অসমৰ পৰা সুদীৰ্ঘ দিন ধৰি ৰাজ্যসভাৰ সাংসদ হিচাপে মনোনীত হোৱা ভাৰতৰ প্ৰাক্তন প্ৰধান মন্ত্ৰী ড০ মনমোহন সিঙৰ কাৰ্য্যকাল ১৪ জুনত সামৰণি পৰিব। প্ৰাক্তন প্ৰধান মন্ত্ৰী গৰাকীৰ এইবাৰ অসমৰ পৰা পুনৰ নিৰ্বাচিত হোৱাৰ সম্ভাৱনা কম হৈ পৰিছে।
বৰ্তমান অসমৰ দুজন ৰাজ্যসভাৰ সাংসদ ড০ মনমোহন সিং আৰু শান্তিয়াছ কুজুৰৰ কাৰ্য্যকাল অহা ১৪ জুনত সমাপ্ত হ’ব।
অসমত তৃতীয় পৰ্য্যায়ত অনুষ্ঠিত হোৱা লোকসভা নিৰ্বাচনৰ ভোটগ্ৰহণ সমাপ্ত হোৱাৰ পাছত এতিয়া ৰাজ্যখনৰ ৰাজনৈতিক দল সমূহে অহা মাহত খালী হ’বলগীয়া ৰাজ্যসভাৰ আসন দুখনক লৈ ৰাজনৈতিক সমীকৰণ আৰম্ভ কৰিছে।
‘এতিয়ালৈ কোনোধৰণৰ সিদ্ধান্ত গ্ৰহণ কৰা হোৱা নাই, কিন্তু ৰাজ্যসভাত আমাৰ প্ৰাৰ্থীক বিজয়ী কৰাব পৰাকৈ আমাৰ প্ৰয়োজনীয় বিধায়কৰ সংখ্যা নাই। তথাপি আমি এই সন্দৰ্ভত কাম কৰি আছো, ৰাজ্যসভাৰ খালী হ’বলগীয়া দুখন আসনৰ বাবে আমি সম্ভৱত এজন প্ৰাৰ্থীহে দিম’ কংগ্ৰেছৰ এজন জেষ্ঠ নেতাই এনেদৰে মন্তব্য কৰে।
উল্লেখযোগ্য যে, বৰ্তমান অসম বিধান সভাৰ ১২৬ খন আসনৰ ভিতৰত বিজেপিয়ে ৬১ খন, অগপই ১৪ খন আৰু বিপিএফে ১২ খন আসন দখল কৰি আছে।গতিকে বিজেপি মিত্ৰজোটৰ আগত কংগ্ৰেছৰ প্ৰাৰ্থী বিজয়ী হোৱাৰ সম্ভাৱনা যথেষ্ট কম।
আনহাতে, মুখ্য বিৰোধী দল কংগ্ৰেছে ২৫ খন আৰু এ আই য়ু ডি এফে ১৩ খন আসন দখল কৰি আছে।
অসমৰ পৰা ৰাজ্যসভাক প্ৰতিনিধিত্ব কৰা ড০ মনমোহন সিঙে ১৯৯১ চনত প্ৰথম বাৰৰ বাবে অসমৰ পৰা ৰাজ্যসভালৈ নিৰ্বাচিত হৈছিল। ২০১৩ চনৰ ৩০ মে’ত ক্ৰমাগত পঞ্চমবাৰৰ বাবে তেওঁ ৰাজ্যসভালৈ নিৰ্বাচিত হয়।
অসমৰ প্ৰাক্তন মুখ্য মন্ত্ৰী হিতেশ্বৰ শইকীয়াই ড০ সিঙক প্ৰথম বাৰৰ বাবে অসমৰ পৰা ৰাজ্যসভালৈ নিৰ্বাচিত হোৱাৰ বাবে সুযোগ প্ৰদান কৰিছিল আৰু মনমোহন সিঙ ৰাজ্যসভালৈ নিৰ্বাচিত হৈ বিত্ত মন্ত্ৰী হিচাপে কাৰ্য্যনিৰ্বাহ কৰিছিল।
