দিপাৱলীৰ উৎসাহ আনন্দৰ মাজতে নভী মুম্বাইত সংঘটিত হৈছে ভয়ংকৰ অগ্নিকাণ্ড। এই অগ্নিকাণ্ডত শুই থকা অৱস্থাতে চাৰি জন ব্যক্তিৰ মৃত্যু হয়। লগতে এই অগ্নিকাণ্ডত দহ গৰাকী ব্যক্তি আহত হয়।
সংবাদ মাধ্যমৰ সূত্ৰ অনুসৰি সোমবাৰে পুৱা প্ৰায় ১ বজাত নভী মুম্বাই টাউনশ্বিপৰ ভাছি অঞ্চলত অগ্নিকাণ্ড সংঘটিত হয়। দুৰ্ঘটনা সংঘটিত হোৱাৰ সময়ত বহুমহলীয়া অট্টালিকাটোৰ বাসিন্দাসকল শুই আছিল। ফলত তেওঁলোকে জুই লগাৰ বহু সময়ৰ পিছতহে জানিব পাৰে।
প্ৰথমে ১৪ মহলীয়া অট্টালিকাটোৰ ১০ নং মহলাত জুইৰ সূত্ৰপাত হয়। কম সময়ৰ ভিতৰতে জুই ১১ নং আৰু ১২ নং মহলালৈ বিয়পি পৰে।
ঘটনাৰ খবৰ পোৱাৰ পিছতে ঘটনাস্থলীত উপস্থিত হয় ৪০ গৰাকী অগ্নিনিৰ্বাপক বাহিনীৰ জোৱান। দীৰ্ঘ প্ৰচেষ্টাৰ অন্তত পুৱা ৪ বজাত জুই নিয়ন্ত্ৰণ কৰিবলৈ সক্ষম হয়। কিন্তু তেতিয়ালৈকে ৪ জন লোকৰ মৃত্যু হয়।
এই অগ্নিকাণ্ড কেনেকৈ আৰম্ভ হ’ল সেয়া এতিয়াও স্পষ্ট হোৱা নাই। অৱশ্যে দীপাৱলীৰ নিশা সংঘটিত হোৱা এই দুৰ্ঘটনাটো আতচবাজীৰ পৰা হোৱা বুলি সন্দেহ প্ৰকাশ কৰা হৈছে। সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে। জানিব পৰা মতে, দুৰ্ঘটনাত নিহত হোৱা দুগৰাকী মহিলা, এগৰাকী পুৰুষ আৰু এগৰাকী ৬ বছৰীয়া কিশোৰীও আছে। দুৰ্ঘটনাৰ বাবে আহতসকলক চিকিৎসালয়ত ভৰ্তি কৰোৱা হৈছে।
