আগন্তুক অসম বিধানসভা নিৰ্বাচনৰ পূৰ্বে ৰাজ্যৰ ৰাজনৈতিক বতাহ ক্ৰমাৎ উত্তপ্ত হৈ পৰিছে। শনিবাৰে মাজুলীত কংগ্ৰেছ প্ৰাৰ্থী ড° ইন্দ্ৰনীল পেগুৰ হৈ নিৰ্বাচনী প্ৰচাৰ চলাই অসম প্ৰদেশ কংগ্ৰেছ কমিটীৰ সভাপতি গৌৰৱ গগৈয়ে শাসকীয় ভাৰতীয় জনতা পাৰ্টিক তীব্ৰ আক্ৰমণৰ লক্ষ্য কৰি লয়। গগৈয়ে তাৎপৰ্যপূৰ্ণ মন্তব্য কৰি কয় যে বৰ্তমান অসমত প্ৰকৃত বিজেপি দলৰ কোনো অস্তিত্ব নাই, বৰঞ্চ বিজেপিৰ নামফলক আঁৰি মুখ্যমন্ত্ৰী হিমন্ত বিশ্ব শৰ্মাৰ নেতৃত্বত একাংশ প্ৰাক্তন কংগ্ৰেছী নেতাইহে দলটো চলাই আছে।
সংবাদ মাধ্যমৰ সৈতে হোৱা বাৰ্তালাপত প্ৰদেশ কংগ্ৰেছৰ সভাপতিগৰাকীয়ে কয় যে তৰুণ গগৈৰ চৰকাৰৰ আমোলত যিসকল নেতা-মন্ত্ৰীৰ বেয়া কাম-কাজৰ বাবে ৰাইজে কংগ্ৰেছক বেয়া পাইছিল, সেইসকল দাগী নেতাই এতিয়া ক্ষমতা আৰু পৰিয়ালৰ স্বাৰ্থত বিজেপিৰ ৰাজ্যিক কাৰ্যালয় বাজপেয়ী ভৱনত একত্ৰিত হৈছে। তেওঁ এইবাৰৰ নিৰ্বাচনী যুঁজখনক সাধাৰণ নিৰ্বাচনৰ সলনি ‘হিমন্ত বিশ্ব শৰ্মাৰ নেতৃত্বাধীন দাগী কংগ্ৰেছ’ আৰু ‘তৰুণ গগৈৰ আদৰ্শৰে পৰিচালিত নতুন কংগ্ৰেছ’ৰ মাজৰ আদৰ্শগত যুঁজ বুলি অভিহিত কৰে। গগৈৰ মতে, কংগ্ৰেছ দলে এতিয়া নতুন মুখ আৰু নিকা ভাৱমূৰ্তিৰ ওপৰত গুৰুত্ব আৰোপ কৰিছে, যিটো ৰাইজে ইতিমধ্যে ইতিবাচক দৃষ্টিৰে গ্ৰহণ কৰিছে। অসমৰ ৰাইজে এইবাৰ পুৰণি আৰু দাগী নেতাৰ পৰিৱৰ্তে তৰুণ গগৈৰ আদৰ্শৰে উদ্বেলিত নতুন কংগ্ৰেছক আঁকোৱালি ল’ব বুলি তেওঁ দৃঢ়তা প্ৰকাশ কৰে।
নিৰ্বাচনী ফলাফলক লৈ গভীৰ আশাবাদ ব্যক্ত কৰি গগৈয়ে কয় যে উজনি আৰু উত্তৰ অসমত বিৰোধী মিত্ৰজোঁটৰ মাজত এক সুন্দৰ বুজাবুজি গঢ় লৈ উঠিছে আৰু ইয়াৰ পৰাই কংগ্ৰেছ নেতৃত্বাধীন নতুন চৰকাৰ গঠনৰ ৰণডংকা বাজি উঠিব। মিত্ৰজোঁটক অধিক শক্তিশালী কৰাৰ স্বাৰ্থত দলৰ শীৰ্ষ নেতৃত্বই গ্ৰহণ কৰা সিদ্ধান্তসমূহ মানি চলিবলৈ তেওঁ সকলো পৰ্যায়ৰ নেতা-কৰ্মীক আহ্বান জনায়। মিত্ৰদলসমূহৰ প্ৰতিগৰাকী কৰ্মীৰ ত্যাগ আৰু কষ্টৰ শলাগ লৈ গগৈয়ে কয় যে ৰাজ্যৰ বৃহত্তৰ স্বাৰ্থত সকলোৱে ঐক্যবদ্ধভাৱে কাম কৰিলে পৰিৱৰ্তন নিশ্চিত।
উল্লেখযোগ্য যে, নিৰ্বাচনী প্ৰচাৰৰ অংশ হিচাপে গৌৰৱ গগৈয়ে মাজুলী সমষ্টিৰ কংগ্ৰেছ প্ৰাৰ্থী ড° ইন্দ্ৰনীল পেগুৰ সমৰ্থনত এক বিশাল মটৰচাইকেল সমদলত অংশগ্ৰহণ কৰে। সহস্ৰাধিক মটৰচাইকেলৰ অংশগ্ৰহণেৰে অনুষ্ঠিত হোৱা এই সমদলৰ জৰিয়তে তেওঁ সমষ্টিবাসী ৰাইজৰ ঘৰে ঘৰে গৈ আশীৰ্বাদ বিচাৰে আৰু মাজুলীত এইবাৰ কংগ্ৰেছ প্ৰাৰ্থীগৰাকীৰ বিজয় সুনিশ্চিত বুলি দাবী কৰে।
