত্ৰটোৰ মতে এফচিআই-এ বিষয়া-কৰ্মচাৰীৰ পৰা ৮৮ লাখ আৰু ঠিকাদাৰসকলৰ পৰা ৯৭ লাখ টকা সংগ্ৰহ কৰি উক্ত ঘাটি পূৰণৰ চেষ্টা কৰিছিল।
ইফালে সূত্ৰটোৱে কয় যে আদালতে মেচাৰ্চ 4A এন্টাৰপ্ৰাইজ আৰু মেচাৰ্চ আৰকেকে এন্টাৰপ্ৰাইজৰ স্বতাধিকাৰী অৰুণ কুমাৰ ৰায়ৰ মালিকাধীন সম্পত্তিৰ পৰা এফচিআইৰ চাউল চুৰি ফলত হোৱা লোকচানৰ ঘাটি পূৰণৰ নিৰ্দেশ দিছে।