প্ৰাকৃতিক দুৰ্যোগৰ বাবে অৰুণাচল প্ৰদেশত সংঘটিত হৈছে এক বৃহৎ বিপৰ্যয়। দিবাং উপত্যকা জিলাত আকস্মিক বানে উটুৱাই লৈ যায় এটা সেনা শিবিৰৰ দুটা আশ্ৰয় স্থলী। এই ঘটনাত সন্ধানহীন হৈছে ৫ সেনা জোৱান। শুকুৰবাৰে বিয়লি সংঘটিত হয় এই ঘটনা। শনিবাৰেও সন্ধানহীন জোৱানকেইজনক বিচাৰি তীব্ৰ অভিযান চলোৱা হয়।
ৰাজ্যিক জৰুৰীকালীন অভিযান কেন্দ্ৰ বা এছ ই অ’ চিয়ে জনাইছে যে দিবাং উপত্যকাৰ পাছু পানীত এই আকস্মিক বান আহিছিল। এই অঞ্চলটো মিপি ৰাজহ চক্ৰৰ পৰা প্ৰায় ২৫ কিলোমিটাৰ দূৰত। শুকুৰবাৰে সন্ধিয়া প্ৰায় ৪:৩০ বজাত হঠাতে এটা বৃহৎ পানীৰ ঢল আহে। কিছু মুহূৰ্তৰ ভিতৰতে পানীয়ে চাৰিওফালৰ অঞ্চলত প্ৰৱেশ কৰিলে।
দিবাং উপত্যকাৰ আৰক্ষী অধীক্ষক পংকজ কুমাৰে জনোৱা মতে, পানীৰ ঢলে পাছু পানী সেনা শিবিৰৰ দুটা আশ্ৰয় স্থলী উটুৱাই লৈ যায়। ৫ নং গ্ৰেনেডিয়াৰৰ জোৱানবোৰ তাত আছিল। হঠাৎ হোৱা এই আকস্মিক বানত আবদ্ধ হৈ পৰে মুঠ ৭ জন সেনা জোৱান।
ইয়াৰে দুজনক উদ্ধাৰ কৰা হৈছে। অৱশ্যে আন পাঁচজন এতিয়াও সন্ধানহীন হৈ আছে। ইয়াৰ ভিতৰত আছে হাবিলদাৰ উপেন্দ্ৰৰ লগতে কুন্দন, বিনোদ, আদিত্য আৰু সামুণ্ডা নামৰ আন চাৰিজন সেনা জোৱান। নিৰুদ্দেশ হোৱা জোৱানকেইজনক বিচাৰি ব্যাপক অনুসন্ধান আৰম্ভ কৰা হৈছে।
একাধিক সংস্থাই এই উদ্ধাৰ অভিযান হাতত লৈছে। ৰাজ্যিক দুৰ্যোগ প্ৰতিৰোধ বাহিনী (এছডিআৰএফ), ৰাষ্ট্ৰীয় দুৰ্যোগ সঁহাৰি বাহিনী (এনডিআৰএফ) আৰু জিলাখনৰ জিলা দুৰ্যোগ ব্যৱস্থাপনা আৰু সাহায্য দলৰ সদস্যসকলে এই অভিযান চলাই আছে। ৫ নং গ্ৰেনেডিয়াৰৰ দুটা বিশেষ অনুসন্ধান আৰু উদ্ধাৰকাৰী দলো নিয়োগ কৰা হৈছে।
ইয়াৰ উপৰিও ভাৰত-তিব্বত সীমান্ত আৰক্ষীৰ ৫৮ নং বেটেলিয়ন, জেনেৰেল ৰিজাৰ্ভ ইঞ্জিনিয়াৰ ফৰ্চৰ ৬২ নং ৰোড কনষ্ট্ৰাকচন কোম্পানী, অৰুণাচল প্ৰদেশ আৰক্ষী আৰু স্থানীয় স্বেচ্ছাসেৱকসকলেও উদ্ধাৰ অভিযানত সহায় কৰি আছে। পাছিঘাটৰ ১০ জনীয়া এছ ডি আৰ এফৰ এটা দলো সেই স্থানত উপস্থিত হৈছে।
অৱশ্যে আকস্মিক বানত সেনা শিবিৰৰ ক্ষতিৰ পৰিসৰ এতিয়াও স্পষ্ট হোৱা নাই। শিবিৰৰ লগতে অঞ্চলটোৰ অন্যান্য আন্তঃগাঁথনি ক্ষতিগ্ৰস্ত হৈছে নে নাই সেই বিষয়ে নিৰীক্ষণ চলি আছে। পৰিস্থিতি স্বাভাৱিক কৰাৰ প্ৰচেষ্টা অব্যাহত আছে।
আনহাতে, অৰুণাচল প্ৰদেশৰ উজনি সুবনশিৰি জিলাতো একেদিনাই এক বৃহৎ দুৰ্ঘটনা সংঘটিত হয়। কেওজাৰিং-বায়াচিং পথৰ এটা কাটিং ছাইটত সংঘটিত হয় ভূমিস্খলন। খবৰ পোৱা গৈছে যে সেই সময়ত তাত কাম চলি আছিল। ভূমিস্খলনৰ ফলত কেইবাজনো লোক মাটিৰ তলত চেপা খাই পৰে।
এই ঘটনাত ৪ জন লোকৰ মৃত্যু হয়। নিহত কেইজন হৈছে তাডু বাকি, তাজী ৰায়, মাৰ্কছ বসুমতাৰী আৰু বাবুল আলী। ইয়াৰ ভিতৰত বাবুল আলীৰ মৃতদেহ উদ্ধাৰ কৰা হৈছে। বাকীবোৰৰ সন্ধান এতিয়াও চলি আছে।
ঘটনাস্থলীত নাচো থানাৰ আৰক্ষী জোৱান মোতায়েন কৰা হৈছে। ডাপৰিজোৰ পৰা অগ্নিনিৰ্বাপক আৰু জৰুৰীকালীন সেৱাৰ কৰ্মী প্ৰেৰণৰ ব্যৱস্থা কৰা হৈছে। উদ্ধাৰ অভিযানত এছডিআৰএফৰ এটা দলো জড়িত হৈ আছে।
একেদিনাই অৰুণাচল প্ৰদেশৰ দুখন জিলাত আকস্মিক বান আৰু ভূমিস্খলনত ইমানবোৰ লোকৰ মৃত্যু আৰু সন্ধানহীন হোৱা ঘটনাই আতংক বিয়পাইছে। প্ৰতিকূল বতৰৰ মাজতে দুৰ্যোগ সঁহাৰি দলৰ সদস্যসকলে দুৰ্গম অঞ্চলত উদ্ধাৰ অভিযান অব্যাহত ৰাখিছে।
