ভাৰতৰ সৰ্ববৃহৎ খুচুৰা মধ্যস্থাকাৰী (ব্ৰোকাৰেজ) প্ৰতিষ্ঠান জিৰোধাৰ সহ-প্ৰতিষ্ঠাপক নিখিল কামাথৰ সফলতাৰ কাহিনীয়ে চিনেমাৰ কাহিনীকো চেৰ পেলাব। মাত্ৰ ১৭ বছৰ বয়সতে দশম শ্ৰেণীৰ ড্ৰপআউট নিখিল আজি ভাৰতৰ অন্যতম স্ব-নিৰ্মিত কোটিপতি।
সমাজে এতিয়াও স্বনামধন্য শিক্ষানুষ্ঠানৰ পৰা উচ্চ পৰ্যায়ৰ ডিগ্ৰী বা অভিজাত শিক্ষা লাভ কৰাটো সফলতাৰ বাবে অতি অপৰিহাৰ্য বুলি বিশ্বাস কৰি থকাৰ সময়তে নিখিল কামাথে দৃঢ়তা, ইচ্ছাশক্তি আৰু কঠোৰ পৰিশ্ৰমৰ দ্বাৰা মানুহে কি কৰিব পাৰে সেয়া দেখুৱাইছে।
অৱশ্যে পিতৃ-মাতৃৰ স্বতন্ত্ৰ লালন-পালন আৰু নিয়মৰ বাহিৰলৈ গৈ কিবা এটা কৰাৰ ইচ্ছাই তেওঁক এই যাত্ৰাত বহুখিনি সহায় কৰিছে। কি আছে নিখিল কামাথৰ এই সফলতাৰ কাহিনীত?
১৯৮৬ চনত কৰ্ণাটকৰ এটা মধ্যবিত্ত পৰিয়ালত জন্মগ্ৰহণ কৰিছিল নিখিল কামাথে। সৰুৰে পৰা কিতাপ আৰু পঢ়া-শুনাৰ প্ৰতি তেওঁৰ কোনো আগ্ৰহ নাছিল। তেওঁৰ পিতৃ-মাতৃয়ে কেতিয়াও তেওঁক পৰম্পৰাগত শিক্ষা গ্ৰহণ কৰিবলৈ বাধ্য কৰা নাছিল, বৰঞ্চ তেওঁৰ কৌতুহল পূৰণৰ সুযোগ দিছিল।
মাত্ৰ ১৪ বছৰ বয়সৰ পৰাই নিখিল কামাথৰ উদ্যোগী হোৱাৰ যাত্ৰা আৰম্ভ হৈছিল।নৱম মানত পঢ়ি থকাৰ সময়তে তেওঁ আৰু এজন বন্ধুৰ সৈতে গোপনে পুৰণি মোবাইল ফোন ক্ৰয়-বিক্ৰয়ৰ ব্যৱসায় আৰম্ভ কৰিছিল। লাভ ভাল আছিল যদিও মাকে এই কথা গম পাই খঙেৰে সকলো ফোন টয়লেটত ফ্লাছ কৰি দিলে। কিন্তু এই ঘটনাই তেওঁৰ উৎসাহক ম্লান কৰা নাছিল বৰঞ্চ তেওঁক ৰিস্ক লোৱা আৰু বাধা অতিক্ৰম কৰাৰ সাহস দিছিল।
এটা প’ডকাষ্টত নিখিল কামাথে কয় যে ২০০০ চনৰ আৰম্ভণিতে তেওঁ বেংগালুৰুৰ এটা কল চেণ্টাৰত প্ৰথম চাকৰি পাইছিল। সেই সময়ত তেওঁ মাহে ৭ হাজাৰৰ পৰা ৮ হাজাৰ টকা উপাৰ্জন কৰি আছিল। নিখিলে নাইট শ্বিফটত কাম কৰিছিল। তেওঁৰ মতে এই সহজ কামটোৱে তেওঁক নিষ্ঠা আৰু অনুশাসনৰ পাঠ শিকাইছিল, যিটোৱে পিছলৈ জিৰোধাৰ দৰে এটা ডাঙৰ কোম্পানী গঢ়ি তোলাত সহায় কৰিছিল।
নিখিল কামাথে কয় যে তেওঁৰ পিতৃ-মাতৃয়ে কিছুমান নীতি মানি চলিছিল যিবোৰ আজিকালি বিৰল। উদাহৰণস্বৰূপে, তেওঁলোকৰ ঘৰত পৰীক্ষা-নিৰীক্ষা কৰাৰ সম্পূৰ্ণ স্বাধীনতা আছিল। ১৫-১৬ বছৰ বয়সত নিখিলে স্কুল এৰি যোৱাৰ সিদ্ধান্ত লওঁতে পিতৃ-মাতৃয়ে তেওঁক কোনো অনুশাসন নোহোৱাকৈ নিজৰ পথ বাছি লোৱাৰ সুযোগ দিছিল।
দশম শ্ৰেণী বাদ দিয়াৰ পিছত তেওঁ এটা কল চেণ্টাৰত নাইট শ্বিফটত কাম কৰিবলৈ ধৰিলে। আৰু আজৰি সময়ত তেওঁ ষ্টক ট্ৰেডিং শিকিবলৈ আৰম্ভ কৰিলে। নিখিলে কয় যে তেওঁৰ পিতৃ-মাতৃয়ে কেতিয়াও শৈক্ষিক সফলতাক সফলতাৰ একমাত্ৰ পৰিমাপ বুলি গণ্য কৰা নাছিল। নিখিল কামাথৰ সফলতা কিতাপ পঢ়াৰ পৰাই নহয়, জীৱনৰ অভিজ্ঞতা আৰু ভুলৰ পৰাহে আহিছিল।
নিখিলে ২০১০ চনত ভাতৃ নীতিন কামাথৰ সৈতে খুচুৰা মধ্যস্থতাকাৰী সংস্থা জিৰোধা প্ৰতিষ্ঠা কৰে। ব্যৱসায়ৰ ক্ষেত্ৰত তেওঁৰ কৌশলগত দূৰদৰ্শিতাই ভাৰতৰ ৰিটেইল ব্ৰোকাৰেজ খণ্ড সলনি কৰিছে। সাধাৰণ মানুহৰ বাবে শ্বেয়াৰ বজাৰত বিনিয়োগ কৰাটো সহজ আৰু সুলভ কৰি তোলাৰ লক্ষ্যৰে নিখিলে ডিচকাউণ্ট ব্ৰোকাৰেজ মডেল মুকলি কৰে।
ফৰ্বছ আলোচনীৰ তথ্য অনুসৰি বৰ্তমান নিখিল কামাথৰ সম্পত্তিৰ পৰিমাণ ২.৫ বিলিয়ন ডলাৰ (প্ৰায় ২৩,০০০ কোটি টকা) যাৰ ফলত তেওঁ ভাৰতৰ স্ব-নিৰ্মিত কোটিপতিৰ ভিতৰত অন্যতম।
