পশ্চিম জাপানৰ নাৰা চহৰত ভাষণ দি থকাৰ সময়তে জাপানৰ প্ৰাক্তন প্ৰধানমন্ত্ৰী ছিনজো এবেৰ ওপৰত চলিল ভয়ংকৰ আক্ৰমণ৷
এই আক্ৰমণত প্ৰাক্ন প্ৰধানমন্ত্ৰীগৰাকীৰ মৃত্যু ঘটা বুলি বিভিন্ন সূত্ৰই প্ৰকাশ কৰিছে যদিও এতিয়ালৈকে জাপান চৰকাৰৰ তৰফৰ পৰা কোনো ধৰণৰ বিবৃতি প্ৰকাশ কৰা হোৱা নাই৷
জানিব পৰা মতে নাৰা চহৰত ভাষণ দি থকাৰ সময়তে দুৰ্বৃত্তই এবেক লক্ষ্য কৰি গুলীচালনা কৰে৷ ফলত থিতাতে ঢলি পৰে এবে৷
জাপানৰ এনএইচকে ৱৰ্ল্ড নিউজৰ বাতৰি অনুসৰি এবেৰ বুকুত গুলী লগা বুলি সন্দেহ কৰা হৈছে আৰু তেওঁৰ প্ৰচুৰ ৰক্তক্ষৰণ হোৱা দেখা গৈছে।
সংকটজনক অৱস্থাত ছিনজো এবেক চিকিৎসালয়লৈ লৈ যোৱা হৈছে।
আৰক্ষীয়ে ঘটনা সন্দৰ্ভত এজন লোকক লোকক আটক কৰিছে৷ এবে জীয়াই আছে নে নাই তাকে লৈ এতিয়া জাপানবাসীৰ মাজত তীব্ৰ উৎকণ্ঠাৰ সৃষ্টি হোৱা পৰিলক্ষিত হৈছে৷
১৯৫৪ চনৰ ২১ ছেপ্টেম্বৰত জন্মগ্ৰহণ কৰা এবে ২০০৬ চনৰ পৰা ২০০৭ চনলৈ আৰু তাৰ পিছতো ২০১২ চনৰ পৰা ২০২০ চনলৈ তেওঁ জাপানৰ প্ৰধানমন্ত্ৰী আছিল৷ তেওঁ লিবাৰেল ডেমক্ৰেটিক পাৰ্টিৰ (এলডিপি) সভাপতিও আছিল।
জাপানৰ ইতিহাসত আটাইতকৈ দীঘলীয়া সময় কাৰ্যনিৰ্বাহ কৰা প্ৰধানমন্ত্ৰী আছিল এবে । এবে ২০০৫ চনৰ পৰা ২০০৬ চনলৈ জুনিচিৰো কইজুমিৰ অধীনত মুখ্য কেবিনেট সচিব হিচাপেও কাৰ্যনিৰ্বাহ কৰিছিল আৰু ২০১২ চনত বিৰোধী দলৰ নেতা আছিল।
