নতুন বছৰৰ পহিলা দিনটোতে নৱ প্ৰজন্মক আলফাত যোগদান নকৰিবলৈ আহ্বান জনাইছে আলোচনাপন্থী আলফা নেতা অনুপ চেতিয়াই।
নাগৰিকত্ব (সংশোধনী) আইন ২০১৯ ৰ বাতিলৰ দাবীৰে গুৱাহাটীৰ ৰ’টেৰী ক্লাৱত সদৌ অসম আইন ছাত্ৰ সন্থাৰ কামৰূপ জিলা শাখাৰ উদ্যোগত অনুষ্ঠিত ‘নাগৰিক সমাজৰ সৈতে অৱস্থান ধৰ্মঘট’ কাৰ্য্যসূচীত অংশগ্ৰহণ কৰি এই আহ্বান জনাই চেতিয়াই।
”প্ৰচাৰ মাধ্যমৰ জৰিয়তে গম পাইছো বৰডুমছা অঞ্চলৰ পৰা নৱম শ্ৰেণীত পঢ়ি থকা ৬ জন ছাত্ৰ হাবিলৈ যোৱাৰ বাবে প্ৰস্তুতি চলাই গ্ৰেপ্তাৰ হৈছিল। মই এটা সময়ত সশস্ত্ৰ পন্থীত আছিলো যদিও এতিয়া গণতান্ত্ৰিক ধাৰালৈ ঘুৰি আহিছো। গতিকে মই নৱ প্ৰজন্মক বিশেষভাৱে অনুৰোধ কৰিছো যাতে তেওঁলোক আৱেগৰ বশৱৰ্তী হৈ কঠিন সিদ্ধান্ত গ্ৰহণ কৰি যিটো আমি এৰি থৈ আহিলো সেই পথৰ যাত্ৰী নহয়,’’ প্ৰাক্তন আলফা নেতা গৰাকীয়ে ভাষণ প্ৰসংগত এইদৰে কয়।
ইপিনে, সশস্ত্ৰ পন্থাৰ বিপৰীতে গণতান্ত্ৰিক মাধ্যমেৰে নিজৰ দাবীসমূহ আদায় কৰিবলৈ নৱপ্ৰজন্মক আহ্বান জনাই চেতিয়াই।
‘‘আমি সশস্ত্ৰ পন্থাৰ পৰা ঘুৰি আহি পুনৰ গণতান্ত্ৰিক ধাৰা লৈছো। গণতান্ত্ৰিক ধাৰাৰে যাতে আমি আদায় কৰিব পাৰো সেই ব্যৱস্থাটো গঢ়ি তুলিব লাগিব। আমি উপলব্ধি কৰিছো প্ৰথমে আমাৰ মাজত ঐক্য লাগিব,’’ চেতিয়াৰ মন্তব্য।
আনহাতে, ভাষণ প্ৰসংগতে তেওঁ আলফাত যোগদানৰ আঁৰৰ কাহিনীও কাখ্যা কৰে।
‘‘১৯৭৯ চনত অসম আন্দোলনত একান্তভাৱে জৰিত হৈ পৰিছিলো।১৯৮৩ চনৰ নিৰ্বাচনত যেতিয়া হিতেশ্বৰ শইকীয়া নেতৃত্বাধীন কংগ্ৰেছৰ চৰকাৰ শাসনলৈ আহিছিল। ১৯৫১ চনটো মানি লৈ ভাৰত চৰকাৰে চুক্তি স্বাক্ষৰ কৰিব বুলি দেহে কেহে খাটিছিলো কিন্তু ভাৰত চৰকাৰে আমাৰ গণতান্ত্ৰিক দাবীৰ প্ৰতি কোনো গুৰুত্ব নিদিয়াত আমি বাৰ্মালৈ যোৱাৰ ৰাস্তা বিচাৰি আছিলো। ১৯৮৩ চনৰ ফেব্ৰুৱাৰী মাহত নিৰ্বাচন অনুষ্ঠিত হৈছিল আৰু ২১ মে’ৰ দিনা মই বৰ্মাত গৈ উপস্থিত হৈছিলো,’’ চেতিয়াই কয়।
ইপিনে, আজিৰ এই পৰিস্থিতিৰ সৈতে ১৯৮৩ চনৰ পৰিস্থিতিৰো মিল থকা বুলি দাবী কৰে অনুপ চেতিয়াই।
চেতিয়াই কয় ‘‘আজি যিটো পৰিস্থিতি সৃষ্টি হৈছে সেই একেই পৰিস্থিতি সেই সময়তো সৃষ্টি হৈছিল। আজি যিদৰে অস্তিত্ব ৰক্ষাৰ বাবে আপোনালোকে খাতিছে আমিও তেতিয়া তেনেদৰে অসম আন্দোলনত দেহে কেহে খাতিছিলো কিন্তু গণতন্ত্ৰৰ প্ৰতি আস্থা আৰু বিশ্বাস নোহোৱাৰ ফলতেই আমি হাবিলৈ যাবলৈ বাধ্য হৈছিলো। সেইটোৱে অন্তিম পথ আছিল আৰু সেই পথৰে যাত্ৰী হ’ব লাগিব বুলি ভাবিছিলো। এই পথৰ বাহিৰে খিলঞ্জীয়াক ৰক্ষা কৰাৰ উপায় নাই এই কথা উপলব্ধি কৰিয়েই হাবিলৈ গৈছিলো।’’
‘‘বহুতে আমি অসমখন ধ্বংসৰ দিশলৈ লৈ গ’লো বুলি সমালোচনা কৰে কিন্তু আমিও বহু খিলঞ্জীয়া লোকক হেৰুৱালগীয়া হৈছিল। কলমে লিখিলে সংশোধন কৰিব পৰা যায়, অস্ত্ৰৰ পৰা গুলিটো ওলাই গ’লে সংশোধন কৰাৰ কোনো উপায় নাথাকে। সেই সময়ত আমাৰ কিছু ভুল-ভ্ৰান্তি হৈছিল। সেই একেই পৰিস্থিতি এই সময়তো হৈছে,’’ তেওঁ লগতে কয়।
তাৰোপৰি, ৰাষ্ট্ৰযন্ত্ৰৰ বিভাজনকামী ষড়যন্ত্ৰৰ চক্ৰান্তৰ ফলত সংগ্ৰামত বিভাজনকামী মানসিকতা এটা গা কৰি উঠিছে বুলি মন্তব্য কৰি চেতিয়াই জাতিৰ অস্তিত্ব ৰক্ষাৰ স্বাৰ্থত ছাত্ৰ সমাজক ঐক্যবদ্ধ হৈ থাকিবলৈ আহ্বান জনায়।
