ৰাজ্য কঁপোৱা শিৱসাগৰ নগৰৰ আচুতীয়া পথত যোৱা ১ জুলাইত সংঘটিত খাৰঘৰীয়া দম্পতিৰ আত্মহননৰ আন এক অভিযুক্ত গীতাশ্ৰী দুৱৰা খাৰঘৰীয়াই ৭৫ দিনৰ অন্তত বৃহস্পতিবাৰে বিয়লি শিৱসাগৰ জিলা মূখ্য ন্যায়িক দণ্ডাধীশৰ আদালতত আত্মসমৰ্পণ কৰে।
খাৰঘৰীয়া দম্পতিৰ মৃত্যুৰ তদন্ত চলাই থকা তদন্তকাৰী আৰক্ষী বিষয়াই ৰজনী খাৰঘৰীয়াৰ বোৱাৰী গীতাশ্ৰীক সোধ পোছৰ বাবে ৭ দিনৰ আৰক্ষীৰ জিম্মাত বিচাৰে যদিও আদালতে গীতাশ্ৰীক ২ দিনৰ বাবে আৰক্ষীৰ জিম্মালৈ প্ৰেৰণ কৰে।
ৰজনী খাৰঘৰীয়া দম্পতিৰ মৃত্যুৰ এমাহৰ পিছত পুত্ৰ দেৱাশিষ খাৰঘৰীয়াক অতি নাটকীয়ভাৱে আৰক্ষীয়ে গুৱাহাটীৰ পৰা গ্ৰেপ্তাৰ কৰি জেল হাজোতলৈ প্ৰেৰণ কৰে যদিও সেই সময়ত গীতাশ্ৰীক আটক কৰিবলৈ সক্ষম হোৱা নাছিল অসম আৰক্ষী।
আৰক্ষীয়ে গীতাশ্ৰীক বিচাৰি বিভিন্ন স্থানত অভিযান চলাইছিল যদিও গীতাশ্ৰীৰ সন্ধান লাভ কৰাত আৰক্ষী ব্যৰ্থ হৈছিল। বৃহস্পতিবাৰে হঠাৎ খাৰঘৰীয়াৰ বোৱাৰী গীতাশ্ৰীয়ে মূখ্য ন্যায়াধীশ আদালতত আত্মসমৰ্পণ কৰা কাৰ্য্যই বহু প্ৰশ্নৰ সৃষ্টি কৰিছে।
উল্লেখযোগ্য যে পুত্ৰ-বোৱাৰী দেৱাশিস খাৰঘৰীয়া আৰু গীতাশ্ৰী দুৱৰা খাৰঘৰীয়াৰ অৱহেলাৰ বাবেই শিৱসাগৰৰ সাংস্কৃতিক কৰ্মী তথা এসময়ৰ প্ৰতিষ্ঠিত ব্যৱসায়ী ৰজনী খাৰঘৰীয়া আৰু তেওঁৰ পত্নী ৰুবী খাৰঘৰীয়াই মৃত্যুক আঁকোৱালি ল’ব লগীয়া হৈছিল।
দেৱাশিসৰ ৰুগ্ন মাতৃয়ে এটা ইনছুলিনৰ বাবে টকা নোহোৱা অৱস্থাত যোৱা ৩০ জুনত ভাৰাঘৰতে অস্বাভাৱিক মৃত্যুক সাৱটি লোৱাৰ লগতে দেউতাকেও একেদিনাই ভাৰাঘৰৰ কোঠাতে আত্মহত্যা কৰিছিল।