পুত্ৰৰ লগত বিবাদৰ পিছত ভাড়াঘৰত থাকিব লগা হৈছিল। শেষ বয়সত সন্তানৰ প্ৰতি অগাধ বিশ্বাসৰ মূল্য তেওঁ দিব লগা হৈছিল। বহু ঠাইত তেওঁ অনুশোচনা কৰিছিল। ৰেমণ্ড গ্ৰুপৰ প্ৰাক্তন অধ্যক্ষ উদ্যোগপতি বিজয়পত সিংহানিয়াই শনিবাৰে মুম্বাইস্থিত নিজ বাসগৃহত শেষ নিশ্বাস ত্যাগ কৰে। তেওঁৰ বয়স আছিল ৮৭ বছৰ। তেওঁৰ পুত্ৰ গৌতম সিংহানিয়াই এক্সত এটা চুটি বাৰ্তাযোগে তেওঁৰ মৃত্যুৰ কথা ঘোষণা কৰে।
সংস্থাটোৰ মুখপাত্ৰই প্ৰকাশ কৰা অনুসৰি পদ্ম ভূষণ এয়াৰ কমোডৰ ড° বিজয়পত সিংহানিয়াৰ শান্তিপূৰ্ণ দেহাৱসান ঘটিছে। দেওবাৰে দিনৰ ১.৩০ বজাত ৰূপৰেল মাৰ্গৰ হাভেলীত অন্তিম শ্ৰদ্ধা জনোৱা হ’ব, তাৰ পিছত বিয়লি ৩ বজাত চন্দনৱাড়ীত শেষকৃত্য সম্পন্ন কৰা হ’ব।
উদ্যোগ জগতলৈ বিজয়পত সিংহনিয়াৰ অৱদান অনস্বীকাৰ্য। ১৯৮০ চনৰ পৰা ২০০০ চনলৈকে ৰেমণ্ড গ্ৰুপৰ অধ্যক্ষ আৰু পৰিচালন সঞ্চালক হিচাপে তেওঁৰ নেতৃত্বত কোম্পানীটোৱে দেশ-বিদেশৰ বস্ত্ৰ আৰু পোছাক উদ্যোগত শক্তিশালী স্থান দখল কৰিছিল। ‘ৰেমণ্ড’ সেই সময়ত ভাৰতীয় মধ্যবিত্ত শ্ৰেণীৰ মাজত এক বিশ্বাসযোগ্য ব্ৰেণ্ডত পৰিণত হৈছিল।
কিন্তু সফলতাৰ সমান্তৰালকৈ পাৰিবাৰিক বিবাদে তেওঁৰ জীৱনৰ গতি সলাই দিয়ে। ২০১৫ চনত তেওঁৰ ৩৭ শতাংশ শ্বেয়াৰ পুত্ৰ গৌতমৰ হাতত গতাই দিয়ে। আন এজন পুত্ৰ মধুপতি সিংহনিয়া ছিংগাপুৰলৈ গুচি যায়। পিছলৈ সম্পৰ্কৰ অৱনতি আৰু আইনী বিবাদৰ বাবে ব্যক্তিগত জীৱনত কঠিন সময়ৰ সন্মুখীন হ’বলগীয়া হৈছিল। এটা সাক্ষাৎকাৰত তেওঁ অনুশোচনা কৰিছিল যে তেওঁ অগাধ বিশ্বাসৰ মূল্য দিবলগীয়া হৈছে— কেৱল ধন-সম্পত্তিয়েই নহয়, শান্তি আৰু পৰিয়ালো হেৰুৱাইছে।
কেৱল ব্যৱসায়েই নহয়, জে আৰ ডি টাটাৰ প্ৰেৰণাত তেওঁ এসময়ত বিমান অনুশীলনৰ প্ৰতি আগ্ৰহী হৈ পৰিছিল। ২০০৫ চনত তেওঁ গৰম বতাহৰ বেলুনত ২১ হাজাৰ মিটাৰতকৈও অধিক উচ্চতাত উৰা মাৰি বিশ্ব অভিলেখ গঢ়িছিল। আন্তঃৰাষ্ট্ৰীয় এয়াৰ ৰেচতো তেওঁ সফলতা লাভ কৰিছে। ১৯৯৪ চনত ভাৰতীয় বায়ুসেনাই তেওঁক এয়াৰ কমোডৰৰ সন্মানীয় উপাধি প্ৰদান কৰে।
সফলতাৰ শিখৰৰ পৰা জীৱনৰ কঠিনতম বাস্তৱ- বিজয়পত সিংহানিয়াই দুয়োটাই দেখিছে। সেইবাবেই শেষত নিজকে ‘যোদ্ধা’ বুলি গণ্য কৰিছিল। তেওঁৰ ভাষাত কোনো বিজনেছ স্কুলে জীৱনৰ এই পাঠ শিকাব নোৱাৰে। ভাৰতীয় উদ্যোগলৈ তেওঁৰ অৱদান আৰু ব্যক্তিগত সংগ্ৰাম দুয়োটাই স্মৰণীয় হৈ থাকিব।
