আমেৰিকাৰ ৰাষ্ট্ৰপতি নিৰ্বাচনৰ বাবে আৰু বেছিদিন নাই। নিৰ্বাচনী প্ৰচাৰৰ যুঁজত ৰিপাব্লিকান পাৰ্টিৰ প্ৰাৰ্থী ডোনাল্ড ট্ৰাম্প আৰু ডেম’ক্ৰেট প্ৰাৰ্থী জো বিডেনৰ শিৱিৰৰ মাজত প্ৰস্তুতি তুংগত উঠিছে।
ইয়াৰ মাজতে ডোনাল্ড ট্ৰাম্পৰ বিৰুদ্ধে এটাৰ পাছত আন এটা কেলেংকাৰিৰ অভিযোগে ৰিপাব্লিকান শিৱিৰক বিমোৰত পেলাইছে।
এইবাৰ ডোনাল্ড ট্ৰাম্পৰ বিৰুদ্ধে যৌন নিৰ্যাতনৰ অভিযোগ আনিছে এগৰাকী প্ৰাক্তন মডেল এমি ডৰিছে।
এমিয়ে অভিযোগ কৰিছে যে ১৯৯৭চনত ডোনাল্ড ট্ৰাম্পে তেওঁক যৌননিৰ্যাতন চলাইছিল। তেতিয়া তেওঁৰ বয়স আছিল ২৪ বছৰ।
‘দ্য গাৰ্ডিয়ান’ক দিয়া এক সাক্ষাৎকাৰত এমিয়ে প্ৰকাশ কৰিছে কিছু চাঞ্চল্যকৰ তথ্য। তেওঁ কয় যে ১৯৯৭চনৰ ৫ ছেপ্টেম্বৰত ইউ এছ অ’পেনৰ টুৰ্ণামেন্ট চলি থকা সময়ত ভি আই পি বক্সৰ বাথৰুমৰ সন্মুখত ট্ৰাম্পে তেওঁক সাৱটি ধৰিছিল।
এমিয়ে কয়,’’তেওঁ মোক জোৰকৈ সাৱটি ধৰে। তাৰপাছত মোক চুমা খোৱাৰ চেষ্টা কৰে। মোৰ নিতম্ব, বুকু সকলোতে ট্ৰাম্পে স্পৰ্শ কৰি গৈছিল। ইমান শক্তিশালীভাৱে তেওঁ স্পৰ্শ কৰিছিল যে মই হাজাৰ চেষ্টা কৰিও এৰাব পৰা নাছিলো।‘’
ইপিনে, নিজৰ অধিবক্তাৰ জৰিয়তে এই অভিযোগ খণ্ডন কৰিছে ডোনাল্ড ট্রাম্পে।
ডোনাল্ড ট্ৰাম্পৰ বিৰুদ্ধে অৱশ্যে এয়াই প্ৰথম এনে অভিযোগ উত্থাপিত হোৱা নাই। বিভিন্ন মডেল তথা পৰ্ণষ্টাৰে বিভিন্ন সময়ত ট্ৰাম্পৰ বিৰুদ্ধে মুখ খুলিছে।
বিগত নিৰ্বাচনৰ সময়তো ট্ৰাম্পৰ বিৰুদ্ধে মুখ খুলিছিল পৰ্ণষ্টাৰ ষ্ট’ৰ্মি ডেনিয়েলছে। তেওঁ ২০০৬ৰ পৰা ২০০৭লৈকে ট্ৰাম্পৰ সৈতে সম্পৰ্ক থকাৰ কথা সদৰী কৰিছিল।
তাপ পাছত আন এগৰাকী পৰ্ণষ্টাৰ জেছিকা ড্ৰেকে তিনি বছৰমান পূৰ্বে সংবাদ মেল পাতি কৈছিল যে কেলিফ’ৰ্ণিয়াৰ লেক টাহোত এখন গল্ফ টুৰ্ণামেন্ট চলি থকাৰ সময়ত ট্ৰাম্পে তেওঁৰ কেইগৰাকীমান বান্ধৱীক নিজৰ চুইটলৈ আমন্ত্ৰণ জনাইছিল।
জেছিকাই প্ৰকাশ কৰা মতে, তাত ট্ৰাম্পে তেওঁৰ লগতে আৰু আন দুগৰাকীক ইচ্ছাৰ বিৰুদ্ধে সাৱটি ধৰি চুম্বন কৰিছিল।
সেইদৰে, যোৱা বছৰো এগৰাকী মহিলা সাংবাদিকে ট্ৰাম্পৰ বিৰুদ্ধে যৌন নিৰ্যাতনৰ অভিযোগ আনিছিল। প্ৰায় দুই দশক পূৰ্বে ট্ৰাম্পৰ যৌন নিৰ্যাতনৰ বলি হোৱা বুলি সাংবাদিক গৰাকীয়ে অভিযোগ কৰিছিল।