বিহাৰৰ ৰাজগীৰৰ জৈন ধৰ্মশালাৰ এটা কোঠাৰ পৰা উদ্ধাৰ হৈছে চাৰিজন পৰ্যটকৰ মৃতদেহ। মৃতসকলৰ ভিতৰত দুগৰাকী মহিলা। শুকুৰবাৰে আৰক্ষীয়ে কোঠাটোৰ তলা ভাঙি মৃতদেহকেইটা উদ্ধাৰ কৰে।
ধৰ্মশালাটোৰ পঞ্জীয়ন তথ্য অনুসৰি ৩১ জানুৱাৰীত চাৰিওজনেই তালৈ আহিছিল। এজনে নিজকে বেংগালুৰুৰ বাসিন্দা বুলি পৰিচয় দি আধাৰ কাৰ্ড জমা দিছিল। বাকীবোৰে দিয়া নাছিল।
চাৰিওজনৰ একেলগে মৃত্যুৰ কাৰণ এতিয়াও জানিব পৰা হোৱা নাই। এই মৃত্যুৰ কাৰণ জানিবলৈ বিহাৰৰ নালন্দা জিলাৰ আৰক্ষীয়ে তদন্ত আৰম্ভ কৰিছে।
আৰক্ষীৰ সূত্ৰ অনুসৰি শুকুৰবাৰে ৰাজগীৰৰ দিগম্বৰ জৈন ধৰ্মশালাৰ এটা কোঠাৰ পৰা উদ্ধাৰ হয় চাৰিজন পৰ্যটকৰ মৃতদেহ। কোঠাটো ভিতৰৰ পৰা তলা মাৰি থোৱা আছিল। কোঠাটোৰ পৰা দুৰ্গন্ধ ওলাই আহিছিল।
ধৰ্মশালাখনৰ মেনেজাৰ মুকেশ জৈনে দুৰ্গন্ধ ধৰা পৰাৰ পিছতে আৰক্ষীক খবৰ দিয়ে। তথ্য লাভ কৰাৰ লগে লগে আৰক্ষীয়ে ধৰ্মশালাত উপস্থিত হৈ দুৱাৰ ভাঙি চাৰিজন লোকৰ ওলমি থকা মৃতদেহ উদ্ধাৰ কৰে।
ধৰ্মশালাটোৰ মেনেজাৰে ৩১ জানুৱাৰীত চাৰিজন লোক তালৈ আহিছিল বুলি জনায়। তেওঁলোকে নেপাল ভ্ৰমণ কৰি ৰাজগীৰলৈ অহা বুলি কৈছিল। তাৰ পৰা চাৰিওজন পাৱাপুৰীলৈ যোৱাৰ কথা আছিল। তেওঁ আৰক্ষীক জনায় যে তেওঁলোকৰ এজনে আধাৰ কাৰ্ড জমা দিছে। বাকী কোনোৱেই পৰিচয় পত্ৰ জমা দিয়া নাছিল।
আৰক্ষীৰ সূত্ৰ অনুসৰি স্থানীয় ৰাইজে কমেও দুদিন পূৰ্বে এই চাৰিজন লোকক স্থানীয় বজাৰত ঘূৰি ফুৰা দেখিছিল। সেই কোঠাৰ পৰা উদ্ধাৰ হৈছে তেওঁলোকৰ মোবাইল ফোন। আৰক্ষীয়েও প্ৰাথমিকভাৱে জানিব পাৰিছে যে এই ফোন নম্বৰ বাংগালুৰুৰ।
ৰাজগীৰ অঞ্চলৰ আৰক্ষী বিষয়া সুনীল কুমাৰ সিঙে জনোৱা মতে, কমেও দুদিন পূৰ্বে পৰ্যটককেইজনৰ মৃত্যু হৈছিল। তেওঁ কয় যে মৰণোত্তৰ পৰীক্ষাৰ সমান্তৰালকৈ তেওঁলোকৰ মৃত্যুৰ কাৰণ জানিবলৈ ফৰেনছিক পৰীক্ষাও কৰা হৈছে। ৰাজগীৰৰ উপ-আৰক্ষী অধীক্ষকে কয় যে এই মৃত্যু আত্মহত্যা নেকি বা ইয়াৰ আঁৰত আন কিবা ৰহস্য আছে নেকি সেই বিষয়েও তদন্ত কৰি আছে।
সূত্ৰ অনুসৰি চাৰিজন লোকৰ মোবাইল কলৰ সবিশেষৰ তদন্তও অব্যাহত আছে। অৱশ্যে সেই ভ্ৰমণৰ সময়তে ইজনে সিজনৰ সৈতে পৰিচয় হোৱা বুলি আৰক্ষীয়ে জানিব পাৰিছে।
