ছাত্ৰ-ছাত্ৰীৰ ব্যাপক প্ৰতিবাদৰ পিছত সকলো স্নাতকোত্তৰ ছেমিষ্টাৰ পৰীক্ষা আৰু ইণ্টিগ্ৰেটেড এম কম পৰীক্ষা অনিৰ্দিষ্ট কাললৈ পিছুৱাই দিছে গুৱাহাটী বিশ্ববিদ্যালয়ে।
বিশ্ববিদ্যালয়ৰ দ্বাৰা জাৰি কৰা এখন জাননীৰ জৰিয়তে পৰীক্ষাৰ নিৰ্ধাৰিত তাৰিখ পিছত প্ৰকাশ কৰা হ’ব বুলি উল্লেখ কৰা হৈছে।
উল্লেখ্য যে পূৰ্বৰ সময়সূচী অনুসৰি ২৯ জানুৱাৰীৰ পৰা বিশ্ববিদ্যালয়ৰ স্নাতকোত্তৰ ছেমিষ্টাৰ পৰীক্ষা আৰু ইণ্টিগ্ৰেটেড এম কম অনুষ্ঠিত হোৱাৰ কথা আছিল।
কিন্তু এই সময়সূচীৰ বিৰুদ্ধে শিক্ষাৰ্থীসকলে অসন্তুষ্টি প্ৰকাশ কৰে আৰু বিশ্ববিদ্যালয় চৌহদত প্ৰতিবাদী কাৰ্যসূচী গ্ৰহণ কৰে।
শিক্ষাৰ্থীসকল অভিযোগ কৰে যে বিশ্ববিদ্যালয়ৰ শ্ৰেণীসমূহ পুনৰ আৰম্ভ হোৱা মাত্ৰ তিনি মাহ হৈছে আৰু পাঠ্যক্ৰম অসম্পূৰ্ণ হৈ থকাৰ বাবে পৰীক্ষা অনুষ্ঠিত কৰাটো যুক্তিসঙ্গত নহয়।
তদুপৰি বিশ্ববিদ্যালয়ৰ বিভাগসমূহত ক’ভিদ সংক্ৰমণ বৃদ্ধি পোৱাৰ বাবে পৰীক্ষা অনুষ্ঠিত কৰাটো উচিত নহয় বুলিও দাবী কৰে শিক্ষাৰ্থীসকলে।
এই প্ৰতিবাদৰ পিছত বিশ্ববিদ্যালয় কৰ্তৃপক্ষই পৰৱৰ্তী জাননী নোপোৱালৈকে পৰীক্ষা স্থগিত ৰখাৰ সিদ্ধান্ত গ্ৰহণ কৰে।
