অমিতাভ বচ্চনৰ কুইজ ভিত্তিক ৰিয়েলিটি শ্ব’ ‘কৌন বনেগা কোটিপতি’ত বহু লোকে লাখ লাখ টকা লাভ কৰিছে যদিও এই শ্ব’ৰ বিজয়ী অমিতা সিং টোমৰ নামৰ এগৰাকী মহিলাৰ নাম আহিছে কোটি কোটি টকাৰ কেলেংকাৰীত।
অমিতা সিং টোমৰ মধ্যপ্ৰদেশৰ শ্বেওপুৰ জিলাৰ বৰোদা তহচিলদাৰ আৰু তেওঁৰ তত্বাৱধানত তাত এক বৃহৎ কেলেংকাৰী সংঘটিত হৈছে। ইয়াত ভুক্তভোগীৰ বাবে আৱণ্টিত সাহায্য পুঁজিত বৃহৎ কেলেংকাৰী সংঘটিত হৈছে। এই কেলেংকাৰীৰ পৰিমাণ ২.৫ কোটি, তাৰ পিছত অমিতা সিং টোমৰক গ্ৰেপ্তাৰ কৰা হৈছে।
খবৰ অনুসৰি ২০২১ চনত শ্বেওপুৰ জিলাত বানাক্ৰান্তৰ মাজত সাহায্য পুঁজি বিতৰণ কৰা হৈছিল। তদানীন্তন তহচিলদাৰ অমিতা সিং টোমৰে প্ৰায় ২৫জন পাটোৱাৰী আৰু ১০০ৰো অধিক দালালৰ সৈতে গোপন বুজাবুজিৰে ১২৭টা ভুৱা একাউণ্টত ২.৫৭ কোটি টকা বিতৰণ কৰাৰ অভিযোগ উত্থাপন হৈছে।
এই অনিয়ম পোহৰলৈ আহে যেতিয়া ডেপুটি-কালেক্টৰে এক অডিট চলাইছিল। এই ঘটনাৰ পিছত তাৎক্ষণিক ব্যৱস্থা গ্ৰহণ কৰি বৰোদা থানাত এফআইআৰ দাখিল কৰা হয়। তদন্তত প্ৰকাশ পাইছে যে বানাক্ৰান্তক দিয়াৰ নামত আত্মীয়-স্বজন আৰু চিনাকি লোকৰ মাজত এই সাহায্য পুঁজি বিতৰণ কৰা হৈছে। এই কেলেংকাৰীত অমিতা সিং টোমৰৰ উপৰিও তহচিল কার্যালয়ৰ কর্মচাৰী আৰু দালালৰ নামো পোহৰলৈ আহে৷
উল্লেখযোগ্য যে অমিতা সিং টোমৰে গ্ৰেপ্তাৰৰ পৰা হাত সাৰিবলৈ কেইবাবাৰো চেষ্টা কৰিছে। তেওঁ প্ৰথমে উচ্চ ন্যায়ালয়ৰ কাষ চাপিছিল, য’ত তেওঁৰ জামিন আবেদন নাকচ কৰা হৈছিল। তাৰ পিছত উচ্চতম ন্যায়ালয়ত জামিনৰ বাবে বিশেষ আবেদন (এছ এল পি) দাখিল কৰে যদিও সেই আবেদনো নাকচ কৰা হয়। এতিয়া তেওঁ জেলত আছে আৰু অনাগত দিনত এই গোচৰৰ তদন্তৰ লগত আৰু অধিক বিষয়া জড়িত হ’ব পাৰে বুলি দাবী কৰা হৈছে।
ৰাজনৈতিক পদত থকাৰ বাবেই অমিতা সিং টোমৰো চৰ্চালৈ আহে। ২০২৪ চনৰ আগষ্ট মাহত তেওঁ প্ৰিয়ংকা গান্ধীৰ বিষয়ে এটা পোষ্ট কৰিছিল, য’ত তেওঁ লিখিছিল যে প্ৰিয়ংকাই মুখ ঢাকি মদ্যপান কৰে। এই পোষ্টটোৱে যেতিয়া বিতৰ্কৰ সৃষ্টি কৰিছিল তেতিয়া তেওঁ দাবী কৰিছিল যে তেওঁৰ আইডি হেক কৰা হৈছে। অমিতা সিং টোমৰে ৰাহুল গান্ধীকলৈও মন্তব্য কৰে।
২০১১ চনত প্ৰথমবাৰৰ বাবে চৰ্চালৈ আহিছিল অমিতা সিং টোমৰ।কেবিচিৰ ৫ম ছিজনত অংশগ্ৰহণ কৰি ৫০ লাখ টকা লাভ কৰিছিল। ইয়াৰ পিছত মধ্যপ্ৰদেশত আলোচনাৰ কেন্দ্ৰলৈ আহিল অমিতা সিং টোমৰ। ছ’চিয়েল মিডিয়াত তেওঁ যথেষ্ট সক্ৰিয়।
২০০৩ চনত চৰকাৰী সেৱাত যোগদান কৰা অমিতা সিং টোমৰে প্ৰথমে নাইব তহচিলদাৰ হিচাপে নিৰ্বাচিত হয়। ২০১১ চনত তহচিলদাৰৰ পদত পদোন্নতি লাভ কৰি তহচিলদাৰ হোৱাৰ পিছৰে পৰা ১৪ বছৰত ২৫ বাৰ বদলি হৈছে। শেহতীয়াকৈ বদলি হোৱাৰ পিছত তেওঁ প্ৰধানমন্ত্ৰী মোডী আৰু শিৱৰাজ সিং চৌহানলৈ এখন পত্ৰ লিখিছিল।
