ৰাজ্যত ক্ৰমান্বয়ে তীব্ৰতৰ হৈ পৰিছে বিধানসভা নিৰ্বাচনৰ উছাহ। সোমবাৰে ভাৰতীয় জাতীয় কংগ্ৰেছৰ লগতে বিৰোধী ঐক্যমঞ্চৰ কেইবাগৰাকীও সমৰ্থিত প্ৰাৰ্থীয়ে ৰাজ্যৰ বিভিন্ন গুৰুত্বপূৰ্ণ সমষ্টিৰ বাবে মনোনয়ন পত্ৰ দাখিল কৰিব। অৱশ্যে, সমগ্ৰ প্ৰক্ৰিয়াটোত ৰাজনৈতিক মহলৰ সৰ্বাধিক দৃষ্টি নিৱদ্ধ হৈছে যোৰহাট সমষ্টিৰ ওপৰত, কিয়নো সোমবাৰেই মিত্ৰজোঁটৰ হৈ এই সমষ্টিটোৰ পৰা আনুষ্ঠানিকভাৱে মনোনয়ন দাখিল কৰিব কংগ্ৰেছ নেতা গৌৰৱ গগৈয়ে।
প্ৰাপ্ত খবৰ অনুসৰি, কাইলৈ দিনৰ ঠিক ১১ বজাত ভাৰতীয় জাতীয় কংগ্ৰেছ দলৰ মনোনীত তথা মিত্ৰজোঁট সমৰ্থিত প্ৰাৰ্থী গৌৰৱ গগৈয়ে যোৰহাট ষ্টেডিয়ামৰ পৰা এক বিশাল সমদল উলিয়াই জিলা আয়ুক্তৰ কাৰ্যালয়ত উপস্থিত হ’ব আৰু নিজৰ মনোনয়ন পত্ৰ দাখিল কৰিব। তেওঁৰ মনোনয়ন দাখিলক কেন্দ্ৰ কৰি যোৰহাটত দলীয় কৰ্মীসকলৰ মাজত ব্যাপক উছাহ-উদ্দীপনা পৰিলক্ষিত হৈছে।
কেৱল যোৰহাটেই নহয়, ৰাজধানী গুৱাহাটীৰো কেইবাটাও গুৰুত্বপূৰ্ণ সমষ্টিত কংগ্ৰেছ প্ৰাৰ্থীসকলে কাইলৈ মনোনয়ন দাখিল কৰিব। দিছপুৰ বিধানসভা সমষ্টিৰ বাবে ভাৰতীয় জাতীয় কংগ্ৰেছ দলৰ প্ৰাৰ্থী মীৰা বৰঠাকুৰে পুৱা ৯ বজাত নিজৰ বাসভৱনৰ পৰা যাত্ৰা আৰম্ভ কৰিব। তেওঁ গণেশ মন্দিৰত আশীৰ্বাদ গ্ৰহণ কৰি মানৱেন্দ্ৰ শৰ্মা কমপ্লেক্সত উপস্থিত হ’ব আৰু তাৰ পৰাই মনোনয়ন পত্ৰ দাখিল কৰিবলৈ জিলা আয়ুক্তৰ কাৰ্যালয়লৈ ৰাওনা হ’ব।
আনহাতে, নিউ গুৱাহাটী সমষ্টিৰ ভাৰতীয় জাতীয় কংগ্ৰেছ দলৰ প্ৰাৰ্থী শান্তনু বৰাই মনোনয়ন দাখিলৰ পূৰ্বে পুৱা ১০ বজাত ৰাজীৱ ভৱনত সমবেত হ’ব। গড়চুকস্থিত নিজৰ বাসগৃহৰ পৰা সমদল কৰি জিলা আয়ুক্তৰ কাৰ্যালয়লৈ গৈ মনোনয়ন পত্ৰ দাখিল কৰিব জালুকবাৰী সমষ্টিৰ বাবে কংগ্ৰেছ দলৰ প্ৰাৰ্থী বিদিশা নেওগে।
মহানগৰীৰ বাহিৰত শোণিতপুৰ জিলাৰো তিনিটা সমষ্টিৰ বাবে কংগ্ৰেছ প্ৰাৰ্থীসকলে কাইলৈ মনোনয়ন দাখিল কৰাৰ প্ৰস্তুতি সম্পূৰ্ণ কৰিছে। ৰঙাপৰা সমষ্টিৰ বাবে কাৰ্তিক কুৰ্মী, ঢেকীয়াজুলি সমষ্টিৰ বাবে বাতাছ ওৰাং আৰু নদুৱাৰ সমষ্টিৰ বাবে সুনীল ছেত্ৰীয়ে পুৱা ১১ বজাত শোণিতপুৰ জিলা আয়ুক্তৰ কাৰ্যালয়ত উপস্থিত হৈ নিজৰ মনোনয়ন পত্ৰ দাখিল কৰিব। উল্লেখ্য যে, ভাৰতীয় জাতীয় কংগ্ৰেছ দল আৰু মিত্ৰজোঁটৰ প্ৰাৰ্থীসকলে কাইলৈ দিনৰ ১২ বজাৰ পূৰ্বেই নিজ নিজ জিলা আয়ুক্তৰ কাৰ্যালয়ত মনোনয়ন পত্ৰ দাখিল কৰাৰ বাবে প্ৰস্তুতি চূড়ান্ত কৰিছে।
