ফ্ৰান্সে আগন্তুক বিশ্বকাপৰ বাবে চূড়ান্ত ২৬ জনীয়া দল ঘোষণা কৰিছে। বিশ্বকাপৰ অন্যতম প্ৰিয় দল হিচাপে প্ৰতিযোগিতাখনত প্ৰৱেশ কৰা দলটোত আছে এটা ডাঙৰ চমক। এইবাৰৰ দলটোৰ আটাইতকৈ ডাঙৰ আচৰিত কথাটো হ’ল ৰিয়েল মাদ্রিদৰ মিডফিল্ডাৰ এডুয়াৰ্ডো কামাভিংগাৰ অনুপস্থিতি।
যোৱা বছৰৰ ৰানাৰ্ছ আপ ফ্ৰান্সে শক্তিশালী দল লৈ বিশ্বকাপলৈ গৈ আছে। দলটোত আছে কাইলিয়ান এমবাপে, অউছমেন ডেম্বেলে, মাইকেল অলিছেহ, অৰেলিয়ান চোয়ামনি, এন’গ’লো কণ্টে, উইলিয়াম ছালিবা আৰু থিও হাৰ্নাণ্ডেজৰ দৰে তাৰকা। গোলৰক্ষকৰ দায়িত্বত আছে মাইক মিগনন।
২০২২ চনৰ বিশ্বকাপত ৰানাৰ্ছ আপ স্থান দখল কৰা ফ্ৰান্স দলৰ সদস্য আছিল কামাভিংগা। সেই ফাইনেলত আৰ্জেণ্টিনাৰ বিৰুদ্ধেও তেওঁ বিকল্প হিচাপে খেলিছিল। অৱশ্যে এইবাৰ অন্তৰ্ভুক্ত কৰা নহ’ল ২২ বছৰীয়া মিডফিল্ডাৰগৰাকীক।
ডেশ্বাম্পছে কামাভিংগাক বাদ দিয়াৰ কাৰণ ব্যাখ্যা কৰি কয় যে, “তেওঁৰ বাবে এইটো এটা কঠিন ছিজন আছিল। তেওঁ কম খেলিছিল আৰু আঘাতৰ সন্মুখীন হৈছিল। তেওঁ অতি কম বয়সতে আমাৰ দললৈ আহিছিল, তেওঁ এতিয়াও এজন যুৱ খেলুৱৈ।”
ৰয়টাৰ্ছক দিয়া এক বিবৃতিত ডেশ্বাম্পছে লগতে কয় যে, “মই দলটোৰ মাজত ভাৰসাম্য ৰক্ষা কৰিব লগা হৈছে। মই ডিফেন্স, মিডফিল্ড আৰু আক্ৰমণৰ মাজত ভাৰসাম্য ৰক্ষা কৰিব লগা হৈছে। আজি নিশা তেওঁ কিমান হতাশ হৈছে সেয়া মই বুজি পাওঁ।”
ফ্ৰান্সৰ আক্ৰমণ বিভাগ এইবাৰ ঈৰ্ষণীয়। অধিনায়ক এমবাপে, বেলন ডি অৰ বিজয়ী অউছমেন ডেম্বেলেৰ লগতে যুৱ প্ৰতিভা ডেজিৰী ডু, মাইকেল অলিছেহ, ৰিয়ান চেৰকি আৰু মেগনেছ আকালিউছও আছে।
এই বিশ্বকাপ ফ্ৰান্সৰ প্ৰশিক্ষক হিচাপে ডিডিয়েৰ ডেশ্বাম্পছৰ অন্তিমখন প্ৰতিযোগিতা হ’ব। ২০১২ চনত দায়িত্ব লোৱাৰ পিছত ২০১৮ চনত ফ্ৰান্সক বিশ্বকাপ জয়ী কৰিছিল। ২০২২ চনত তেওঁ দলটোক ফাইনেললৈও লৈ যায়।
ফ্ৰান্সৰ সংবাদ মাধ্যমৰ মতে, বিশ্বকাপৰ পিছত দেশৰ উত্তৰাধিকাৰী হিচাপে জিনেদিন জিদানে দায়িত্ব ল’ব পাৰে।
১৯৯৮ চনত ঘৰুৱা মাটিত আৰু ২০১৮ চনত ৰাছিয়াত ফ্ৰান্সে বিশ্বকাপ জয় কৰিছিল। এইবাৰ আমেৰিকা, মেক্সিকো আৰু কানাডাত অনুষ্ঠিত হ’বলগীয়া বিশ্বকাপত তৃতীয়টো খিতাপ দখলৰ লক্ষ্যৰে খেলপথাৰত নামিব ‘লেছ ব্লুছ’।
বিশ্বকাপৰ বাবে ফ্ৰান্সৰ দলটো
গ’লৰক্ষক : মাইক মিগনন, ব্ৰাইচ চাম্বা, ৰবিন ৰিছাৰ।
ডিফেণ্ডাৰ : লুকা ডিগনে, মালো গুষ্টো, লুকাছ হাৰ্নাণ্ডেজ, থিও হাৰ্নাণ্ডেজ, ইব্ৰাহীমা ক’নাটে, হুৱেলছ কুণ্ডে, মেক্সেন্স লেক্ৰ’ইছ, উইলিয়াম চালিবা আৰু দায়’ট উপমেকানো।
মিডফিল্ডাৰ : এন’গ’লো কণ্টে, মানু ক’নো, এড্ৰিয়েন ৰাবিঅ’ট, অ’ৰেলিয়ান চৌমানে আৰু ৱাৰেন জাইৰে-এমেৰী।
আক্ৰমণ: মেগনাছ আকালিউছ, ব্ৰেডলি বাৰ্কোলা, ৰিয়ান শ্বাৰকি, অউছমেন ডেম্বেলে, ডেজিৰী ড’ৱে, জিন-ফিলিপ মেটেটা, কাইলিয়ান এমবাপে, মাইকেল অলিচে আৰু মাৰ্কছ থুৰাম।
