NEET 2026 পৰীক্ষাক লৈ পুনৰ ডাঙৰ বিতৰ্কৰ সৃষ্টি হৈছে! ৰাজস্থানৰ ছিকৰত পোৱা এখন ‘Guess Papers’ প্ৰকৃত পৰীক্ষাৰ প্ৰশ্নৰ সৈতে হুবহু একে বুলি কোৱা হয়। ফলত দেশৰ সৰ্ববৃহৎ মেডিকেল প্ৰৱেশ পৰীক্ষাত পুনৰ প্ৰশ্নকাকত ফাদিল হোৱাৰ আশংকা তীব্ৰতৰ হৈ পৰিছে।
ৰাজস্থান স্পেচিয়েল অপাৰেচন গ্ৰুপে তদন্তৰ অন্তত জনোৱা মতে, ৩ মে’ত অনুষ্ঠিত হোৱা NEET পৰীক্ষাৰ ৭২০টা প্ৰশ্নৰ ভিতৰত প্ৰায় ৬০০টা প্ৰশ্ন কাকতৰ সৈতে মিল থকা বুলি ধৰা পৰিছে। কেৱল প্ৰশ্নই নহয়, বহু ক্ষেত্ৰত প্ৰশ্নৰ ক্ৰমো একেই!
তদন্তকাৰীয়ে অনুমান কৰিছে যে পৰীক্ষাৰ দুদিন আগতে এই প্ৰশ্নকাকতখন প্ৰথমে ছিকৰ অঞ্চলত বিয়পি পৰিছিল। ২০হাজাৰৰ পৰা ২ লাখ টকাত বিক্ৰি কৰিছিল ছাত্ৰ-ছাত্ৰীক। পৰীক্ষাৰ আগদিনা নিশা সেই প্ৰশ্নকাকত হেনো ৩০ হাজাৰ টকাত বিক্ৰী হৈছিল। এই প্ৰশ্নকাকতখন দ্ৰুতগতিত কোচিং নেটৱৰ্ক, বিভিন্ন কেৰিয়াৰ পৰামৰ্শদাতা আৰু অসংখ্য পৰীক্ষাৰ্থীৰ হাতত পৰে।
এছ অ’ জিৰ তদন্তত প্ৰকাশ পাইছে যে প্ৰশ্নকাকতখন প্ৰথমে শ্বেয়াৰ কৰিছিল চুৰু জিলাৰ এগৰাকী এম বি বি এছৰ ছাত্ৰই, যিগৰাকী বৰ্তমান কেৰেলাৰ এখন চিকিৎসা মহাবিদ্যালয়ত অধ্যয়ন কৰি আছে। তেওঁ ১ মে’ত ছিকৰত থকা বন্ধু এজনলৈ পঠিয়াইছিল, তাৰ পিছত বিভিন্ন মাধ্যমৰ জৰিয়তে দ্ৰুতগতিত বিয়পি পৰিছিল।
তদন্তকাৰীসকলে দাবী কৰে যে প্ৰশ্নকাকতখনত ৩০০ৰো অধিক হাতেৰে লিখা প্ৰশ্ন আছিল— পদাৰ্থ বিজ্ঞান, ৰসায়ন বিজ্ঞান আৰু জীৱবিজ্ঞানৰ। সেইবোৰৰ ওপৰত থকা হাতৰ আখৰবোৰো একেই বুলি জনা যায়। ইয়াৰে প্ৰায় ১৪০ টা প্ৰশ্ন হুবহু মূল NEET প্ৰশ্নকাকতত প্ৰকাশ পাইছিল। যিহেতু প্ৰতিটো প্ৰশ্ন চাৰি নম্বৰৰ, গতিকে বিশেষজ্ঞসকলৰ মতে এই সাদৃশ্যই পৰীক্ষাৰ ৰেংকিং আৰু নামভৰ্তি প্ৰক্ৰিয়াত ডাঙৰ প্ৰভাৱ পেলাব পাৰে।
তদন্তত প্ৰকাশ পাইছে যে এনক্ৰিপ্ট কৰা মেছেজিং এপৰ পৰা আৰম্ভ কৰি ছ’চিয়েল মিডিয়াত প্ৰশ্নকাকতখন ব্যাপকভাৱে বিয়পি পৰিছিল। বহুবাৰ চ্যাটতো ‘forwarded many times’ টেগটো পোৱা গৈছিল। কিছুমান ক্ষেত্ৰত হেনো ছপা কপিও দিয়া হৈছিল।
ছিকৰৰ এজন পিজি অপাৰেটৰকো সন্দেহজনক তালিকাত ৰখা হৈছে। অভিযোগ অনুসৰি পৰীক্ষাৰ পূৰ্বে তেওঁ প্ৰশ্নকাকতখন লাভ কৰি আনলৈ প্ৰেৰণ কৰিছিল। পিছত অৱশ্যে তেওঁ আৰক্ষী আৰু এন টি এৰ ওচৰত অভিযোগ দাখিল কৰে – যিটো তদন্তকাৰীৰ মতে সন্দেহজনক।
ৰাজস্থান এছ অ’ জিৰ তদন্ত সম্পূৰ্ণ হোৱাৰ পিছতহে পৰৱৰ্তী পদক্ষেপ গ্ৰহণ কৰিব বুলি এন টি এয়ে জানিবলৈ দিয়ে। মূলতঃ এই নেটৱৰ্কৰ পৰিসৰ, প্ৰশ্নকাকত ফাদিলৰ উৎস ক’ত আৰু ইয়াৰ আঁৰত কোনো সংগঠিত গোট আছে নেকি সেই বিষয়ে তদন্ত চলি আছে।
উল্লেখ্য যে NEET 2024 ত প্ৰশ্নকাকত ফাদিল হোৱা, মাৰ্ক মেনিপুলেচন আৰু বিভিন্ন অনিয়মক লৈ দেশজুৰি তীব্ৰ আন্দোলন চলিছিল। আনকি উচ্চতম ন্যায়ালয়েও হস্তক্ষেপ কৰিবলগীয়া হৈছিল। এইবাৰো এনেধৰণৰ ঘটনা সংঘটিত হৈছে নেকি সেই উদ্বেগ বাঢ়িছে। সামগ্ৰিকভাৱে NEET 2026 পৰীক্ষাক কেন্দ্ৰ কৰি স্বচ্ছতা আৰু নিৰাপত্তাজনিত সমস্যাক লৈ এনটিএ পুনৰবাৰ তীব্ৰ চাপত পৰিছে।
