জুবিন গাৰ্গৰ মৃত্যুৰ তদন্ত চলি থকাৰ সময়তে মুখ্যমন্ত্ৰী হিমন্ত বিশ্ব শৰ্মা আৰু বিজেপিৰ আইটি চেলৰ প্ৰচাৰক লৈ সৰৱ হৈ পৰিছে প্ৰদেশ কংগ্ৰেছৰ সভাপতি গৌৰৱ গগৈ। সামাজিক মাধ্যমত দিয়া এক পোষ্টত গগৈয়ে মুখ্যমন্ত্ৰীক অদৰকাৰী কথা কোৱা বন্ধ কৰিবলৈ সকীয়াই কয় যে এনে আচৰণ বন্ধ কৰক অন্যথা ২০২৬ চনৰ নিৰ্বাচনৰ আগতেই মুখ্যমন্ত্ৰীৰ চকী হেৰুৱাব লাগিব।
গগৈয়ে কয় যে যোৱা কেইদিনমান ধৰি জুবিন গাৰ্গৰ মৃত্যুক লৈ মুখ্যমন্ত্ৰী আৰু বিজেপি আইটি চেলে কৰা মন্তব্যৰ পৰা স্পষ্ট যে তেওঁলোকে এই ঘটনাক ৰাজনৈতিক লাভৰ বাবে ব্যৱহাৰ কৰিবলৈ আৰম্ভ কৰিছে। “এতিয়া এওঁলোকৰ কথা-বাৰ্তাৰ কোনো মৰ্য্যদা নোহোৱা হৈ পৰিছে,” বুলিও তেওঁ অভিযোগ কৰিছে। গগৈয়ে লগতে কয় যে জুবিন গাৰ্গৰ আত্মাৰ ওপৰত প্ৰশ্ন তোলা আৰু আৰক্ষীৰ শক্তি প্ৰদৰ্শন কৰাৰ বাহিৰে মুখ্যমন্ত্ৰীৰ হাতত আন কোনো বিকল্প নাই যেন লাগে।
তেওঁ আৰু কয় যে মুখ্যমন্ত্ৰীয়ে পাহৰি গৈছে যে অসমবাসী এতিয়াও এই মৃত্যুৰ গভীৰ বিষাদত আছে। “ক্ষমতা হেৰুওৱাৰ ভয়ে তেওঁক এনে এক পৰ্য্যায়লৈ লৈ গৈছে যে তেওঁ মানৱীয়তাকো পাহৰি গৈছে,” বুলি গগৈয়ে মত পোষণ কৰিছে। তেওঁ অপেক্ষা কৰিব বুলি কৈ মুখ্যমন্ত্ৰীক জুবিন গাৰ্গৰ মৃত্যুৰ সৈতে জড়িত সকলো তথ্য জনসাধাৰণৰ সন্মুখলৈ আনিবলৈ আহ্বান জনাইছে। লগতে অসমবাসীয়ে জানিব বিচাৰে যে চিংগাপুৰত জুবিন গাৰ্গৰ মৃত্যুৰ পিছতো নৰ্থ ইষ্ট ফেষ্টিভেল কেনেকৈ চলি আছিল বুলি প্ৰশ্ন উত্থাপন কৰিছে।
